ໃນວັນທີ 11 ມີຖຸນາ 2019 ນີ້ຢູ່ທີ່ຫ້ອງປະຊຸມຫ້ອງວ່າການປົກຄອງເມືອງຄຳເກີດ ໄດ້ຈັດພິທີຕ້ອນຮັບ ການຢ້ຽມຢາມຂອງທ່ານ ຄຳໃບ ດຳລັດ ກຳມະການສູນກາງພັກ, ຮອງປະທານສູນກາງແນວລາວສ້າງຊາດ ໃຫ້ກຽດຕ້ອນຮັບໂດຍທ່ານ ວັນວິໄລ ແດນພູຫຼວງ ຄະນະປະຈຳພັກແຂວງ, ເລຂາພັກເມືອງ, ເຈົ້າເມືອງຄຳເກີດ ພ້ອມດ້ວຍຄະນະ, ມີບັນດາຫົວໜ້າຫ້ອງການອອ້ມຂ້າງ ແລະ ນາຍບ້ານກຸ່ມເທດສະບານ ເຂົ້າຮ່ວມ.

       ທ່ານ ວັນວິໄລ ແດນພູຫຼວງ ໄດ້ລາຍງານສະພາບການຈັດຕັ້ງປະຕິບັດວຽກງານຂອງເມືອງ ແລະ ຈຸດພິເສດດ້ານທີ່ຕັ້ງຂອງເມືອງ ໂດຍຫຍໍ້ ໃຫ້ທ່ານຮອງປະທານສູນກາງແນວລາວສ້າງຊາດ ຊາບວ່າ: ເມືອງຄຳເກີດ ຕັ້ງຢູ່ທິດຕາເວັນຕົກສ່ຽງໃຕ້ ຂອງແຂວງບໍລິຄຳໄຊ ຫ່າງຈາກເທດສະບານແຂວງປະມານ 185 ກິໂລແມັດ ເປັນເຂດພູດອຍກວມ 2/3 ຂອງເນື້ອທີ່ ທັງໝົດ ການປົກຄອງໄດ້ແບ່ງອອກເປັນ 8 ກຸ່ມບ້ານພັດທະນາ ມີ 62 ບ້ານ ມີພົນລະເມືອງທັງໝົດ 72,828 ຄົນ, ຍິງ 36,735 ຄົນ, ອາຊີບຂອງພົນລະເມືອງພາຍໃນສ່ວນຫຼາຍແມ່ນຖືເອົາການຜະລິດກະສິກຳກວມ 96% , ການຄ້າ ແລະ ການບໍລິການ ກວມ 0,7 %, ເປັນເມືອງທີ່ມີຄວາມສະຫງົບໜັກແໜ້ນ, ພື້ນຖານໂຄງລ່າງ, ຮາກຖານການຜະລິດ ແລະ ເສດຖະກິດ-ສັງຄົມ ໄດ້ຮັບການພັດທະນາຢ່າງຕໍ່ເນື່ອງ, ມາຮອດປະຈຸບັນ ເມືອງຄຳເກີດແມ່ນໄດ້ຮັບການພັດທະນາກ້າວຂຶ້ນເປັນລໍາດັບ.

      ໃນການມາຢ້ຽມເມືອງຄຳເກີດ ໃນຄັ້ງນີ້ ທ່ານຮອງປະທານສູນກາງແນວລາວສ້າງຊາດ ໄດ້ໃຫ້ກຽດຂຶ້ນໂອ້ລົມ  ເຊີ່ງກ່ອນອື່ນ ທ່ານໄດ້ຍ້ອງຍໍຊົມເຊີຍຜົນງານທີ່ທາງຄະນະພັກເມືອງ ເວົ້າລວມ, ເວົ້າສະເພາະ ກໍ່ແມ່ນອົງການແນວລາວສ້າງຊາດເມືອງຍາດມາໄດ້ໃນໄລຍະຜ່ານມາ, ທ່ານໄດ້ຮຽກຮ້ອງໃຫ້ເອົາໃຈໃສ່ແກ້ໄຂປະກົດການຫຍໍ້ທໍ້ຕ່າງໆພາຍໃນເມືອງ ເພື່ອເຮັດໃຫ້ເມືອງຄຳເກີດມີຄວາມສະຫງົບ, ສືບຕໍ່ເອົາໃຈໃສ່ພັດທະນາເສດຖະກິດ-ສັງຄົມ ຂອງເມືອງໃຫ້ມີການພັດທະນາຂຶ້ນໄປເລື້ອຍໆ, ສຶກສາອົມອົບການເມືອງແນວຄິດ ໃຫ້ປະຊາຊົນບັນດາເຜົ່າ ໃຫ້ເຂົາເຈົ້າເຂົ້າໃຈຕໍ່ແນວທາງນະໂຍບາຍຂອງພັກ - ລັດ, ສືບຕໍ່ປັບປຸງອົງການຕັ້ງແນວລາວສ້າງຊາດທຸກຂັ້ນ ໃຫ້ມີຄວາມເຂັ້ມແຂງໜັກແໜ້ນຂຶ້ນໄປເລື້ອຍໆ.