​​ເພື່ອ​ເປັນ​ການ​ຊຸກ​ຍູ້ອຸ້ມ​ຊູ​ຊ່ວຍ​ເຫຼືອ​ຄອບຄົວ ​ແລະ ສຸຂະພາບ​ຂອງ​ແມ່ ​ແລະ ​ເດັກ ​ໃນ​ວັນ​ທີ 10 ມິຖຸນາ 2019 ທ່ານ ​ໄມ​ຈອມ ວັນນະ​ສານ​ຄຳ ​ເຈົ້າ​ເມືອງ​ປາກ​ຊັນ ພ້ອມ​ດ້ວຍ​ຄະນະ ​ແລະ ພາກສ່ວນ​ກ່ຽວຂ້ອງຂອງ​ເມືອງ ​ໄດ້​ໄປ​ຢ້ຽມຢາມ ພ້ອມ​ທັງ​ມອບ​ວັດຖຸ ​ແລະ ປັດ​ໃຈ ​ເປັນສ່ວນລວມ ​ແລະ ສ່ວນ​ບຸກຄົນຈຳນວນ​ໜຶ່ງ ​ໃຫ້​ແກ່​ຄອບຄົວ​ຂອງ​ທ່ານ ນາງ ລັກ ຄຸນ​ປັນຍາ ອາຍຸ 21 ປີ ​ເຊິ່ງ​ແມ່ນ​ປະຊາຊົນ ຢູ່​ບ້ານ​ນາ​ສະຫວັນ ​ເມືອງ​ປາກ​ຊັນ ​ແຂວງ​ບໍລິ​ຄຳ​ໄຊ ​ເປັນ​ຄອບ​ຄົວ​ທີ່​ຍັງ​ບໍ່​ທັນ​ໄດ້​ຫຼຸດ​ພົ້ນ​ອອກ​ຈາກ​ຄວາມທຸກ​ຫຍາ​ກ ທີ່ໄດ້​ເກີດ​ລູກ​ອອກ​ມາ​ເປັນ​ແຝດ 3 ຄົນ ​​ຍິງ 2 ຄົນ ​ແລະ ຊາຍ 1 ຄົນ, ເກີດ​ເມື່ອ​ວັນທີ 21 ພຶດສະພາ 2019 ຜ່ານ​ມາ​ນີ້​.

      ປະຈຸ​ບັນ​ ຄະນະ​ພັກ, ຄະນະ​ປົກຄອງ​ເມືອງ ພ້ອມ​ດ້ວຍ​ພາກສ່ວນ​ກ່ຽວຂ້ອງທຸກ​ຂັ້ນ ​ໄດ້​ເອົາ​ໃຈ​ໃສ່​ເປັນ​ຫ່ວງ​ເປັນ​​ໄຍ  ນຳ​ເອົາ​ວັດຖຸ ​ແລະ ປັດ​ໃຈ​ຕ່າງໆ ​ໄປ​ມອບ​ໃຫ້​ແກ່​ຄອບຄົວ​ດັ່ງກ່າວ ​ເພື່ອ​ອຸ້ມ​ຊູ​ຊ່ວຍ​ເຫຼືອ ​ແກ້​ໄຂ​ຊີວິດ​ການ​ເປັນ​ຢູ່​ຄອບຄົວ​ຂອງ​ເຂົາ​ເຈົ້າ ພ້ອມ​ທັງ​ໃຫ້ການ​ແນະນຳວິທີ​ການ, ຂັ້ນ​ຕອນ​ຂອງ​ແພດ ​ເພື່ອ​ໃຫ້​ແມ່ ​ແລະ ​ເດັກ ​ໃຫ້​ມີ​ສຸຂະພາບ​ແຂງ​ແຮງ.

     ຕໍ່​ກັບ​ເຫດການດັ່ງກ່າວນີ້ ຄະນະພັກ ອຳນາດການປົກຄອງເມືອງ ໄດ້ຮຽກຮ້ອງມາຍັງທຸກພາກສ່ວນ ແລະ ສ່ວນບຸກຄົນ ຜູ້ທີ່ຈິດໃຈໃສສັດທາ ຢາກຈະໃຫ້ການອຸ້ມຊູຊ່ວຍເຫລືອຄອບຄົວດັ່ງກ່າວ ກໍ່ສາມາດເຂົ້າມາຊ່ວຍເຫລືອດ້ວຍຕົວເອງໄດ້ .