ພິມ
ໝວດ: ຂ່າວປະຈຳວັນ.
ກົດເບິ່ງ: 208

          ໃນລະຫວ່າງ ວັນທີ 5-6 ມິຖຸນາ 2019 ນີ້ ຢູ່ທີ່ສະໂມສອນໃຫຍ່ ກອງບັນຊາການ ປກສ ແຂວງ ບໍລິຄໍາໄຊ ໄດ້ຈັດກອງປະຊຸມເປີດກ້ວາງຄົບຄະນະບໍລິຫານງານພັກກອງບັນຊາການ ປກສ ແຂວງ ຄັ້ງທີ VIII ສະໄໝທີ II ຂຶ້ນຢ່າງເປັນທາງການ ໂດຍການເປັນປະທານຂອງ ສະຫາຍ ພັນເອກ ທອງໃບ ລໍວັນໄຊ ກໍາມະການພັກແຂວງ, ເລຂາຄະນະພັກ, ຫົວໜ້າກອງບັນຊາການ ປກສ ແຂວງ, ເປັນກຽດເຂົ້າຮ່ວມຂອງ ສະຫາຍ ບຸນມາ ບຸຈະເລີນ  ຮອງເລຂາພັກແຂວງ, ຮອງເຈົ້າແຂວງບໍລິຄໍາໄຊ, ມີຄະນະພັກກອງບັນຊາການ, ເລຂາຄະນະພັກຮາກຖານ, ໜ່ວຍພັກຮາກຖານ, ຮາກຖານພັກບັນດາ ປກສ ເມືອງ 07 ຕົວເມືອງ, ຕະຫຼອດຮອດອົງການຈັດຕັ້ງມະຫາຊົນ ເຂົ້າຮ່ວມ.

          ສະຫາຍ ພັນໂທ ຄໍາແພງ ນໍາພາວັນ ຄະນະພັກ, ຮອງຫົວໜ້າກອງບັນຊາການ ປກສ ແຂວງ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດມະຕິກອງປະຊຸມເປີດກ້ວາງຄົບຄະນະບໍລິຫານງານພັກ ກອງບັນຊາການ ປກສ ແຂວງ ຄັ້ງທີ VIII ສະໄໝທີ II ແລະ ທິດທາງແຜນການໃນ 03 ເດືອນຕໍ່ໜ້າ ພ້ອມທັງບົດສໍາຫຼວດການນໍາພາຂອງຄະນະພັກກອງບັນຊາການ ປກສ ແຂວງ ໃນໄລຍະ 03 ເດືອນຜ່ານມາ ວ່າ: ຄະນະບໍລິຫານງານພັກ ກອງບັນຊາການ ປກສ ແຂວງ ໄດ້ຕັ້ງໜ້ານໍາເອົາແນວທາງນະໂຍບາຍຂອງພັກ, ມະຕິຄໍາສັ່ງຂອງຂັ້ນເທິງມາເຊື່ອມຊືມເປັນປົກະຕິ ແລະ ນໍາພາຈັດຕັ້ງປະຕິບັດໃນພຶດຕິກໍາຕົວຈິງໃນຂົງເຂດວຽກງານຢ່າງກ້ວາງຂວາງ ແລະ ໄດ້ຖືເອົາການສຶກສາອົບຮົມທາງດ້ານການເມືອງ-ແນວຄິດໃຫ້ແກ່ສະມາຊິກພັກ-ພະນັກງານເປັນຫຼັກ ເພື່ອສ້າງໃຫ້ພະນັກງານ-ນັກຮົບ ມີຄວາມອຸ່ນອຽນທຸ່ນທ່ຽງ ເຊື່ອໝັ້ນຕໍ່ການນໍາພາຂອງພັກຢ່າງໜັກແໜ້ນ, ໄດ້ເອົາໃຈໃສ່ນໍາພາປັບປຸງການຈັດຕັ້ງຂອງພັກໃຫ້ປອດໃສ, ເຂັ້ມແຂງ, ໜັກແໜ້ນ, ເປັນເຈົ້າການເຕົ້າໂຮມຄວາມສາມັກຄີພາຍໃນຄະນະພັກຢ່າງແໜ້ນແຟ້ນ ແລະ ສອດຄ່ອງຕາມ 05 ຫຼັກການ ແລະ 03 ທິດນໍາຂອງພັກ, ໄດ້ຂະຫຍາຍມະຫາຊົນກ້າວໜ້າເຂົ້າສະມາຊິກພັກ ໄດ້ ຈໍານວນ 28 ສະຫາຍ ຍິງ 03 ສະຫາຍ. 

