ເພື່ອຍົກລະດັບທັກສະນະການບໍລິການລູກຄ້າ ເຊັ່ນ: ການຕ້ອນຮັບ, ການບໍລິການອາຫານ ແລະ ເຄື່ອງດື່ມ, ການກຽມຫ້ອງພັກໃຫ້ແກ່ຫົວໜ່ວຍທຸລະກິດໂຮງໂຮມຂະໜາດນ້ອຍ, ເຮືອນພັກ ແລະ ຮ້ານອາຫານ ໃຫ້ສາມາດຕອບສະໜອງຄວາມຕ້ອງການ ແລະ ສ້າງຄວາມປະທັບໃຈກັບນັກທ່ອງທ່ຽວ ມາໃນວັນທີ 15 ພຶດສະພາ 2019 ນີ້ ຢູ່ທີ່ສູນວັດທະນະທຳເດັກ ເມືອງຄຳເກີດ ແຂວງບໍລິຄຳໄຊ ໄດ້ເປີດຝຶກອົບຮົມວິທີປະຕິບັດທີ່ດີສຳລັບຜູ້ບໍລິຫານໂຮງແຮມຂະໜາດນ້ອຍ, ເຮືອນພັກ ແລະ ຮ້ານອາຫານຂຶ້ນ ໃຫ້ກຽດເຂົ້າຮ່ວມເປັນປະທານໂດຍ ທ່ານ ອຸດອນ ສອນສຸລີນ ຄະນະພະແນກຖະແຫລງຂ່າວວັດທະນະທຳ ແລະ ທ່ອງທ່ຽວແຂວງບໍລິຄຳໄຊ, ທ່ານ ເຂັມພອນ ປັນຍານຸວົງ ຫົວໜ້າຫ້ອງການຖະແຫລງຂ່າວ, ວັດທະນະທຳ ແລະ ທ່ອງທ່ຽວ ເມືອງຄຳເກີດ, ມີສຳມະນາກອນທີ່ເຮັດວຽກງານປະກອບການໂຮງແຮມຂະໜາດນ້ອຍ, ເຮືອນພັກ ແລະ ຮ້ານອາຫານ ທົ່ວເມືອງ ເຂົ້າຮ່ວມ.

   ການຝຶກຄັ້ງນີ້ ມີຄູ-ອາຈານທັງໝົດ 11 ທ່ານ ໃນນັ້ນ ມາຈາກສະຖາບັນຊື່ມວນຊົນ, ວັດທະນາທຳ ແລະ ທ່ອງທ່ຽວ 5 ທ່ານ, ຈາກພະແນກ ຖວທ ແຂວງ 2 ທ່ານ ແລະ ຈາກ ຖວທ ເມືອງ 4 ທ່ານ, ມີສຳມະນາກອນທັງໝົດ 53 ທ່ານ ຍິງ 36 ທ່ານ ຈາກພາກສ່ວນລັດ ຈຳນວນ 12 ທ່ານ ແລະ ຈາກພາກສ່ວນທຸລະກິດໂຮງແຮມ  6 ທ່ານ, ເຮືອນພັກ 9 ທ່ານ ແລະ ຮ້ານອາຫານ-ຮ້ານກິນດື່ມ 26 ທ່ານ, ການຝຶກອົບຮົມໃນຄັ້ງນີ້ ໄດ້ດຳເນີນເປັນເວລາ 3 ວັນ ໂດຍມີເນື້ອໃນການຝຶກ ຄື: ທັກສະດ້ານການຕ້ອນຮັບ, ທັກສະດ້ານການບໍລິການອາຫານ - ເຄື່ອງດື່ມ ແລະ ທັກສະດ້ານປະຕິບັດວິຊາແມ່ເຮືອນ.

    ພາຍຫລັງສຳເລັດການຝຶກແລ້ວ ກໍ່ໄດ້ມອບໃບຢັ້ງຢືນໃຫ້ແກ່ສຳມະນາກອນຈຳນວນ 50 ທ່ານ ຍິງ 33 ທ່ານ ໃຫ້ກຽດຂຶ້ນມອບໃບຢັ້ງຢືນໃນຄັ້ງນີ້ ໂດຍ ທ່ານ ອຸດອນ ສອນສຸລີນ ຄະນະພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງບໍລິຄຳໄຊ ແລະ ທ່ານຍັງໄດ້ໂອ້ລົມຕໍ່ພິທີ ເຊີ່ງກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຄະນະຮັບຜິດຊອບ ທີ່ໄດ້ເອົາໃຈໃສ່ສິດສອນ, ສືກສາ ແລະ ບັນດາສໍາມະນາກອນ ທີ່ມີຜົນສຳເລັດໃນການຝຶກອົບຮົມໃນຄັ້ງນີ້, ທ່ານໄດ້ຮຽກຮ້ອງໃຫ້ສຳມະນາກອນ ຈົ່ງນຳເອົາບົດຮຽນທີ່ໄດ້ສຶກສາຮໍ່າຮຽນ ແລະ ນຳເອົາຄວາມຮູ້ທີ່ໄດ້ຮໍ່າຮຽນມາ ໄປໜຸນໃຊ້ໃນຊີວິດປະຈຳວັນ ເພື່ອເຮັດໃຫ້ສາມາດຕອບສະໜອງຄວາມຕ້ອງການ ແລະ ສ້າງຄວາມປະທັບໃຈກັບນັກທ່ອງທ່ຽວ ທີ່ມາໃຊ້ບໍລິການ ແລະ ມາທ່ຽວຊົມເມືອງຄຳເກີດ ເພື່ອໃຫ້ເຂົາເຈົ້າໄດ້ກັບມາທ່ຽວ ແລະ ໃຊ້ບໍລິການອີກຄັ້ງ.