ໃນ​ວັນ​ທີ​ 8 ພຶດສະພາ 2019 ຢູ່ສະໂມສອນ ປກສ ແຂວງ ອົງການກາແດງແຂວງ ໄດ້​ຈັດ​ພິທີປາຖະກະຖາ​​ວັນສ້າງຕັ້ງກາແດງ ຄົບຮອບ 156 ປີ (8/5/1863-8/5/2019) ຂຶ້ນ ໃຫ້ກຽດເຂົ້າຮ່ວມ ແລະ ເລົ່າຄືນມູນເຊື້ອໂດຍ ທ່ານ ລຳສະໄໝ ວໍລະສານ ຄະນະປະຈຳພັກແຂວງ ປະທານແນວລາວສ້າງຊາດແຂວງ ແລະ ເຂົ້າຮ່ວມໂດຍ ທ່ານ ສຈ ດຣ ສິງ ເມໂນລາດ ຮອງປະທານອົງການກາແດງລາວ, ທ່ານ ກາໂຊ ກາສູກາ ປະທານມູນນິທິເຄື່ອງນຸ່ງຫົ່ມ (TRCC) ໂອຊາກະ ປະເທດຍີ່ປຸ່ນ ພ້ອມດ້ວຍແຂກຖືກເຊີນຈາກບັນດາພະແນກການ, ປກສ, ປກຊ ແລະ ນັກຮຽນ-ນັກສຶກສາ ເຂົ້າຮ່ວມຮັບຟັງ.

      ທ່ານ ລຳສະໄໝ ວໍລະສານ ໄດ້ເລົ່າຄືນບາງຕອນວ່າ: ໃນວັນທີ 24 ມີຖຸນາ ປີ 1985 ຢູ່ທົ່ງໂຊນໂຟຣີໂນ ເມືອງໜຶ່ງທາງຕອນເໜືອຂອງປະເທດອີຕາລີ ກອງທັບຂອງປະເທດໂອຕຼິດ ແລະ ຝຣັ່ງເສດ ຖືກປິດລ້ອມໃນສະໜາມຮົບທີ່ດຸເດືອດຮຸນແຮງ ພາຍຫຼັງຕໍ່ສູ້ກັນເປັນເວລາ 16 ຊົ່ວໂມງ ໃນສະໜາມຮົບດັ່ງກ່າວກໍ່ເຕັມໄປດ້ວຍສົບທະຫານ ຈໍານວນ 40.000 ຄົນ ມີຜູ້ບາດເຈັບ ແລະ ຕາຍລຽນລະດາດໄປທົ່ວດິນແດນແຫ່ງນັ້ນ ໃນຕອນແລງຂອງມື້ດຽວກັນ ມີນັກທຸລະກິດຊາວສະຫວິດຜູ້ໜຶ່ງ ຊື່ວ່າ: ທ່ານ ຮັງຣີ ດູນັງ ( Hen Ry Dunant ) ເຊິ່ງເປັນຄົນສັນຊາດສະຫວິດ ເດີນທາງໄປເຖິງພື້ນທີ່ດັ່ງກ່າວ ໂດຍມີຈຸດປະສົງເພື່ອເຮັດທຸລະກິດ ພົບເຫັນທະຫານຫຼາຍພັນຄົນຂອງກອງທັບທັງສອງ ຖືກປ່ອຍໃຫ້ທົນທຸກທໍລະມານ ແລະ ລົ້ມຕາຍຕາມສະຕາກໍາຍ້ອນຂາດການຊ່ວຍເຫຼືອດ້ານການແພດທີ່ເໝາະສົມພຽງພໍ. ທ່ານ ຮັງຣີ ດູນັງ ໄດ້ຮ້ອງຂໍໃຫ້ຊາວບ້ານບໍລິເວນນັ້ນມາຊ່ວຍເຫຼືອໃນການປິ່ນປົວຜູ້ຖືກບາດເຈັບ ໂດຍຢືນຢັນວ່າ ທະຫານທັງສອງຝ່າຍຄວນໄດ້ຮັບການປິ່ນປົວ. ອີກ 3 ປີຕໍ່ມາທ່ານໄດ້ຂຽນປື້ມຫົວໜຶ່ງໂດຍໃສ່ຊື່ວ່າ: “ຄວາມຊົງຈໍາແຫ່ງໂຊນເຟຣີໂນ”  ເຊິ່ງສໍາເລັດໃນປີ 1862 ທ່ານໄດ້ສະເໜີແນວຄວາມຄິດ 2 ຢ່າງຄື: ສ້າງກອງອາສາສະໝັກຂຶ້ນຢູ່ແຕ່ລະປະເທດ ເພື່ອຊ່ວຍເຫຼືອທະຫານບາດເຈັບໃນສົງຄາມ, ສົ່ງເສີມຂໍ້ຕົກລົງໃນການໃຫ້ການປົກປ້ອງທະຫານບາດເຈັບໃນສົງຄາມ ແລະ ຜູ້ທີ່ເຂົ້າໄປຮັກສາທະຫານບາດເຈັບ ແລະ ທ່ານໄດ້ພີມແນວຄວາມຄິດນີ້ ແຈກຢາຍໄປຍັງບັນດາກະສັດທີ່ປົກຄອງປະເທດຕ່າງໆໃນເອີຣົບ. ທ່ານ ກຸສຕັບ ໂມນີເອ ( Gustave Moynier) ເປັນນັກກົດໝາຍ ແລະ ປະທານສະມາຄົມແຮງງານຂອງເຈນີວາ ໄດ້ສະເໜີ ທ່ານ ຮັງຣີ ດູນັງ ໄປພົບປະກັບສະມາຊິກສະມາຄົມອື່ນໆກ່ຽວກັບແນວຄວາມຄິດຂອງທ່ານ, ໃນວັນທີ 17 ເດືອນ ກຸມພາ 1863 ໄດ້ຈັດກອງປະຊຸມຄັ້ງປະຖົມມະເລີກຂຶ້ນໂດຍໃສ່ຊື່ຄະນະນີ້ວ່າ: ຄະນະກໍາມະການສາກົນເພື່ອຊ່ວຍເຫຼືອຜູ້ບາດເຈັບໃນສະໜາມຮົບ ໃນໄລຍະບໍ່ພໍເທົ່າໃດເດືອນຕໍ່ມາຄະນະກໍາມະການດັ່ງກ່າວໄດ້ຈັດກອງປະຊຸມຂຶ້ນໃນເດືອນ 10 ປີ 1863 ເຊິ່ງມີຜູ້ແທນຈາກ 16 ປະເທດເຂົ້າຮ່ວມ ກອງປະຊຸມໄດ້ເຫັນດີເປັນເອກະພາບກັນວ່າ: ເອົາກາກະບາດສີແດງເທີງພື້ນສີຂາວເປັນເຄື່ອງໝາຍປົກປ້ອງ ແລະ  ຖືເອົາວັນຄ້າຍວັນເກີດຂອງທ່ານ ຮັງຣີ ດູນັງ ວັນທີ 8 ພຶດສະພາ ເປັນວັນສ້າງຕັ້ງກາແດງ ແລະ ຊີກວົງເດືອນແດງສາກົນ.

