ໃນວັນທີ 8 ເມສາ 2019 ນີ້, ກອງພັນໃຫຍ່ 642 ໄດ້ຈັດພິທີປິດຊຸດອົບຮົມທະຫານໃໝ່ປະຈໍາປີ 2018 ໂດຍການເຂົ້າຮ່ວມ ແລະ ມອບໃບຢັ້ງຢືນ ຂອງສະຫາຍພັນເອກ ແສງມະນີວອນ ຄໍາມະນີ ຫົວໜ້າການເມືອງກອງພັນໃຫຍ່, ມີສະຫາຍຮອງຫົວໜ້າພະແນກເສນາ, ພະນັກງານຄູອາຈານ ແລະ ອ້າຍນ້ອງທະຫານໃໝ່ ເຂົ້າຮ່ວມ.

     ໃນພິທີ ໄດ້ຮັບຟັງບົດສະຫຼຸບຕີລາຄາວຽກງານອົບຮົມຫັດແອບທະຫານໃໝ່ຕາມຫຼັກສູດ ໃນນັ້ນ ໄດ້ອົບຮົມວຽກງານການເມືອງ 4 ວັນ ມີ 28 ຊົ່ວໂມງ, ວຽກງານການທະຫານ 45 ວັນ ເທົ່າກັບ 378 ຊົ່ວໂມງ, ວຽກງານພະລາທິການ-ເຕັກນິກ 3 ວັນ ເທົ່າກັບ 21 ຊົ່ວໂມງ, ຜ່ານການອົບຮົມຫັດແອບເປັນເວລາ 90 ວັນ ເຫັນໄດ້ວ່າ ອ້າຍນ້ອງທະຫານໃໝ່ ແມ່ນມີຄວາມເອົາໃຈໃສ່ຄົ້ນຄ້ວາສຶກສາຮໍ່າຮຽນ ເປັນຕົ້ນແມ່ນບົດຮຽນກ່ຽວກັບ 7 ລະບອບ 18 ວຽກໃນມື້ໜື່ງຂອງກອງທັບວາງອອກ, ລະບຽບຮູບແຖວຂັ້ນຈຸ - ໝູ່  - ໝວດ ແລະ ພາກສີລະປະຍຸດ-ຍຸດທະວິທີ, ພາກພະລາທິການ-ເຕັກນິກ, ຜ່ານການປະຕິບັດຕົວຈິງສາມາດຕີລາຄາໄດ້ 89 %ຂຶ້ນໄປ.

      ໂອກາດນີ້ ສະຫາຍຫົວໜ້າການເມືອງກອງພັນໃຫຍ່ ກໍໄດ້ໃຫ້ກຽດມອບໃບຢັ້ງຢືນຈົບອົບຮົມທະຫານໃໝ່ ແລະ ໂອ້ລົມ ເຊີ່ງກອ່ນອື່ນ ສະຫາຍໄດ້ສະແດງຄວາມຍ້ອງຍໍຊົມເຊີຍຄູ-ອາຈານທີ່ໄດ້ຕັ້ງໜ້າຖ່າຍທອດວິຊາ, ບົດຮຽນ ກໍຄືຄວາມຮູ້ຄວາມສາມາດໃຫ້ອ້າຍນ້ອງທະຫານໃໝ່ ພ້ອມທັງຮຽກຮ້ອງໃຫ້ອ້າຍນ້ອງທະຫານໃໝ່ ຈົ່ງກໍາແໜ້ນເອົາບົດຮຽນທີ່ໄດ້ຮຽນມາໜູນໃຊ້ເຂົ້າໃນພຶດຕິກໍາຕົວຈິງຂອງກົມກອງ ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕາມການມອບໝາຍໃຫ້ມີຄວາມສໍາເລັດຢ່າງຈົບງາມ. ໃນພິທີຍັງໄດ້ປະກາດຊັບຊ້ອນອ້າຍນ້ອງທະຫານໃໝ່ລົງບັນຈຸຢູ່ບັນດາກົມກອງຮາກຖານທີ່ຂື້ນກັບ ເພື່ອບັນຈຸເຂົ້າໃນຮ່າງການຈັດຕັ້ງຂັ້ນຕ່າງໆໃຫ້ແທດເໝາະກັບສະພາບຕົວຈິງ.