ໃນວັນທີ 7 ມີຖຸນາ 2019 ຢູ່ຫ້ອງການບ້ານ ສົບນາ, ເມືອງ ວຽງທອງ, ແຂວງ ບໍລິຄໍາໄຊ ໄດ້ຈັດກອງປະຊຸມດໍາເນີນການຈັດຕັ້ງປະຕິບັດແກ້ໄຂ, ສະກັດກັ້ນ ແລະ ຕ້ານການແຜ່ລະບາດຂອງຢາເສບຕິດ ປະເພດ(ຢາບ້າ) ໂດຍເປັນກຽດເຂົ້າຮ່ວມຂອງ ທ່ານ ຄໍາມອນ ໄຊພົມມີ ຮອງເລຂາພັກເມືອງ, ຮອງເຈົ້າເມືອງວຽງທອງ, ມີບັນດາຫົວໜ້າຫ້ອງການທີ່ກ່ຽວຂ້ອງ, ພະນັກງານກໍ່ສ້າງຮາກຖານຂອງແຂວງປະຈໍາເມືອງ, ຄະນະຮັບຜິດຊອບ ປກສ ແກ້ໄຂບັນຫາຢາເສບຕິດ, ອໍານາດການປົກຄອງບ້ານ, ພໍ່ແມ່ປະຊາຊົນ ຕະຫຼອດຮອດຊາວໜຸ່ມພາຍໃນບ້ານເຂົ້າຮ່ວມ.

     ໃນພິທີ ທ່ານ ຮ.ອ ຄໍາພວຍ ກໍເພັງນະວົງ ໄດ້ໃຫ້ກຽດຜ່ານແຜນດໍາເນີນງານຂອງການຈັດຕັ້ງປະຕິບັດແກ້ໄຂ, ສະກັດກັ້ນ ແລະ ຕ້ານການແຜ່ລະບາດຂອງຢາເສບຕິດປະເພດຢາບ້າ ເຊີ່ງທ່ານໄດ້ຍົກໃຫ້ຮູ້ ແລະ ເຂົ້າໃຈກ່ຽວກັບທີ່ມາ ແລະ ຜົນຮ້າຍຂອງຢາເສບຕິດ, ກໍາໄດ້ເລ່ລ່ຽມກົນອຸບາຍວິທີລັກລອບຂົນສົ່ງ, ຊື້-ຂາຍ, ມີໄວ້ໃນຄອບຄອງຂອງກຸ່ມຄົນບໍ່ຫວັງດີ, ແນໃສ່ເປົ້າໝາຍຄ້າ-ຂາຍ, ຂົນສົ່ງ, ເສບຢາເສບຕິດ, ມີໄວ້ໃນຄອບຄອງ, ປຸກລະດົມທຸກກໍາລັງແຮງທາງດ້ານຄວາມຮູ້-ຄວາມສາມາດໃນການສະກັດກັ້ນຢາເສບຕິດໃຫ້ເຂັ້ມງວດ, ສຶກສາອົມບັນດາເປົ້າໝາຍຕ່າງໆໃຫ້ເຊື່ອມຊືມເຂົ້າໃຈ ແລະ ຍອມຮັບສາລະພາບຄວາມຈິງຂອງຕົນ ເພື່ອຢຸດເຊົາການເຄື່ອນໄຫວທີ່ຕິດພັນກັບບັນຫາຢາເສບຕິດ ພ້ອມທັງຮ່ວມມືກັບເຈົ້າໜ້າທີ່ ໃນການຕ້ານ ແລະ ສະກັດກັ້ນຢາເສບຕິດໃຫ້ຫຼຸດລົງ,  ຂຶ້ນບັນຊີເປົ້າໝາຍປະເພດຕ່າງໆເພື່ອວິເຄາະ, ວິໄຈ ໄຈ້ແຍກ, ແບ່ງຂັ້ນຄຸ້ມຄອງ ແລະ ຕິດຕາມຢ່າງລະອຽດ.

     ກອງປະຊຸມ ຍັງໄດ້ຜ່ານບາງມາດຕາຂອງກົດໝາຍ ວ່າດ້ວຍອາຍາ ທີ່ກ່ຽວພັນກັບຢາເສບຕິດ ເປັນຕົ້ນແມ່ນມາດຕາ 146, ພ້ອມທັງອະທິບາຍຜົນຮ້າຍຂອງຢາເສບຕິດ. ໃນພິທີບັນດາຜູ້ເຂົ້າຮ່ວມໄດ້ປະກອບຄໍາຄິດເຫັນກ່ຽວກັບຢາເສບຕິດຢ່າງກົງໄປກົງມາ ເພື່ອເຮັດໃຫ້ບັນດາເປົ້າໝາຍເຂົ້າໃຈ ແລະ ຮ່ວມມືໃນການປະຕິບັດແຜນການແກ້ໄຂ ແລະ ຕ້ານ, ສະກັດກັ້ນຢາເສບຕິດໃນຄັ້ງນີ້ໃຫ້ໄດ້ຮັບຜົນດີ.