ກອງປະຊຸມໃຫຍ່ຄັ້ງທີ VII ສະຫະພັນກຳມະບານເມືອງປາກກະດິງ ແຂວງບໍລິຄຳໄຊ ໄດ້ຈັດຂຶ້ນ ແລະ ສຳເລັດລົງຢ່າງສະຫງ່າຜ່າເຜີຍໃນວັນທີ 16 ພຶດສະພາ 2019 ຢູ່ທີ່ຫ້ອງປະຊຸມໃຫຍ່ຂອງເມືອງ ພາຍໄຕ້ການເປັນປະທານຂອງສະຫາຍ ພູວົງ ພາສິດທິເດດ ກຳມະການພັກເມືອງ ວ່າການປະທານກຳມະບານເມືອງ, ມີຜູ້ແທນສົມບູນທີ່ເປັນຕົວແທນໃຫ້ແກ່ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານໃນທົ່ວເມືອງເຂົ້າຮ່ວມ 61 ສະຫາຍ ຍິງ 14 ສະຫາຍ, ກອງປະຊຸມໄດ້ເປັນກຽດຕ້ອນຮັບສະຫາຍ ດຳລົງ ທັບລາດ ຄະນະບໍລິຫານງານສູນກາງສະຫະພັນກຳມະບານລາວ ປະທານສະຫະພັນກຳມະບານແຂວງ, ສະຫາຍ ສົມພອນ ຈັນທະນາສຸກ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງປາກກະດິິງ, ມີແຂກຖືກເຊີນຈາກເມືອງຄູນຄຳ ແຂວງຄຳມ່ວນ, ເມືອງຄຳເກີດ, ເມືອງປາກຊັນ ແລະ ຕາງໜ້າຫ້ອງການອ້ອມຂ້າງເມືອງເຂົ້າຮ່ວມທັງໝົດ 119 ສະຫາຍ, ຍິງ 33 ສະຫາຍ.

 

         ໃນກອງປະຊຸມບັນດາສະຫາຍຜູ້ແທນກອງປະຊຸມໄດ້ຍົກສູງຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບມອບໝາຍ ແລະ ສູມສະຕິປັນຍາຂອງຕົນປະກອບຄຳຄິດຄຳເຫັນໃສ່ຮ່າງບົດລາຍງານການເມືອງທັງສອງພາກ ແລະ ແຜນຍຸດທະສາດຄາດໝາຍສູ້ຊົນ 5 ປີຕໍ່ໜ້າ ( 2019 - 2024 ) ເຊີ່ງມີເນື້ອໃນ ດັ່ງນີ້: ຕັ້ງໜ້າເປັນເຈົ້າການຈັດຕັ້ງສຶກສາອົບຮົມການເມືອງນຳພາແນວຄິດສະມາຊິກກຳມະບານ, ກຳມະກອນ ຊາວຜູ້ອອກແຮງງານໃຫ້ເປັນພົນລະເມືອງດີ, ມີລະບຽບວິໄນ, ມີນ້ຳໃຈຮັກອາຊີບ ແລະ ມີຄວາມສາມັກຄີຊ່ວຍເຫຼືອເຊີ່ງກັນ ແລະ ກັນ, ເອົາໃຈໃສ່ຍົກສູງຄວາມຮູ້ຄວາມສາມາດ, ຫົວຄິດປະດິດສ້າງຍົກສູງສະມັດຕະພາບສີມືແຮງງານ, ພ້ອມກັນເຮັດໜ້າທີ່ປົກປ້ອງຄວາມຍຸຕິທຳຂອງຊາວຜູ້ອອກແຮງງານຢ່າງຕັ້ງໜ້າ. ປຸກລະດົມສະມາຊິກກຳມະບານ, ລັດຖະກອນ, ກຳມະກອນ ສ້າງຂະບວນການແຂ່ງຂັນສ້າງຜົນງານໃຫ້ຟົດຟື້ນ, ເສີມຂະຫຍາຍກຳລັງແຮງ, ຄວາມສາມາດໃນການພັດທະນາເສດຖະກິດ-ສັງຄົມໃຫ້ຂະຫຍາຍຕົວຢ່າງຕໍ່ເນື່ອງ. ສຸມໃສ່ປັບປຸງການຈັດຕັ້ງກຳມະບານໃຫ້ໜັກແໜ້ນເຂັ້ມແຂງ, ຕັ້ງໜ້າຂະຫຍາຍສະມາຊິກກຳມະບານ, ສະມາຊິກກອງທຶນຊ່ວຍເຫຼືອເຊີ່ງກັນ ແລະ ກັນ ທັງພາກລັດ ແລະ ຫົວໜ່ວຍແຮງງານ, ຫົວໜ່ວຍທຸລະກິດໂຮງຈັກ - ໂຮງງານເອກະຊົນ, ການຈັດຕັ້ງຕ່າງໆໃຫ້ກ້ວາງຂວາງ ຮັບປະກັນດ້ານປະລິມານ ແລະ ຄຸນນະພາບ. ເອົາໃຈໃສ່ແກ້ໄຂປະກົດການທີ່ພາໃຫ້ເກີດມີຂໍ້ຂັດແຍ່ງແຮງງານລະຫວ່າງຜູ້ໃຊ້ແຮງງານກັບຜູ້ອອກແຮງງານ, ຊຸກຍູ້ໃຫ້ຜູ້ໃຊ້ແຮງງານ - ຜູ້ອອກແຮງງານ ປະຕິບັດກົດໝາຍວ່າດ້ວຍແຮງງານ, ກົດໝາຍປະກັນສັງຄົມ ແລະ ກົດໝາຍວ່າດ້ວຍກຳມະບານລາວຢ່າງເຂັ້ມງວດ. ສູ້ຊົນຮັກສານາມມະຍົດສະຫະພັນກຳມະບານເມືອງ 5 ເປັນເຈົ້າໄວ້ໃຫ້ໝັ້ນຄົງ.

        ໂດຍປະຕິບັດຕາມສະໄໝຂອງກອງປະຊຸມ ພາຍຫລັງຄະນະບໍລິຫານງານກຳມະບານເມືອງປາກກະດິງຊຸດເກົ່າໄດ້ຂຶ້ນຜ່ານບົດສຳຫຼວດການນຳພາພ້ອມທັງອຳລາໜ້າທີ່ ແລະ ຜູ້ແທນສົມບູນທີ່ເຂົ້າຮ່ວມກອງປະຊຸມ ກໍ່ໄດ້ໃຊ້ສິດປະຊາທິປະໄຕປ່ອນບັດເລືອກຕັ້ງເອົາຄະນະບໍລິຫານງານກຳມະບານເມືອງຊຸດໃໝ່ເພື່ອຊີ້ນຳ-ນຳພາຕໍ່ໄປ ໂດຍມີຜູ້ສະມັກ 23 ສະຫາຍ ເລືອກໄດ້ 19 ສະຫາຍ, ຍິງ 5 ສະຫາຍ, ກອງປະຊຸມຄັ້ງປະຖົມມະລຶກໄດ້ເປັນເອກະພາບກັນເລືອກເອົາສະຫາຍ ພູວົງ ພາສິດທິເດດ ເປັນປະທານ, ສະຫາຍ ສົມພັນ ວໍລະວົງ ເປັນຮອງປະທານ ແລະ ສະຫາຍ ນາງນາລີ ວົງວິໄລ ເປັນຮອງປະທານທັງເປັນຜູ້ກວດກາ.