ກອງປະຊຸມສຳມະນາວຽກງານສະກັດກັ້ນການຄ້າມະນຸດ ໄດ້ຈັດຂຶ້ນໃນວັນທີ 13 ພຶດສະພາ 2019 ຢູ່ຫ້ອງປະຊຸມພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງບໍລິຄຳໄຊ ໂດຍການເຂົ້າຮ່ວມຂອງ ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງ ຖວທ ທັງເປັນຄະນະກໍາມະການຕ້ານການຄ້າມະນຸດລະດັບຊາດ ມີພາກສ່ວນທີ່ກ່ຽວຂ້ອງຈາກສູນກາງ, ຜູ້ຕາງໜ້າຈາກພະແນກການອ້ອມຂ້າງແຂວງ, ເມືອງ, ອໍານາດການປົກຄອງບ້ານ ຕະຫຼອດຮອດບັນດາຜູ້ປະກອບການທຸລະກິດທ່ອງທ່ຽວ, ໂຮງແຮມ, ຣີສອດ, ຮ້ານອາຫານ ແລະ  ຮ້ານບັນເທີງ ພາຍໃນແຂວງ ເຂົ້າຮ່ວມ.

      ກອງປະຊຸມ ໄດ້ຮັບຟັງການເຜີຍແຜ່ກົດໝາຍວ່າດ້ວຍການຕ້ານການຄ້າມະນຸດ ທີ່ປະກອບດ້ວຍ IX ພາກ 91 ມາດຕາ ທີ່ໄດ້ກຳນົດຫຼັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງ, ຕິດຕາມ, ກວດກາວຽກງານຕ້ານການຄ້າມະນຸດ ເພື່ອເຮັດໃຫ້ການເຄື່ອນໄຫວດັ່ງກ່າວເປັນລະບົບ, ຖືກຕ້ອງ ແລະ ມີປະສິດທິຜົນ ແນ່ໃສ່ປົກປ້ອງສິດ, ຜົນປະໂຫຍດ, ຊີວິດ, ສຸຂະພາບ, ກຽດສັກສີ, ເສລີພາບຂອງພົນລະເມືອງ, ຮີດຄອງປະເພນີອັນດີງາມຂອງຊາດ, ເຮັດໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ. ພ້ອມດຽວກັນຍັງໄດ້ຍົກໃຫ້ເຫັນເຖິງຫຼາຍບັນຫາສຳຄັນ ເປັນຕົ້ນແມ່ນຜົນກະທົບຂອງການຄ້າມະນຸດ, ການປ້ອງກັນ, ສະກັດກັ້ນ, ຂັ້ນຕອນການດຳເນີນຄະດີການຄ້າມະນຸດ, ການປົກປ້ອງ ແລະ ການຊ່ວຍເຫຼືອຜູ້ຖືກເຄາະຮ້າຍ, ການຈັດຕັ້ງໜ້າທີ່ຮັບຜິດຊອບຕ້ານການຄ້າມະນຸດ, ຂໍ້ຫ້າມ ແລະ ອື່ນໆ.

    “ການຄ້າມະນຸດ” ແມ່ນການຊອກຫາ, ລັກພາຕົວ, ການເຄື່ອນຍ້າຍ, ການຂົນສົ່ງ ຫຼື ນໍາສົ່ງ, ຮັບເອົາຄົນຢູ່ພາຍໃນ ຫຼື ຕ່າງປະເທດ, ການໃຫ້ບ່ອນພັກເຊົາ ຫຼື ລີ້ຊ່ອນດ້ວຍການຂົນຂວາຍ, ແນະນໍາ, ຕົວະຍົວະຫຼອກລວງ, ຊື້ຈ້າງ, ຈອບອອຍ, ຍຸຍົງ, ສວຍໃຊ້ອໍານາດ, ບັງຄັບນາບຂູ່ ຜູກມັດດ້ວຍໜີ້ສິນ, ການເອົາເດັກມາລ້ຽງ ຫຼື ເອົາເດັກເປັນລູກລ້ຽງແອບແຝງ, ໝັ້ນໝາຍແອບແຝງ, ແຕ່ງດອງແອບແຝງ, ການໃຫ້ຖືກພາ, ຂໍທານ ແລະ ການຖ່າຍຮູບພາບ ສະແດງເຜີຍແຜ່ສິ່ງລາມົກ ຫຼື ດ້ວຍຮູບການອື່ນເພື່ອຂູດຮີດແຮງງານ, ຂູດຮີດທາງເພດ, ເປັນຂ້າທາດ, ຄ້າໂສເພນີ, ບັງຄັບໃຫ້ເປັນໂສເພນີ, ເອົາອະໄວຍະວະຕ່າງໆຂອງຮ່າງກາຍໄປຂາຍ ແລະ ສິ່ງອື່ນໆທີ່ຂັດກັບກົດໝາຍ ແລະ ວັດທະນະທໍາອັນດີງາມຂອງຊາດ ຫຼື ຈຸດປະສົງອື່ນເພື່ອຫາຜົນປະໂຫຍດ.

    ກອງປະຊຸມ ຍັງໄດ້ຮັບຟັງການນຳສະເໜີກ່ຽວກັບສະພາບການເຄື່ອນຍ້າຍແຮງງານ ຢູ່ ສປປ ລາວ ທັງພາຍໃນ ແລະ ໄປຕ່າງປະເພດ, ສະພາບການຕ້ານການຄ້າມະນຸດໃນພາກພື້ນສາກົນ ແລະ ສປປ ລາວ. ຫຼັງຈາກນັ້ນ ວິທະຍາກອນ ແລະ ສຳມະນາກອນ ກໍ່ໄດ້ມີການສະເໜີແລກປ່ຽນບົດຮຽນຮ່ວມກັນໃນຫຼາຍບັນຫາສຳຄັນ ເປັນຕົ້ນແມ່ນຮູບແບບການຄ້າມະນຸດໃນໄລຍະໃໝ່ ເຊິ່ງຜູ່ບໍ່ຫວັງດີສວຍໃຊ້ຮີດຄອງປະເພນີໃນການຕົວະຍົວະ, ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ, ບັນຫາທີ່ເກີດຂຶ້ນ, ວິທີການສະກັດກັ້ນ ແລະ ປ້ອງກັນຕ້ານການຄ້າມະນຸດ ໃນຂັ້ນຮາກຖານທ້ອງຖິ່ນ ແລະ ອື່ນໆ.