ໃນວັນທີ 30 ເມສາ 2019 ທ່ານ ຄໍາປຸ່ນ ລັດຕະນະເດດ ອໍານວຍການ ວິທະຍາໄລພຽນຈະເລີນແຂວງບໍລິຄໍາໄຊ  ໄດ້ນໍາເອົາເຄື່ອງໃຊ້ຫ້ອງການ ແລະ ອຸປະກອນກິລາ ມາມອບໃຫ້ຄ້າຍຄຸມຂັງ-ດັດສ້າງ ປກສ ແຂວງບໍລິຄໍາໄຊ ໂດຍມີພະນັກງານທັງສອງຝ່າຍເຂົ້າຮ່ວມເປັນສັກຂີພະຍານ.

     ທ່ານ ຄໍາປຸ່ນ ລັດຕະນະເດດ ໄດ້ກ່າວວ່າ ຍ້ອນເຫັນໄດ້ຄວາມຂາດເຂີນທາງດ້ານວັດຖຸອຸປະກອນ ຮັບໃຊ້ໃນວຽກງານວິຊາສະເພາະ  ໃນການຈັດຕັ້ງປະຕິບັດໜ້າທີ່ວຽກງານ ຂອງຄ້າຍຄຸມຂັງ-ດັດສ້າງ ປກສ ແຂວງບໍລິຄໍາໄຊ  ຈຶ່ງໄດ້ນໍາເອົາ ຄອມພິວເຕີ ຍີ່ຫໍ້ ເດວ (DELL ) ຈໍານວນ 01 ຊຸດ ແລະ ອຸປະກອນກິລາຈໍານວນໜຶ່ງ ລວມມູນຄ່າ 3.350.000 ກີບ ມາມອບໃຫ້ ຄ້າຍຄຸມຂັງ-ດັດສ້າງ ປກສ ແຂວງບໍລິຄໍາໄຊ, ໃນໂອກາດດຽວກັນນັ້ນ ທ່ານ ພັນໂທ ສີລາ ພົມມະຈັນ ຫົວໜ້າຄ້າຍຄຸມຂັງ-ດັດສ້າງ ປກສ ແຂວງບໍລິຄໍາໄຊ ກໍ່ໄດ້ກ່າວສະແດງຄວາມຂອບອົກຂອບໃຈຕໍ່ທ່ານ ຄໍາປຸ່ນ ລັດຕະນະເດດ ພ້ອມດ້ວຍຄະນະ ທີ່ໄດ້ນໍາເອົາວັດຖຸອຸປະກອນຮັບໃຊ້ຫ້ອງການມາມອບໃຫ້ໃນຄັ້ງນີ້ ແລະ ຈະນໍາເອົາອຸປະກອນດັ່ງກ່າວໄປໝູນໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານວິຊາສະເພາະທີ່ການຈັດຕັ້ງຂັ້ນເທິງມອບໝາຍ ໃຫ້ມີບາດກ້າວຂະຫຍາຍຕົວ ແລະ ປະສົບຜົນສໍາເລັດຢ່າງມີປະສິດທິຜົນ.