ງານສະເຫຼີມສະຫຼອງວັນສິ່ງແວດລ້ອມໂລກ ຄົບຮອບ 47 ປີ ແລະ ວັນສິ່ງແວດລ້ອມແຫ່ງຊາດ ຄົບຮອບ 20 ປີ ພາຍໄຕ້ຄຳຂວັນ " ຫຼຸດຜ່ອນມົນລະພິດທາງອາກາດ ເພື່ອສຸຂະພາບຂອງພວກເຮົາ Beat Air Pollution " ໄດ້ຈັດຂຶ້ນໃນຕອນເຊົ້າຂອງວັນທີ 5 ມິຖຸນາ 2019 ຢູ່ທີ່ເດີ່ນກິລາເປຕັງແຂວງ, ໂດຍໃຫ້ກຽດເຂົ້າຮ່ວມຂອງທ່ານ ບຸນມາ ບຸຈະເລີນ ຮອງເຈົ້າແຂວງບໍລິຄຳໄຊ, ມີບັນດານັກກິລາຈາກພະແນກການອ້ອມຂ້າງແຂວງ ພ້ອມນັກຮຽນ-ນັກສຶກສາ ເຂົ້າຮ່ວມຢ່າງເປັນຂະບວນຟົດຟື້້ນ.

    ໃນພິທີ ຜູ້ເຂົ້າຮ່ວມຍັງໄດ້ຮັບຟັງ ບົດປາໄສວັນສິ່ງແວດລ້ອມໂລກ 5 ມິຖຸນາ ວ່າ: ເມື່ອກ້າວເຂົ້າຊຸມປີ 1789 ເປັນຕົ້ນມາ ສັງຄົມອຸດສະຫະກຳ ໄດ້ມີການຂະຫຍາຍຕົວ ເຊິ່ງໄດ້ມີການທຳລາຍຊັບພະຍາກອນທຳມະຊາດ ແລະ ປ່າໄມ້ຢ່າງຫຼວງຫຼາຍ ເຮັດໃຫ້ສະພາບການຂອງໂລກເລີ່ມມີການປ່ຽນແປງ, ຊັ້ນບັນຍາກາດບໍ່ມີສະຖຽນລະພາບ ແລະ ໂລກຮ້ອນຂຶ້ນຢ່າງລຽນຕິດ ພ້ອມດຽວກັນ ປະຊາກອນຂອງໂລກກໍ່ເພີ່ມຂຶ້ນຢ່າງໄວວາ ສິ່ງເສດເຫຼືອກໍ່ເພີ່ມຂຶ້ນ ໂຮງງານອຸດສາຫະກຳນຳໃຊ້ສານເຄມີເຂົ້າໃນຂະບວນການຜະລິດ ເຮັດໃຫ້ມີໂລກລະບາດ ແລະ ປະຊາຊົນພົບຄວາມທຸກຍາກ. ຍ້ອນເຫັນໄດ້ເຖີງຜົນກະທົບທີ່ເກີດຂຶ້ນດັ່ງກ່າວ ມາຮອດວັນທີ 5 ມິຖຸນາ 1972 ຈຶ່ງໄດ້ມີກອງປະຊຸມສຸດຍອດຂອງມວນມະນຸດ ຢູ່ທີ່ ສະຕ໋ອກໂຮມ ປະເທດສະວິເດນ ເຊິ່ງໃນກອງປະຊຸມດັ່ງກ່າວ ໄດ້ຕົກລົງເອົາວຽກງານສິ່ງແວດລ້ອມມາຄົ້ນຄ້ວາ ແລະ ໃຫ້ມີການຫ້າງຫາກະກຽມມາດຕະການແກ້ໄຂ ແລະ ເອົາໃຈໃສ່ຕໍ່ກັບບັນຫາສິ່ງແວດລ້ອມ ໃຫ້ມີ​ຄວາມ​ສົມ​ດຸນ ແລະ ຢ່າງ​ຍືນ​ຍົງ ໄປສົມຄູ່ກັບການພັດທະນາ​ເສດ​ຖະກິດ​ສັງຄົມ, ສະນັ້ນ ຈຶ່ງໄດ້ຖືເອົາ ວັນທີ 5 ມິຖຸນາຂອງທຸກໆປີ ເປັນວັນສິ່ງແວດລ້ອມໂລກຈົນເຖິງປັດຈຸບັນ. ເຊັ່ນດຽວກັນກັບ ມະຕິກອງປະຊຸມໃຫ່ຍຄັ້ງທີ X ຂອງພັກປະຊາຊົນປະຕິວັດລາວ ກໍ່ຄືການຈັດຕັ້ງປະຕິບັດເປົ້າໝາຍໃຫຍ່ຂອງແຜ່ນພັດທະນາເສດຖະກິດ - ສັງຄົມ 5 ປີ ຄັ້ງທີ VIII ຮອດປີ 2020 ຄື: ຕ້ອງບັນລຸເຮັດໃຫ້ເສດຖະກິດແຫ່ງຊາດ ມີການເຕີບໂຕຢ່າງຕໍ່ເນື່ອງ, ໝັ້ນທ່ຽງ ແລະ ສົມດຸນ ເພີ່ມທະວີການພັດທະນາຊັບພະຍາກອນມະນຸດ ແລະ ຍົກລະດັບຄວາມສາມາດຂອງບຸກຄະລາກອນຈາກພາກລັດ ແລະ ກຳລັງແຮງງານຈາກພາກສ່ວນເອກະຊົນ ແລະ ຊັບພະຍາກອນທຳມະຊາດ ແລະ ສິ່ງແວດລ້ອມໄດ້ຮັບການປົກປັກຮັກສາ ແລະ ນຳໃຊ້ຢ່າງມີປະສິດທິຜົນ ຕາມທິດສີຂຽວ ແລະ ຍືນຍົງ.

      ຈາກນັ້ນ ກໍໄດ້ມີກິດຈະກຳການແຂ່ງຂັນກິລາເປຕັງ ເຊິ່ງມີທີມເຂົ້າຮ່ວມຈຳນວນ  50 ທີມ ໃນນັ້ນ ທີມອາວຸໂສ 12 ທີມ, ຊາຍທົ່ວໄປ 24 ທີມ ແລະ ຍິງ 14 ທີມ. ຜ່ານການແຂ່ງຂັນມາເປັນລາ 1 ວັນເຕັມ ສາມາດສະຫຼຸບໄດ້ ດັ່ງນີ້: ຊະນະເລີດປະເພດທີມອາວຸໂສ ໄດ້ແກ່ ປກສ ແຂວງ, ອັນດັບ 2 ພະແນກສາທາແຂວງ, ອັນດັບ 3 ຮ່ວມ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ທີມ ( 1 ) ແລະ ( 2 ), ປະເພດຊາຍທົ່ວໄປ ອັນດັບ 1 ໄດ້ແກ່ ພະແນກອຸດສາຫະກຳ ແລະ ການຄ້າແຂວງ, ອັນດັບ 2 ທີມແອັດໄວ້ ບໍລິຄຳໄຊ, ອັນດັບ 3 ຮ່ວມ ທີມຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງບໍລິຄັນ ແລະ ປກສ ແຂວງ, ປະເພດທີມຍິງ ອັນດັບ 1 ໄດ້ແກ່ ທີມວິທະຍາໄລ ພຽນຈະເລີນ, ອັນດັບ 2 ທີມ ປກສ ແຂວງ, ອັນດັບ 3 ຮ່ວມ ທີມ ສາມສ່ຽວ ແລະ ທີມພະແນກຍຸຕິທຳແຂວງ. ສຳລັບລາງວັນແຕ່ລະປະເພດ ອັນດັບ 1 ໄດ້ຮັບຂັນ 1 ໜ່ວຍພ້ອມເງິນສົດ 5 ແສນກີບ, ອັນດັບ 2 ໄດ້ຮັບຂັນ 1 ໜ່ວຍ ພ້ອມເງິນສົດ 4 ແສນກີບ ແລະ ອັນດັບ 3 ( ຮ່ວມ ) ຮັບເງິນສົດ 3 ແສນກີບ.