ບຸນຕຸດສົງການປີໃໝ່ລາວ ໄດ້ໝູນວຽນມາຮອດອີກຄັ້ງ ເຖິງປີນີ້ຈະມີສະພາບອາກກາດທີ່ຮ້ອນ ແລະ ອົບເອົ້າ ແຕ່ກໍ່ບໍ່ສາມາດເຮັດໃຫ້ບັນຍາກາດຂອງການຫຼິ້ນນ້ຳທີ່ມີຄວາມເບີກບານມ່ວນຊື່ນ, ກິດຈະກຳທາງສາສະໜາ ແລະ ວັດທະນະທຳ ຂອງພໍ່ແມ່ປະຊາຊົນຫຼຸດໜ້ອຍຖອຍລົງແຕ່ຢ່າງໃດ.

 

     ແມ່ຄຳຫຼ້າ ສີສຸດໂທ ຢູ່ບ້ານສີມຸງຄຸນ ໄດ້ໃຫ້ສຳພາດວ່າ ບຸນຕຸດສົງການກໍ່ປຽບເໝືອນວັນຄອບຄົວ ທຸກຄົນຕ້ອງມາລວມຕົວກັນ ເພື່ອພົບປະໂອ້ລົມຮັດແໜ້ນຄວາມສາມັກຄີພາຍໃນຄອບຄົວ ແລະ ອວຍໄຊໃຫ້ພອນເຊີ່ງກັນ ແລະ ກັນ. ແມ່ຄຳຫຼ້າ ຍັງເວົ້າຕື່ມອີກວ່າ ທຸກໆປີອອກຕົນຍາດໂຍມທັງຫຼາຍຈະໄດ້ເຂົ້າມາເຕົ້າໂຮມຢູ່ວັດ ເພື່ອເຮັດພິທີອັງເຊີນພຣະພຸດທະຮູບລົງຫົດສົງ ຕາມຮີດຄອງປະເພນີ ແມ່ຄຳຫຼ້າຍັງໄດ້ເວົ້າເຖິງການຫຼີ້ນບຸນປີໃໝ່ວ່າ ປີນີ້ກໍ່ເຫັນວ່າມີຄວາມຄຶກຄື້ນ ແລະ ເບີກບານມ່ວນຊື່ນຫຼາຍ ທຸກຄົນຫຼິ້ນນ້ຳດ້ວຍຄວາມເປັນລະບຽບຮຽບຮ້ອຍ ຖືກຕາມຮີດຄອງປະເພນີ ແລະ ລະບຽບກົດໝາຍທີ່ວາງອອກ.

 

     ການສົງພຣະນີ້ ກໍ່ແມ່ນເພື່ອເປັນສິລິມົງຄຸນແກ່ຕົວເອງ ແລະ ຄອບຄົວ, ນອກນັ້ນ ຍັງເປັນການຮັກສາວັດທະນະທຳ, ຮີດຄອງປະເພນີອັນດີງາມ ທີ່ບັນພະບູລຸດຂອງເຮົາໄດ້ປະຕິບັດມາແຕ່ບູຮານນະການໄວ້ໃຫ້ຄົງຢູ່ກັບຊາດລາວຕະຫຼອດໄປ. ແມ່ຄຳຫຼ້າ ຍັງໄດ້ຝາກໄປເຖິງລູກຫຼານທີ່ເກີດໃໝ່ໃຫຍ່ລຸນທັງຫຼາຍ ຈົ່ງຊ່ວຍກັນຮັກສາຮີດຄອງປະເພນີອັນດີງາມນີ້ໄວ້ ການເຂົ້າວັດສົງພຣະກໍ່ຕ້ອງແຕ່ງກາຍໃຫ້ເປັນລະບຽບຮຽບຮ້ອຍ ຜູ້ຍິງກໍ່ຄວນນຸ່ງສິ້ນ ແລະ ເສື້ອທີ່ມິດຊິດບໍ່ໃຫ້ບາງຈົນເກີນໄປ, ການຫຼິ້ນນ້ຳກໍ່ຕ້ອງໃຊ້ນ້ຳທີ່ສະອາດ ບໍ່ຄວນໃຊ້ນ້ຳສີ ຫຼື ໃຊ້ຖົງຢາງດຶກແກ່ງໃສ່ກັນ.