ເພື່ອເປັນການປະກອບສ່ວນ ຕາມແຜນພັດທະນາເສດຖະກິດ-ສັງຄົມ ຂອງແຂວງບໍລິຄຳໄຊ ໂດຍສະເພາະດ້ານການສຶກສາທິການ ແລະ ກິລາ ເຮັດໃຫ້ອັດຕາເຂົ້າຮຽນສຸດທີຊັ້ນປະຖົມຢູ່ແຂວງ ບັນລຸໃຫ້ໄດ້ 100%. ມາໃນວັນທີ 7 ມິຖຸນາ 2019 ຢູ່ໂຮງຮຽນອະນຸບານ ບ້ານສີສະອາດ ເມືອງປາກຊັນ ແຂວງບໍລິຄຳໄຊ ໄດ້ຈັດພິທີມອບ-ຮັບໂຮງຮຽນອະນຸບານ ບ້ານສີສະອາດ ກ່າວມອບໂດຍທ່ານ ໄຊຍະເພັດ ຈັນທິສອນ ອຳນວຍການໂຮງງານ ອຸດສາຫະກຳ ses ຈຳກັດ ແລະ ຜະລິດໝໍ້ແປງຍີ່ຫໍ້ sk ແລະ ກ່າວຮັບໂດຍທ່ານ ຄຳປານ ໂສພາ ເລຂາພັກບ້ານ ນາຍບ້ານສີສະອາດ. ໂດຍການໃຫ້ກຽດເຂົ້າຮ່ວມເປັນສັກຂີພິຍານຂອງທ່ານ ບຸນມາ ບຸຈະເລີນ ຮອງເຈົ້າແຂວງບໍລິຄຳໄຊ, ມີທ່ານເຈົ້າເມືອງປາກຊັນ, ບັນດາທ່ານຕາງໜ້າພະແນກການອ້ອມຂ້າງແຂວງ, ຄູ-ອາຈານ ພ້ອມດ້ວຍນັກຮຽນ ພາຍໃນໂຮງຮຽນ ຕະຫຼອດຮອດຜູ້ປົກຄອງນັກຮຽນ ເຂົ້າຮ່ວມ.

          ອາຄານໂຮງຮຽນອະນຸບານ ດັ່ງກ່າວນີ້ ແມ່ນຕັ້ງຢູ່ໂຮງຮຽນ ປະຖົມສົມບູນບ້ານສີສະອາດ ເມືອງປາກຊັນ ແຂວງບໍລິຄຳໄຊ ເຊິ່ງໄດ້ເລີ່ມຕົ້ນກໍ່ສ້າງແຕ່ເດືອນ ພະຈິກ 2018 ແລະ ສຳເລັດ 100% ໃນເດືອນ ມັງກອນ 2019 ມີຂະໜາດ 22 x 8 ມ. ປະກອບມີ 3 ຫ້ອງຮຽນ, 1 ຫ້ອງຄົວ ຂະໜາດ 3 x 6 ມ ແລະ 1 ຫ້ອງນ້ຳ, ເປັນອາຄານຊັ້ນດຽວ ເສົາເບຕົງ, ໂຄງເຫຼັກ, ມຸງດ້ວຍແຜນອາລູຊີ້ງ, ເພດານພາຍໃນແຜ່ນຍິບຊຳ, ເພດານພາຍນອກແຜ່ນອາລູຊີ້ງຮ່ອງນ້ອຍ ມີລະບົບໄຟຟ້າ ແລະ ນ້ຳປະປາຄົບຊຸດ ລວມມູນຄ່າກໍ່ສ້າງທັງໝົດ 194.540.000 ກີບ. ເຊິ່ງເງິນດັ່ງກ່າວ ແມ່ນໄດ້ມາຈາກຜູ້ສົມທົບທຶນ ຄື: ທ່ານ ໄຊຍະເພັດ ຈັນທິສອນ, ອຳນາດການປົກຄອງບ້ານ ແລະ ພໍ່ແມ່ປະຊາຊົນບ້ານທ່າສີໄຄ, ທ່ານ ຕົງເສີນ, ທ່ານ ເລື່ອນຄຳ + ນາງ ອານຸສອນ ພິມມະສອນ, ທ່ານ ມີໄຊ ຖະໜອມສິນ, ທ່ານ ຄຳເພັດ ໄກຍະສາດ, ທ່ານ ທະນູສອນ ຫຼວງລາດບັນດິດ, ທ່ານ ບຸນຍູ້ + ນາງ ທອງເພັດ ແລະ ທ່ານ ສົມສັກ + ນາງ ອານຸລັກ.

          ໃນພິທີ ຍັງໄດ້ຜ່ານຂໍ້ຕົກລົງຂອງທ່ານເຈົ້າແຂວງບໍລິຄຳໄຊ ເລກທີ 487/ຂບຊ ລົງວັນທີ 11 ກໍລະກົດ 2018 ວ່າດ້ວຍການຍ້ອງຍໍສັນລະເສີນໃຫ້ກົມກອງ ແລະ ບຸກຄົນ ທີ່ມີຜົນງານປະກອບສ່ວນສ້າງສາ ແລະ ພັດທະນາແຂວງບໍລິຄຳໄຊ ຄືໃບກຽດຕິຄຸນຈຳນວນ 3 ທ່ານ, ໃບຍ້ອງຍໍ 1 ກົມກອງ ແລະ ໃບຊົມເຊີຍ 5 ທ່ານ.