    ທ່ານຍັງໄດ້ຍົກໃຫ້ເຫັນ ເຖິງຜົນງານໄລຍະໜຶ່ງປີຜ່ານມາຂອງອົງການກາແດງແຂວງບໍລິຄຳໄຊ ທີ່ມີຫຼາຍວຽກງານໄດ້ຮັບການຈັດຕັ້ງປະຕິບັດ ແລະ ໄດ້ຮັບຜົນສຳເລັດ ເຊິ່ງໄດ້ສະແດງອອກ ຄື: ສາມາດຊ່ວຍເຫຼືອບັນເທົາທຸກພໍ່ແມ່ປະຊາຊົນບັນດາເຜົ່າ ທີ່ຖືກໄຟໄໝ້ເຮືອນ 14 ຄອບຄົວ, 11 ບ້ານ ລວມມູນຄ່າ 42.397.000 ກີບ, ຊ່ວຍບັນເທົາທຸກຄອບຄົວອານາຖາ 172 ຄອບຄົວ, 18 ບ້ານ ລວມມູນຄ່າ 127.630.000 ກີບ, ຊ່ວຍເຫຼືອນັກຮຽນຜູ້ດ້ອຍໂອກາດຢູ່ໂຮງຮຽນຊົນເຜົ່າເມືອງຄຳເກີດ ມູນຄ່າ 8.900.000 ກີບ, ຊ່ວຍປະຊາຊົນທີ່ໄດ້ຮັບຜົນກະທົບຈາກໄຟນ້ຳຖ້ວມໃນ ປີ 2018 ຢູ່ເມືອງວຽງທອງ 379 ຄອບຄົວ 11 ບ້ານ ລວມມູນຄ່າ 180.615.000 ກີບ ແລະ ຢູ່ເມືອງປາກກະດິງ 294 ຄອບຄົວ 7 ບ້ານ ລວມມູນຄ່າ 78.900.000 ກີບ, ປຸກລະດົມບໍລິຈາກເລືອດໄດ້ທັງໝົດ 2.889 ຖົງ, ຈ່າຍເລືອດໃຫ້ແກຄົນເຈັບ 2.772 ຖົງ.

     ໂອກາດນີ້ ຍັງໄດ້ມີພິທີປະດັບຫຼຽນໄຊແຮງານຊັ້ນ III ໃຫ້ແກ່ທ່ານ ກາໂຊ ກາສູກາ ປະທານມູນິທິເຄື່ອງນຸ່ງຫົ່ມ (TRCC) ແລະ ທ່ານ ບຸນນະສັກ ແກ້ວສັກສິດ ທີ່ມີຜົນງານ, ຄຸນງາມຄວາມດີ ປະກອບສ່ວນທຶນຮອນ ແລະ ເຫື່ອແຮງ ເຂົ້າໃນວຽກງານອົງການກາແດງແຂວງບໍລິຄຳໄຊ. ນອກຈາກນັ້ນສູນບໍລິຈາກເລືອດຂອງແຂວງ ຍັງໄດ້ຈັດກິດຈະກຳບໍລິຈາກເລືອດ ໂດຍມີຜູ້ສະໝັກໃຈທີ່ຜ່ານການກວດສຸຂະພາບ ແລະ ສາມາດໃຫ້ບໍລິຈາກເລືອດໄດ້ 112 ຄົນ, ຍິງ 36 ຄົນ.