     ທີ່ປະຊຸມ ຍັງໄດ້ຮັບຟັງການເຜີຍແຜ່ເອກະສານຈາກຄະນະພັກກອງບັນຊາການ ແລະ ຄະນະພັກຮາກຖານຫ້ອງການເມືອງ ໃນນັ້ນມີ: ຂໍ້ຕົກລົງຂອງລັດຖະມົນຕີ ກະຊວງປ້ອງກັນຄວາມສະຫງົບ ເລກທີ 564/ປກສ, ລົງວັນທີ 03 ເມສາ 2019 ວ່າດ້ວຍຂໍ້ຫ້າມຕໍ່ນາຍ ແລະ ພົນຕໍາຫຼວດ, ຂໍ້ຕົກລົງ ເລກທີ 758/ປກສ, ລົງວັນທີ່ 30 ເມສາ 2019 ວ່າດ້ວຍການປະຕິບັດນະໂຍບາຍເລື່ອນຊັ້ນ, ດັດແປງຊັ້ນໃຫ້ນາຍ ແລະ ພົນຕໍາຫຼວດ ທີ່ໄປສຶກສາຮໍ່າຮຽນວິຊາສະເພາະຢູ່ພາຍໃນ ແລະ ຕ່າງປະເທດ, ແຈ້ງການຂອງກົມໃຫຍ່ການເມືອງ ເລກທີ 1001 /ກມປສ, ລົງວັນທີ 18 ມີນາ 2019 ເລື່ອງການຍົກສະຖານະໂຮງຮຽນ ປກສ ຊັ້ນກາງ ຂຶ້ນເປັນໂຮງຮຽນ ປກສ ຊັ້ນສູງ, ມະຕິຕົກລົງຂອງຄະນະປະຈໍາພັກແຂວງ ເລກທີ 29/ຄປພ.ຂບຊ, ວ່າດ້ວຍການແບ່ງປັນຈໍານວນຜູ້ແທນສົມບູນ ແລະ ສໍາຮອງໃຫ້ອົງຄະນະພັກເມືອງ, ຄະນະພັກກອງບັນຊາການ ປກຊ-ປກສ ແຂວງ ແລະ ຮາກຖານພັກອ້ອມຂ້າງແຂວງ ເພື່ອເຂົ້າຮ່ວມກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ ບໍລິຄໍາໄຊ, ບົດແນະນໍາຂອງຄະນະອານຸກໍາມະການບຸກຄະລາກອນຂັ້ນແຂວງ ກ່ຽວກັບການປ່ອນບັດເລືອກເອົາຜູ້ແທນສົມບູນ ແລະ ສໍາຮອງໄປຮ່ວມກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ ປີ 2020, ນອກນັ້ນ ຍັງໄດ້ຜ່ານມະຕິກຕົກລົງຂອງຄະນະປະຈໍາພັກກອງບັນຊາການ ປກສ ແຂວງ ວ່າດ້ວຍການສ້າງຕັ້ງຮາກຖານພັກ, ໜ່ວຍພັກຂຶ້ນກັບກອງພັນປ້ອງກັນເຄື່ອນທີ່ 208, ຈາກນັ້ນຜູ້ເຂົ້າຮ່ວມກອງປະຊຸມກໍ່ໄດ້ຜັດປ່ຽນກັນຂື້ນປະກອບຄໍາຄິດ, ຄໍາເຫັນໃສ່ບົດສະຫຼຸບ, ທິດທາງແຜ່ນການ ແລະ ຄໍາຖາມເຈາະຈີ້ມຈາກທ່ານປະທານຢ່າງກົງໄປກົງມາ ເພື່ອເປັນເອກະພາບກັນນໍາໄປຈັດຕັ້ງປະຕິບັດ. 

    ໂອກາດດຽວກັນ ຍັງໄດ້ຈັດພິທີປະກາດເລື່ອນຊັ້ນ ແລະ ປະດັບຊັ້ນໃຫ້ນາຍຕໍາຫຼວດທົ່ວກອງບັນຊາການ ປກສ ແຂວງ ບໍລິຄໍາໄຊ ໃນນີ້ ເລື່ອນຊັ້ນ ພັນຕີ ຂຶ້ນຊັ້ນ ພັນໂທ ຈໍານວນ 44 ສະຫາຍ, ຍິງ 02 ສະຫາຍ, ຮ້ອຍເອກ ຂຶ້ນຊັ້ນ ພັນຕີ ຈໍານວນ 42 ສະຫາຍ, ຍິງ 05 ສະຫາຍ, ຮ້ອຍໂທ ຂຶ້ນຊັ້ນ ຮ້ອຍເອກ 68 ສະຫາຍ ຍິງ 11 ສະຫາຍ, ໃຫ້ກຽດຂຶ້ນປະດັບຊັ້ນໂດຍ ສະຫາຍ ພັນເອກ ທອງໃບ ລໍວັນໄຊ.