ໃນວັນທີ 30 ເມສາ 2019 ຢູ່ຄ້າຍຄຸມຂັງ-ດັດສ້າງ ໄດ້ຈັດພິທີປ່ອຍຕົວນັກໂທດຂຶ້ນ ໃຫ້ກຽດເຂົ້າຮ່ວມເປັນປະທານຂອງທ່ານ ບຸນມາ ບຸຈະເລີນ ຮອງເລຂາພັກແຂວງ ຮອງເຈົ້າແຂວງບໍລິຄໍາໄຊ, ມີທ່ານ ພັນໂທ ຄໍາແພງ ນໍາພາວັນ ຄະນະພັກ ຮອງຫົວໜ້າກອງບັນຊາການ ປກສ ແຂວງ, ຫົວໜ້າຄ້າຍຄຸມຂັງ-ດັດສ້າງ ພ້ອມດ້ວຍຄະນະ, ອົງການໄອຍະການ, ສານປະຊາຊົນ, ອົງການຈັດຕັ້ງກໍາມະບານ, ຊາວໜຸ່ມ-ແມ່ຍິງ, ພໍ່ແມ່ປະຊາຊົນ, ພີ່ນ້ອງນັກໂທດ ແລະ ນັກໂທດ ເຂົ້າຮ່ວມ.

       ໂດຍປະຕິບັດຕາມຄຳຕັດສິນຂອງສານອາຍາປະຊາຊົນຂັ້ນຕົ້ນ ແຂວງ ບໍລິຄຳໄຊ ເລກທີ່ 54/ຂຕອ ລົງວັນທີ 24 ເມສາ 2019 ວ່າດ້ວຍການປ່ອຍຕົວນັກໂທດຜູ້ທີ່ມີມາດຖານເງື່ອນໄຂຄົບຖ້ວນຖືກຕ້ອງຕາມກົດໝາຍອາຍາແຫ່ງ ສປປ ລາວ ມາດຕາ 52 ສະບັບປັບປຸງ ປີ 2005 ວ່າດ້ວຍການປ່ອຍຕົວນັກໂທດກ່ອນກຳນົດໂດຍມີເງື່ອນໄຂ. 

         ທ່ານ ພັນໂທ ສີລາ ພົມມະຈັນ ຫົວໜ້າຄ້າຍຄຸມຂັງ-ດັດສ້າງ ປກສ ແຂວງ ໄດ້ຂຶ້ນຜ່ານໃບປ່ອຍຕົວຂອງກອງບັນຊາການ ປກສ ແຂວງ ບໍລິຄຳໄຊ ສະບັບເລກທີ 2299/ປກສຂ ລົງວັນທີ 26 ເມສາ 2019 ວ່າດ້ວຍການປ່ອຍຕົວນັກໂທດກ່ອນກຳນົດໂດຍມີເງື່ອນໄຂ ຈໍານວນ 35 ຄົນ, ຍິງ 09 ຄົນ, ໃນນັ້ນ ມີນັກໂທດທີ່ເຮັດຜິດໃນສະຖານ ຄ້າຂາຍຢາເສບຕິດ 32 ຄົນ, ຍິງ 08 ຄົນ, ກະທໍາຜິດໃນສະຖານທົ່ວໄປ 03 ຄົນ, ຍິງ 01 ຄົນ ເຊິ່ງພວກກ່ຽວໄດ້ຜ່ານການປະຕິບັດໂທດຕາມກົດໝາຍມາແລ້ວ 2/3 ເຫັນວ່າພວກກ່ຽວແມ່ນມີຄວາມກິນແໜງແຄງໃຈຕໍ່ການກະທຳຜິດດັ່ງກ່າວ ແລະ ມີຄວາມຫ້າວຫັນໃນການອອກແຮງງານ, ເອົາໃຈໃສ່ປະຕິບັດກົດລະບຽບຂອງຄ້າຍຄຸມຂັງໄດ້ຢ່າງເຂັ້ມງວດ ຈຶ່ງໄດ້ຮັບການປ່ອຍຕົວຕາມແນວທາງນະໂຍບາຍຂອງພັກ-ລະບຽບກົດໝາຍຂອງລັດ.

      ໃນໂອກາດດັ່ງກ່າວ ທ່ານ ບຸນມາ ບຸຈະເລີນ ຮອງເຈົ້າແຂວງບໍລິຄໍາໄຊ  ກໍ່ໄດ້ເປັນກຽດໂອ້ລົມຕໍ່ບັນດານັກໂທດທີ່ໄດ້ຮັບການປ່ອຍຕົວໃນຄັ້ງນີ້ ວ່າ: ເມື່ອພົ້ນໂທດອອກໄປຢູ່ນຳຄອບຄົວ ແລະ ສັງຄົມແລ້ວ ຈົ່ງພ້ອມກັນເອົາໃຈໃສ່ເຄົາລົບ ແລະ ປະຕິບັດລະບຽບກົດໝາຍຢ່າງເຂັ້ມງວດ, ປະກອບອາຊີບທໍາມາຫາກິນຢ່າງຊື່ສັດສຸດຈະລິດ, ຖືກຕ້ອງສອດຄ່ອງກັບແນວທາງນະໂຍບາຍຂອງພັກ-ລະບຽບກົດໝາຍຂອງລັດ ເພື່ອສ້າງສາພັດທະນາຕົນເອງ ແລະ ຄອບຄົວ ໃຫ້ມີຄວາມຮັ່ງມີຜາສຸກຂື້ນເລື້ອຍໆ, ຮຽກຮ້ອງໃຫ້ພໍ່ແມ່, ຍາດພີ່ນ້ອງ ແລະ ອຳນາດການປົກຄອງທຸກຂັ້ນ ຈົ່ງເອົາໃຈໃສ່ສຶກສາອົບຮົມເຂົາເຈົ້າ ໃຫ້ກາຍເປັນຄົນດີຂອງຄອບຄົວ, ສັງຄົມ ແລະ ບໍ່ກັບໄປກະທໍາຜິດ ຕໍ່ລະບຽບກົດໝາຍອີກ.