ກອງປະຊຸມໃຫຍ່ຄັ້ງທີ VII ຂອງຜູ້ແທນແມ່ຍິງເມືອງປາກກະດິງ ແຂວງບໍລິຄຳໄຊ ໄດ້ຈັດຂຶ້ນ ແລະ ສຳເລັດລົງໃນວັນທີ 15 ພຶດສະພາ 2019 ຢູ່ທີ່ຫ້ອງປະຊຸມກຸ່ມເສດຖະກິດຂອງເມືອງ ພາຍໄຕ້ການເປັນປະທານຂອງສະຫາຍ ນາງ ສົມຮັກ ແກ້ວມະນີ ຄະນະບໍລິຫານງານສະຫະພັນແມ່ຍິງແຂວງ ກຳມະການພັກເມືອງ ປະທານສະຫະພັນແມ່ຍິງເມືອງ, ມີຜູ້ແທນສົມບູນທີ່ເປັນຕົວແທນໃຫ້ແກ່ແມ່ຍິງທົ່ວເມືອງເຂົ້າຮ່ວມ 64 ສະຫາຍ, ກອງປະຊຸມໄດ້ເປັນກຽດຕ້ອນຮັບສະຫາຍ ນາງ ບຸນຊອນ ວໍລະສານ ຄະນະບໍລິຫານງານສູນກາງສະຫະພັນແມ່ຍິງລາວ ກຳມະການພັກແຂວງ ປະທານສະຫະພັນແມ່ຍິງແຂວງ, ສະຫາຍ ສົມພອນ ຈັນທະນາສຸກ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງປາກກະດິງ, ມີແຂກຖືກເຊີນທີ່ເປັນຕົວແທນແມ່ຍິງຈາກເມືອງຫີນບູນ, ເມືອງຄູນຄຳ ແຂວງຄຳມ່ວນ, ເມືອງຄຳເກີດ, ເມືອງປາກຊັນ ແລະ ຫົວໜ້າຫ້ອງການອ້ອມຂ້າງເມືອງເຂົ້າຮ່ວມທັງໝົດ 129 ສະຫາຍ, ຍິງ 98 ສະຫາຍ.

 

     ກອງປະຊຸມໄດ້ຜ່ານຮ່າງບົດລາຍງານການເມືອງທັງສອງພາກ, ຜ່ານບົດສະຫຼຸບຕີລາຄາການຈັດຕັ້ງປະຕິບັດແຜນພັດທະນາແມ່ຍິງ 5 ປີ ( 2014 - 2019 ) ແລະ ທິດທາງແຜນການແຜນພັດທະນາແມ່ຍິງ 5 ປີ ( 2019 - 2024 ).

    ປະຈຸບັນ ເມືອງປາກກະດິງປະກອບດ້ວຍ 47 ບ້ານ ມີ 10 ຮາກຖານ, 30 ໜ່ວຍອ້ອມຂ້າງເມືອງ. ມີຄະນະບໍລິຫານງານແມ່ຍິງທັງໝົດ 19 ສະຫາຍ, ທົ່ວເມືອງມີແມ່ຍິງທັງໝົດ 28.565 ຄົນ, ມີສະມາຊິກສະຫະພັນແມ່ຍິງ 5.966 ສະຫາຍ, ຕະຫຼອດໄລຍະ 5 ປີຜ່ານມາ ຄະນະນຳສະຫະພັນແມ່ຍິງແຕ່ລະຂັ້ນໄດ້ເອົາໃຈໃສ່ຊີ້ນຳສະມາຊິກຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ຄັ້ງທີ VI ຂອງຕົນສອດຄ່ອງກັບຄາດໝາຍສູ້ຊົນ ແລະ ສະພາບຄວາມເປັນຈິງຂອງແມ່ຍິງແຕ່ລະຂັ້ນ ຕິດພັັນກັບຂໍ້ແຂ່ງຂັນ 3 ດີຂອງສະຫະພັນແມ່ຍິງລາວ ສາມາດຍາດໄດ້ຜົນງານຫຼາຍດ້ານທີ່ພົ້ນເດັ່ນເຊີ່ງໃນກອງປະຊຸມ ກໍໄດ້ມີພິທີມອບໃບຍ້ອງຍໍເຈົ້າເມືອງໃຫ້  28 ສະຫາຍ ແລະ ໃບຊົມເຊີຍໃຫ້ 215 ສະຫາຍ ສະມາຊິກສະຫະພັນແມ່ຍິງທີ່ມີຜົນງານດີເດັ່ນໃນການປະຕິບັດວຽກງານແມ່ຍິງໄລຍະ 5 ປີຜ່ານມາ.

     ພາຍຫລັງຄະນະບໍລິຫານງານ ສຍ ເມືອງປາກກະດິງຊຸດເກົ່າໄດ້ຂຶ້ນຜ່ານບົດສຳຫຼວດການນຳພາ ພ້ອມທັງອຳລາໜ້າທີ່ ບັນດາສະຫາຍຜູ້ແທນສົມບູນກໍ່ໄດ້ໃຊ້ສິດປະຊາທິປະໄຕ ປ່ອນບັດເລືອກຕັ້ງເອົາຄະນະບໍລິຫານງານຊຸດໃໝ່ 19 ສະຫາຍ ເພື່ອຊີ້ນຳນຳພາຕໍ່ໄປ, ກອງປະຊຸມຄັ້ງປະຖົມມະລຶກໄດ້ເປັນເອກະພາບກັນເລືອກເອົາສະຫາຍ ນາງພຽງໃຈ ມໍລະຄາສຸກ ເປັນປະທານ, ສະຫາຍ ນາງຈັນຫອມ ພຽນວົງ ເປັນຮອງປະທານ, ສະຫາຍ ນາງສົມໝາຍ ບຸດຈັນທະລາດ ເປັນຮອງປະທານ ທັງເປັນຜູ້ກວດກາ.