ອິງຕາມການສະຫຼຸບສັງລວມຂອງພະແນກຕໍາຫຼວດຈະລາຈອນ ປກສ ແຂວງບໍລິຄໍາໄຊ, ໄລຍະການສະເຫຼີມສະຫຼອງສົ່ງທ້າຍປີເກົ່າ ພ.ສ 2561 ຕ້ອນຮັບປີໃໝ່ ພ.ສ 2562 ໃນລະຫວ່າງວັນທີ 13 - 17 ເມສາ 2019 ນີ້, ພະແນກຕໍາຫຼວດຈາລະຈອນ ປກສ ແຂວງບໍລິຄໍາໄຊ ໄດ້ກະກຽມຈໍານວນພົນ, ເຫຼົ່າຮົບວິຊາສະເພາະ ລົງປະຈໍາການຢູ່ຕາມຈຸດສາຍທາງເຂົ້າ-ອອກເມືອງ, ທາງສາມແຍກ, ສີ່ແຍກ ແລະ ທາງຊອຍເສັ້ນຕ່າງໆ  ທຸກຕົວເມືອງພາຍໃນແຂວງບໍລິຄໍາໄຊ  ເພື່ອເປັນການລະບາຍການສັນຈອນໃຫ້ມີຄວາມສະດວກສະບາຍ ຮັບປະກັນໄດ້ຄວາມເປັນລະບຽບຮຽບຮ້ອຍ. 

    ຜ່ານການສະເຫຼີມສະຫຼອງບຸນກຸດສົງການປີໃໝ່ລາວ ໃນປີ 2019 ທົ່ວແຂວງບໍລິຄໍາໄຊ ມີອຸປະຕິເຫດເກີດຂຶ້ນທັງໝົດ 24 ກໍລະນີ, ທຽບໃສ່ປີ 2018 ເພີ່ມຂຶ້ນ 11 ກໍລະນີ, ພາຫະນະເປ່ເພ 45 ຄັນ, ທຽບໃສ່ປີ 2018 ເພີ່ມຂຶ້ນ 20 ຄັນ, ຄົນໄດ້ຮັບບາດເຈັບ 57 ຄົນ, ມີຄົນເສຍຊີວິດ 02 ຄົນ, ທຽບໃສ່ປີ 2018 ມີຄົນເສຍຊີວິດຫຼຸດລົງ 02 ຄົນ. ໃນນັ້ນ ເມືອງປາກຊັນ ມີອຸປະຕິເຫດເກີດຂຶ້ນ 05 ເລື່ອງ, ເມືອງ ບໍລິຄັນ 04 ເລື່ອງ, ເມືອງ ທ່າພະບາດ 02 ເລື່ອງ, ເມືອງ ປາກກະດິງ 04 ເລື່ອງ, ເມືອງ ຄໍາເກີດ 05 ເລື່ອງ, ເມືອງ ວຽງທອງ 04 ເລື່ອງ.

   ທາງພະແນກຕໍາຫຼວດຈະລາຈອນ ຍັງໃຫ້ຮູ້ຕື່ມອີກວ່າ ສາເຫດທີ່ພາໃຫ້ເກີດອຸປະຕິເຫດ ແມ່ນຍ້ອນນັກຂັບຂີ່ດື່ມສີ່ງມືນເມົາແລ້ວຂັບລົດ, ຂັບລົດໄວເກີນກໍານົດ, ສະພາບເຕັກນິກລົດບໍ່ຮັບປະກັນ ນອກນັ້ນ ນັກຂັບຂີ່ກໍ່ຄືຜູ້ໃຊ້ລົດໃຊ້ຖະໜົນ ຍັງຖືເບົາຕໍ່ກົດລະບຽບຈະລາຈອນ ຈື່ງເຮັດໃຫ້ບັນຫາອຸປະຕິເຫດ ໃນປີ 2019 ເພີ່ມຂຶ້ນ.