ພິທີມອບ-ຮັບເງິນນະໂຍບາຍອຸດໜູນເສຍສະຫຼະຊີວິດຂອງອະດີດພະນັກງານປະຕິວັດ ທີ່ຮັບໃຊ້ການປະຕິວັດຊາດປະຊາທິປະໄຕ ໃນປາງສົງຄາມ ຢູ່ເມືອງປາກກະດິງ ແຂວງບໍລິຄຳໄຊ ໄດ້ຈັດຂຶ້ນໃນຕອນແລງວັນທີ 7 ມິຖຸນາ 2019 ຢູ່ທີ່ຫ້ອງປະຊຸມຫ້ອງວ່າການປົກຄອງເມືອງ.

    ໃນພິທີ ໄດ້ຜ່ານຂໍ້ຕົກລົງຂອງເຈົ້າແຂວງບໍລິຄຳໄຊ ສະບັບເລກທີ 226/ຂບຊ, ລົງວັນທີ 21 ພຶດສະພາ 2019, ວ່າດ້ວຍການປະຕິບັດນະໂຍບາຍເງິນອຸດໜູນເສຍສະຫຼະຊີວິດຍ້ອນການສູ້ຮົບ ແລະ ຮັບໃຊ້ສູ້ຮົບ ຕາມດຳລັດສະບັບເລກທີ 272/ລບ, ລົງວັນທີ 10 ກັນຍາ 2015. ເຈົ້າແຂວງບໍລິຄຳໄຊ ຕົກລົງເຫັນດີປະຕິບັດເງິນນະໂຍບາຍອຸດໜູນຈຳນວນເງິນ140.700.000 ກີບໃຫ້ນັກຮົບ 6 ທ່ານຢູ່ເມືອງປາກກະດິງ ທີ່ໄດ້ອຸທິດຕົນເຂົ້າໃນການປະຕິວັດຊາດປະຊາທິປະໄຕ ຈົນໄດ້ເສຍຊີວິດຍ້ອນການສູ້ຮົບ ມີ: ທ່ານບຸນສີ ສີບຸນເຮືອງ ຈຳນວນເງິນ 20.100.000 ກີບ, ທ່ານ ພົມມີ ຈຳນວນເງິນ 25.527.000 ກີບ, ທ່ານ ກອງມາ ໄຊຍະວົງ ຈຳນວນເງິນ 20.100.000 ກີບ, ທ່ານ ວັນດີ ຈຳນວນເງິນ 24.120.000 ກີບ, ທ່ານ ເຮືອງ ເມກສະຫວັນ ຈຳນວນເງິນ 26.733.000 ກີບ ແລະ ທ່ານ ກ່າໄມ ຈຳນວນເງິນ 24.120.000 ກີບ. ກ່າວມອບໂດຍທ່ານ ໂຄສາຈານ ແສນທະວີໄຊ ຮອງເຈົ້າເມືອງປາກກະດິງ ຮັບໂດຍຕາງໜ້າແຕ່ລະຄອບຄົວຂອງນັກຮົບຜູ້ເສຍສະຫຼະຊີວິດ ໂດຍມີຫ້ອງການທີ່ກ່ຽວຂ້ອງ ແລະ ຍາດຕິພີ່ນ້ອງຂອງຜູ້ໄດ້ຮັບນະໂຍບາຍ ເຂົ້າຮ່ວມເປັນສັກຂີພິຍານ.

      ພ້ອມດຽວກັນນັ້ນ ເມືອງວຽງທອງ ກໍໄດ້ປະຕິບັດນະໂຍບາຍເງິນອຸດໜູນ ໃຫ້ແກ່ຜູ້ທີ່ເສຍສະຫລະຊີວິດ ເພື່ອການປະຕິວັດຊາດ ປະຊາທິປະໄຕ ເຊັ່ນດຽວກັນ ໂດຍມີຈໍານວນພົນທີໄດ້ຮັບເງິນອຸດໜູນໃນຄັ້ງນີ້ ທັງໝົດ 21 ສະຫາຍ, ຍິງ 1 ສະຫາຍ, ລວມເປັນເງິນ ທັງໝົດ 502.841,700 ກີບ ເຊີ່ງເປັນກຽດມອບໂດຍ ທ່ານ ຄໍາມອນ ໄຊພົມມີ ຮອງເລຂາພັກເມືອງ, ຮອງເຈົ້າເມືອງວຽງທອງ.

     ມາໃນ​ວັນ​ທີ 11 ມິຖຸນາ 2019 ຢູ່​ຫ້ອງ​ປະຊຸມຫ້ອງ​ວ່າການ​ປົກຄອງ​​ເມືອງ​ປາກ​ຊັນ ຫ້ອງການ​​ແຮງ​ງານ ​ແລະ ສະຫວັດດີ​ການ-ສັງຄົມ​ເມືອງ ​ໄດ້ຈັດພິທີ​ມອບ-ຮັບ​ເງິນນະ​ໂຍບາຍ​ ໃຫ້​ຜູ້ທີ່​ມີ​ຜົນງານ ​ແລະ ຄຸນງາມຄວາມດີ​ໃນ​ພາລະກິດ​ຮັບ​ໃຊ້​ຊາດ, ອຸດ​ໜູນ​ຜູ​້ທີ່ເສຍສະຫຼະ​​ຊີວິດ​ເຂົ້າ​ໃນ​ການ​ປະຕິວັດ​ຊາດ ປະຊາທິປະ​ໄຕ ຕາມ​ດຳລັດ​ເລກທີ 272/ລບ ​ຈຳນວນ 10 ທ່ານ ​ເຊິ່ງ​​ລວມ​ເປັນ​ເງິນ​ຈຳນວນ​ທັງ​ໝົດ 226.929.000 ກີບ, ​ໃຫ້​ກຽດ​​ກ່າວ​ມອບໂດຍ ​ທ່ານ ​ແສງ​ອາ​ລຸນ ​ແສງ​ອາພອນ ຮອງ​ເຈົ້າ​ເມືອງປາກ​ຊັນ, ມີ​ບັນດາທ່ານຫົວໜ້າ​ຫ້ອງການ​ກ່ຽວຂ້ອງ ​ແລະ ຍາດຕິ​ພີ່ນ້ອງ ​ເຊິ່ງ​ເປັນ​ຕົວ​ແທນ​ຜູ້​ທີ່​ໄດ້​ຮັບ​ນະ​ໂຍບາຍ​ຄັ້ງ​ນີ້ ​ເຂົ້າ​ຮ່ວມ​ເປັນ​ສັກ​ຂີ​ພະຍານ. ​