ພິທີມອບຮັບໃບຍ້ອງຍໍ ແລະ ໃບຊົມເຊີຍ ໃຫ້ແກ່ພະນັກງານ ອົງການໄອຍາການປະຊາຊົນແຂວງບໍລິຄໍາໄຊ ໄດ້ຈັດຂຶ້ນໃນວັນທີ 7 ພຶດສະພາ 2019 ຢູ່ຫ້ອງປະຊຸມອົງການໄອຍາການປະຊາຊົນແຂວງ ໂດຍການເຂົ້າຮ່ວມຂອງ ທ່ານ ທອງໃບ ພຽນວົງ ຫົວໜ້າອົງການໄອຍາການປະຊາຊົນແຂວງ ມີຄະນະອົງການໄອຍາການ ແລະ ພະນັກງານຫຼັກແຫຼ່ງພາຍໃນເຂົ້າຮ່ວມ.

          ໃນພິທີ ໄດ້ຮັບຟັງການຜ່ານຂໍ້ຕົກລົງ ຂອງອົງການໄອຍາການປະຊາຊົນສູງສຸດ ສະບັບເລກທີ 043/ອອປສ ວ່າດ້ວຍການຍ້ອງຍໍໃຫ້ກັບຜູ້ທີ່ມີຜົນງານດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາ ດ້ວຍຄໍາຂວັນ 3 ມີ, 4 ຮັບປະກັນ ທີ່ອົງການໄອຍາການປະຊາຊົນສູງສຸດວາງອອກ, ໂດຍອີງຕາມການນໍາສະເໜີ ແລະ ຄົ້ນຄ້ວາຂອງກົມຈັດຕັ້ງພະນັກງານ ອົງການໄອຍາການປະຊາຊົນສູງສຸດ ເຫັນດີປະຕິບັດນະໂຍບາຍຍ້ອງຍໍໃຫ້ແກ່ພະນັກງານຂອງອົງການໄອຍາການປະຊາຊົນ ແຂວງບໍລິຄໍາໄຊ ປະຈໍາປີ 2016, 2017, 2018 ປະເພດກົມກອງລວມຫມູ່ມີ 3 ກົມກອງ ຄື: ອົງການໄອຍາການປະຊາຊົນແຂວງ, ອົງການໄອຍາການປະຊາຊົນ ເຂດ 1, ອົງການໄອຍາການປະຊາຊົນ ເຂດ 2, ປະເພດບຸກຄົນ ມີ 16 ທ່ານ, ຍິງ 3 ທ່ານ, ໄດ້ຮັບໃບຊົມເຊີຍມີ 29 ທ່ານ, ຍິງ 11 ທ່ານ. ໃຫ້ກຽດມອບໃບຍ້ອງຍໍ ແລະ ໃບຊົມເຊີຍດັ່ງກ່າວ ໂດຍ ທ່ານ ທອງໃບ ພຽນວົງ ຫົວໜ້າອົງການໄອຍາການປະຊາຊົນ ພ້ອມດ້ວຍຄະນະ.

     ໃນຕອນທ້າຍຂອງພິທີຍັງໄດ້ຮັບຟັງຄໍາໂອ້ລົມຈາກທ່ານ ທອງໃບ ພຽນວົງ ເຊິ່ງທ່ານກໍ່ໄດ້ກ່າວຍ້ອງຍໍຊົມເຊີຍຕໍ່ຜົນສໍາເລັດຂອງພະນັກງານພາຍໃນອົງການໄອຍາການປະຊາຊົນແຂວງ ທີ່ໄດ້ເອົາໃຈໃສ່ສຸມທຸກເຫື່ອແຮງສະຕິປັນຍາຂອງຕົນຢ່າງຫ້າວຫັນ ເຂົ້າໃນການປະຕິບັດໜ້າທີ່ວຽກງານວິຊາສະເພາະ ຕາມການມອບໝາຍໄດ້ເປັນຢ່າງດີ ຈົນສາມາດໄດ້ຮັບການຍ້ອງຍໍໃນຄັ້ງນີ້. ທ່ານຍັງໄດ້ເນັ້ນໜັກໃຫ້ພະນັກງານທຸກທ່ານ ຈົ່ງເຊີດຊູເສີມຂະຫຍາຍມູນເຊື້ອອັນດີງາມເຫຼົ່ານີ້ໃຫ້ເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ.