ກອງປະຊຸມພົບປະລະຫວ່າງ ຄະນະປະຕິບັດງານພິເສດແຂວງບໍລິຄຳໄຊ ສປປ ລາວ ແລະ ແຂວງຮ່າຕິ້ງ ສສ ຫວຽດນາມ ໄດ້ຈັດຂຶ້ນໃນວັນທີ 8 ພຶດສະພາ 2019 ຢູ່ຫ້ອງປະຊຸມຫ້ອງວ່າການປົກຄອງແຂວງ, ຄະນະຜູ້ແທນແຂວງບໍລິຄຳໄຊ ນຳໂດຍ ສະຫາຍ ແດນປີ ມູນທະດີ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ທັງເປັນຫົວໜ້າຄະນະປະຕິບັດງານພິເສດ ແລະ ແຂວງຮ່າຕິ່ງ ນຳໂດຍ ສະຫາຍ ຟານກາວແທັງ ຄະນະປະຈຳພັກແຂວງ ຫົວໜ້າຄະນະຂົນຂວາຍປະຈຳຄະນະພັກແຂວງ, ມີບັນດາສະຫາຍໃນຄະນະປະຕິບັດງານພິເສດແຂວງບໍລິຄຳໄຊ-ແຂວງຮ່າຕິ້ງ ເຂົ້າຮ່ວມ.

      ສະຫາຍ ພົ.ວ ຈວງຈັນ ລາດຊະວົງ ຄະນະປະຈຳພັກແຂວງ ຫົວໜ້າການເມືອງກອງບັນຊາການທະຫານແຂວງ ຮອງຫົວໜ້າຜູ້ປະຈຳການຄະນະປະຕິບັດງານພິເສດແຂວງບໍລິຄຳໄຊ ໄດ້ຜ່ານບົດລາຍງານວ່າ ໃນສົກປີຜ່ານມາໜ່ວຍປະຕິບັດງານພິເສດຂອງແຂວງ ໄດ້ແຈ້ງການໄປຫາບັນດາເມືອງ, ອຳນາດການປົກຄອງບ້ານ ປຸກລະດົມປະຊາຊົນເຂົ້າຮ່ວມວຽກງານດັ່ງກ່າວ, ໜ່ວຍງານຂຸດຄົ້ນໄດ້ແບ່ງໜ່ວຍງານອອກເປັນສອງຈຸ ຄື: ຈຸທີ່ໜຶ່ງປະຈຳການຢູ່ເມືອງປາກຊັນ ແລະ ຈຸທີ່ສອງປະຈຳຢູ່ເມືອງວຽງທອງ, ໜ່ວຍງານປະຕິບັດງານພິເສດ 2 ແຂວງ ໄດ້ຮ່ວມກັນ ແລະ ສົມທົບກັບພາກສ່ວນທີ່ກ່ຽວຂ້ອງ ໂຄສະນາ-ອົບຮົມເພື່ອເກັບກຳຂໍ້ມູນ ເຖິງວ່າສະຖານທີ່ຫຼາຍບ່ອນມີການປ່ຽນແປງ, ສະພາບອາກາດບໍ່ເອື້ອອຳນວຍ, ພູມມີປະເທດແຕກຕ່າງກັນ ເຊິ່ງສ້າງຄວາມຫຍຸ້ງຍາກໃນການປະຕິບັດງານຂອງອ້າຍນ້ອງ ແຕ່ສິ່ງດັ່ງກ່າວ ບໍ່ໄດ້ເປັນອຸປະສັກຕໍ່ການເຄື່ອນໄຫວວຽກງານແກ່ສອງໜ່ວຍງານປະຕິບັດງານພິເສດຂອງ 2 ແຂວງ, ການເຄື່ອນໄຫວຂຸດຄົ້ນມາຮອດປະຈຸບັນແຂວງບໍລິຄຳໄຊສາມາດຂຸດຄົ້ນໄດ້ 5 ອັດຖິ ຄື: ເມືອງວຽງທອງ ໄດ້ 2 ອັດຖິ, ເມືອງປາກຊັນ 1 ອັດຖິ, ເມືອງບໍລິຄັນ 1 ອັດຖິ ແລະ ເມືອງຄໍາເກີດ 1 ອັດຖິ ພ້ອມດຽວກັນໜ່ວຍປະຕິບັດງານພິເສດນະຄອນຫຼວງວຽງຈັນ ຍັງສາມາດຂຸດຄົ້ນໄດ້ 2 ອັດຖິ ລວມທັງໝົດ 7 ອັດຖິ.

       ຫຼັງຈາກນັ້ນ ທັງສອງຝ່າຍ ກໍ່ຍັງໄດ້ມີການປະກອບຄຳຄິດຄຳເຫັນຮ່ວມກັນ ໃນຫຼາຍວຽກງານສຳຄັນ ເປັນຕົ້ນແມ່ນແຜນການຂຸດຄົ້ນອັດຖິໃນສົກປີ 2019-2020, ຂໍ້ສະດວກ ແລະ ຂໍ້ຫຍຸ້ງຍາກ, ການເກັບກຳຂໍ້ມູນ ແລະ ອື່ນໆ. ນອກນັ້ນຍັງໄດ້ມີພິທີມອບໃບຍ້ອງຍໍຂອງເຈົ້າແຂວງ ແລະ ໃບຍ້ອງຍໍຂອງກອງບັນຊາການທະຫານແຂວງບໍລິຄຳໄຊ ໃຫ້ບຸກຄົນທີ່ມີຜົນງານປະກອບສ່ວນເຂົ້າໃນວຽກງານຂຸດຄົ້ນອັດຖິ ໃນສົກປີ 2018-2019 ທີ່ຜ່ານມາ.

    ໃນຕອນບ່າຍຂອງວັນດຽວກັນ ຢູ່ທີ່ສະໂມສອນຂອງແຂວງບໍລິຄຳໄຊ ກໍ່ໄດ້ຈັດພິທີວາງພວງມາລາເພື່ອໄຫວ້ອາໄລເຖິງດວງວິນຍານທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມຢູ່ລາວ. ຫຼັງຈາກນັ້ນ ກໍ່ໄດ້ມີພິທີລົງນາມເຊັນບົດບັນທຶກມອບ-ຮັບອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມຢູ່ແຂວງບໍລິຄຳໄຊ ຈຳນວນ 5 ອັດທິ ແລະ ນະຄອນຫຼວງວຽງຈັນ 2 ອັດຖິ ລວມທັງໝົດ 7 ອັດຖິ ເຊິ່ງຕາງໜ້າຝ່າຍແຂວງບໍລິຄຳໄຊ ລົງນາມໂດຍສະຫາຍ ແດນປີ ມູນທະດີ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ຫົວໜ້າຄະນະປະຕິບັດງານພິເສດແຂວງບໍລິຄຳໄຊ ແລະ ແຂວງຮ່າຕິ້ງລົງນາມໂດຍສະຫາຍ ຟານກາວແທັງ ຄະນະປະຈຳພັກແຂວງ ຫົວໜ້າຄະນະຂົນຂວາຍປະຈຳຄະນະພັກແຂວງ ໂດຍຊ້ອງໜ້າ ທ່ານ ປອ ສຸວັນນີ ໄຊຊະນະ ຮອງເລຂາພັກແຂວງ ປະທານສະພາປະຊາຊົນແຂວງບໍລິຄຳໄຊ ປະທານສະມາຄົມມິຕະພາບລາວ-ຫວຽດນາມແຂວງບໍລິຄຳໄຊ ພ້ອມດ້ວຍຄະນະທັງສອງຝ່າຍເຂົ້າຮ່ວມເປັນສັກຂີພິຍານ ແລະ ເພື່ອຮັກສາຮີດຄອງປະເພນີລາວຊາວພຸດ ທີ່ໄດ້ສືບທອດປະຕິບັດກັນມາແຕ່ດຶກດຳບັນນັ້ນ ແຂວງບໍລິຄຳໄຊໄດ້ຈັດພິທີທາງສາສະໜາ ໂດຍພະສົງ 9 ອົງ ສວດມົນພາວັນນາໃຫ້ດວງວິນຍານຈົ່ງໄປສູ່ສຸກຂະຕິ, ພ້ອມທັງຈັດພິທີບາສີສູ່ຂວັນ ໃຫ້ແກ່ຄະນະປະຕິບັດງານພິເສດແຂວງຮ່າຕິ້ງ ເປັນການອ່ວຍພອນເຊີ່ງກັນ ແລະ ກັນ ທັງເປັນການຮັດແໜ້ນຄວາມສາມັກຄີແບບພິເສດຂອງ 2 ຊາດລາວ-ຫວຽດນາມ ເວົ້າລວມ, ເວົ້າສະເພາະ ກໍ່ແມ່ນແຂວງບໍລິຄຳໄຊ-ແຂວງຮ່າຕິ້ງ ດ້ວຍບັນຍາກາດອັນດີງາມ.