ໃນວັນທີ 7 ມິຖຸນາ 2019 ຢູ່ເດີ່ນຫ້ອງວ່າການປົກຄອງເມືອງໄຊຈໍາພອນ ໄດ້ຈັດພິທີສະເຫຼີມສະຫຼອງວັນເດັກນ້ອຍສາກົນ 1 ມິຖຸນາຂຶ້ນ ໂດຍເປັນກຽດເຂົ້າຮ່ວມຂອງ ທ່ານ ຄໍາພັດ ສຸລິຂັນ ວ່າການເລຂາພັກເມືອງ ເຈົ້າເມືອງໄຊຈໍາພອນ ມີການນໍາຂອງເມືອງ, ພະນັກງານລັດຖະກອນ, ອໍານາດການປົກຄອງບ້ານ, ພໍ່ເເມ່ປະຊາຊົນ, ຫຼານນ້ອຍໂຮງຮຽນອານຸບານ ແລະ ໂຮງຮຽນປະຖົມສົມບູນໂພນສີເຂົ້າຮ່ວມ.

      ໂອກ່າດນີ້ ທ່ານ ນາງ ສີລາວັນ ແສງໄມພອນ ປະທານສະຫະພັນເເມ່ຍິງເມືອງ ໄດ້ຂຶ້ນຜ່ານປະຫວັດ ແລະ ຄວາມເປັນມາຂອງວັນເດັກນ້ອຍສາກົນ ໂດຍຍົກໃຫ້ເຫັນວ່າວັນທີ 1 ມິຖຸນາ ແມ່ນເລີ່ມໃນປີ 1924 ເມື່ອກອງປະຊຸມສະມັດຊາໃຫ່ຍຂອງສັນຍານີບາດນາໆຊາດ ໃນວັນທີ 16 ມິຖຸນາ 1925 ໄດ້ຮັບຮອງເອົາຖະເເຫຼງການເຊີເເນວກ່ຽວກັບສິດທິເດັກ, ເດັກມີຄວາມຕ້ອງການໃຫ້ມີການປ້ອງກັນ ແລະ ດູເເລເບິ່ງເເຍງເປັນພິເສດ ເພື່ອຄວາມເປັນຢູ່ທີ່ດີຂອງເດັກ, ຄັ້ງທໍາອິດເຊິ່ງໄດ້ຈັດຂຶ້ນຢູ່ທີ່ເຊີເເນວ ປະເທດເຊີວິດເຊີເເລນ ໄດ້ປະກາດເອົາວັນທີ 1 ມິຖຸນາ ວັນເດັກນ້ອຍສາກົນ ເເລະ ໄດ້ສະເຫຼີມສະຫຼອງຢູ່ໃນຫຼາຍໆປະເທດໃນໂລກ ຍ້ອນເຫັນຄວາມສໍາຄັນຂອງວັນເດັກ, ເດັກນ້ອຍຄືຜູ້ໃຫ່ຍໃນວັນໜ້າ, ເດັກນ້ອຍຄືໜໍ່ເເໜງອານາຄົດຂອງຊາດ ຜູ້ທີ່ຈະມາສືບຕໍ່ພະລະກິດປົກປັກຮັກສາ ແລະ ສ້າງສາພັດທະນາປະເທດຊາດບ້ານເມືອງ ໃຫ້ຈະເລີນຮຸ່ງເຮືອງຂຶ້ນເລື້ອຍໆ. ການສະເຫຼີມສະຫຼອງວັນເດັກນ້ອຍສາກົນເເຕ່ລະປີນັ້ນ ເປັນໂອກາດທີ່ດີໃຫ້ຫຼານນ້ອຍໄດ້ພົບປະໜູ່ເພື່ອນ ກ້າຄິດກ້າສະເເດງອອກປະກອບສ່ວນໃນວຽກງານຕ່າງໆ. ການສະເຫຼີມສະຫຼອງວັນເດັກນ້ອຍປີນີ້ ຍັງໄດ້ຮັບຊົມການສະເເດງສິນລະປະ ຂອງຫຼານນ້ອຍມາຈາກໂຮງຮຽນອານຸບານ ແລະ ບົດລະຄອນສັ້ນ ຂອງຫຼານນ້ອຍໂຮງຮຽນປະຖົມສົມບູນບ້ານໂພນສີ ແລະ ກິດຈະກໍາອື່ນໆ. ຫຼັງຈາກນັ້ນການນໍາຂັ້ນເມືອງ ແລະ ແຂກຖືກເຊີກທຸກພາກສ່ວນ ກໍ່ໄດ້ພ້ອມກັນຍາຍຂອງຂວັນ ແລະ ເຂົ້າໜົມໃຫ້ເເກ້ຫຼານນ້ອຍທີ່ມາຮ່ວມໃນງານ ຢ່າງມີບັນຢາການຟົດຟື້ນເຕັມໄປດ້ວຍຄວາມໝາຍຄວາມສໍາຄັນ.