ດ້ວຍຄວາມອາໄລອາວອນ ຕໍ່ດວງວິນຍານຂອງບັນດາສະຫາຍທະຫານອາສາສະໝັກ ແລະ ຊ່ຽວຊານຫວຽດນາມ ໃນຕອນເຊົ້າວັນທີ 9 ພຶດສະພາ 2019 ຢູ່ສະໂມສອນໃຫຍ່ແຂວງບໍລິຄຳໄຊ ໄດ້ຈັດພິທີນຳສົ່ງອັດຖິທະຫານອາສາສະໝັກ ແລະ ຊ່ຽວຊານຫວຽດນາມທີ່ເສຍສະຫຼະຊີວິດໃນປາງສົງຄາມ ຢູ່ ສປປ ລາວ ຂຶ້ນ ຢ່າງເປັນທາງການ, ຝ່າຍແຂວງບໍລິຄຳໄຊນຳໂດຍ ສະຫາຍ ປອ ສຸວັນນີ ໄຊຊະນະ ຮອງເລຂາພັກແຂວງ ປະທານສະພາປະຊາຊົນແຂວງບໍລິຄຳໄຊ, ສະຫາຍ ບຸນມາ ບຸຈະເລີນ ຮອງເລຂາພັກແຂວງ ຮອງເຈົ້າແຂວງ, ສະຫາຍ ແດນປີ ມູນທະດີ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ຫົວໜ້າຄະນະປະຕິບັດງານພິເສດແຂວງບໍລິຄຳໄຊ ພ້ອມດ້ວຍຄະນະນຳຂອງແຂວງ ແລະ ເມືອງ, ແຂວງຮ່າຕິ້ງນຳໂດຍ ສະຫາຍ ຟານກາວແທັງ ຄະນະປະຈຳພັກແຂວງ ຫົວໜ້າຄະນະຂົນຂວາຍປະຈຳຄະນະພັກແຂວງ ພ້ອມຄະນະ ມີພະນັກງານ-ລັດຖະກອນ, ນາຍ ແລະ ພົນທະຫານ - ນາຍ ແລະ ພົນຕຳຫຼວດ ເຂົ້າຮ່ວມພິທີຢ່າງສົມກຽດ.

      ຂະບວນນຳສົ່ງອັດຖິທະຫານອາສາສະໝັກ ແລະ ຊ່ຽວຊານຫວຽດນາມທີ່ເສຍສະຫຼະຊີວິດໃນປາງສົງຄາມ ຢູ່ ສປປ ລາວ ຈຳນວນ 7 ອັດຖິ ໄດ້ເຄື່ອນອອກຈາກສະໂມສອນໃຫຍ່ແຂວງບໍລິຄຳໄຊ ໃນເວລາ 6 ໂມງ 30 ນາທີ ເພື່ອນຳສົ່ງໄປແຂວງຮ່າຕິ່ງ ສສ ຫວຽດນາມ ທີ່ເປັນບ້ານເກີດເມືອງນອນຫຼັງຈາກການຈາກໄປເປັນເວລາຫຼາຍປີ ເພື່ອພາລະກິດການປະຕິວັດຕ້ານຈັກກະພັດຜູ້ຮຸກຮານ. ຕະຫຼອດເສັ້ນທາງເດີນທາງກັບຂອງຂະບວນນຳສົ່ງອັດຖິໃນຄັ້ງນີ້ ເຕັມໄປດ້ວຍມວນຊົນຊາວແຂວງບໍລິຄຳໄຊ, ພະນັກງານ, ທະຫານ-ຕຳຫຼວດ ຕະຫຼອດຮອດນັກຮຽນນັກສຶກສາ ຢືນຢູ່ຕາມເສັ້ນທາງ ເພື່ອສະແດງຄວາມຮູ້ບຸນຄຸນເຖີງຄຸນງາມຄວາມດີຂອງພວກທ່ານ ທີ່ສຸມທຸກສະຕິ, ເຫື່ອແຮງ ແລະ ເສຍສະຫລະຊີວິດເລືອດເນື້ອ ເພື່ອການປະຕິວັດຊາດປະຊາທິປະໄຕ ແລະ ເພື່ອເປັນການອວຍພອນໃຫ້ຂະບວນນຳສົ່ງອັດຖິ ເດີນທາງດ້ວຍຄວາມສະຫວັດດີພາບ.