ພິທີປະກວດຂັນໝາກເບັງງາມ ໄດ້ຈັດຂຶ້ນໃນຕອນເຊົ້າຂອງວັນທີ 12 ເມສາ 2012 ຢູ່ທີ່ສະໂມສອນຂອງແຂວງບໍລິຄຳໄຊ ໂດຍການເຂົ້າຮ່ວມຂອງທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີບັນດາການນຳຂອງແຂວງ, ເມືອງ, ພະນັກງານອະວຸໂສບຳນານ, ພະນັກງານລັດຖະກອນ ແລະ ປະຊາຊົນພາຍໃນຕົວເມືອງປາກຊັນ ເຂົ້າຮ່ວມຢ່າງເປັນຂະບວນຟົດຟື້ນ.

 

    ຈຸດປະສົງຂອງການຈັດງານໃນຄັ້ງນີ້ ແມ່ນຈັດຂຶ້ນ ເພື່ອເຕົ້າໂຮມຄວາມສາມັກຄີ ພ້ອມດຽວກັນ ຍັງເປັນການປຸກລະດົມຂະບວນການອະນຸລັກປົກປັກຮັກສາ, ສົ່ງເສີມວັດທະນະທຳ, ຮີດຄອງປະເພນີອັນດີງາມຂອງຊາດ ບໍ່ໃຫ້ສູນຫາຍໄປຕາມການເວລາ ແລະ ເພື່ອເປັນການໂຊສີໄມ້ລາຍມືໃນການຕົບແຕ່ງໝາກເບັງ ເຊິ່ງໃນປີ 2019 ນີ້ ໄດ້ມີພາຂວັນໝາກເບັງເຂົ້າຮ່ວມປະກວດທັງໝົດ 7 ບ້ານ ຄື: ບ້ານອານຸສອນໄຊ, ສີວິໄລ, ປາກປຶງ, ໂພໄຊ, ສີມຸງຄຸນ, ຊະນະໄຊ ແລະ ບ້ານສວນສະຫວັນ, ຜ່ານການແຂ່ງຂັນສາມາດເລືອກໄດ້ຂັນໝາກເບັງທີ່ມີລວດລາຍສວຍງາມ, ຖືກຄົບຕາມເງື່ອນໄຂ ແລະ ດຶງດູດໃຈຄະນະກຳມະການ ລາງວັນຊະນະເລີດ ໄດ້ແກ່ບ້ານ ອານຸສອນໄຊ, ທີ 2 ໄດ້ແກ່ບ້ານ ປາກປຶງ, ທີ 3 ໄດ້ແກ່ບ້ານ ສວນສະຫວັນ.

 

    ສຳລັບປະເພດລາງວັນ ຊະນະເລີດ ໄດ້ຮັບເງິນສົດ 8 ແສນກີບ ພ້ອມໃບກຽດກຽດຕິຄຸນ, ອັນດັບ 2 ໄດ້ຮັບ 6 ແສນກີບ ພ້ອມໃບກຽດຕິຄຸນ, ອັນດັບ 3 ໄດ້ຮັບ ເງິນສົດ 4 ແສນກີບ ພ້ອມໃບກຽດຕິຄຸນ ແລະ ລາງວັນຊົມເຊີຍ ແມ່ນໄດ້ຮັບ 3 ແສນກີບພ້ອມໃບຍ້ອງຍໍ, ນອກຈາກນັ້ນ ກໍ່ຍັງໄດ້ມີພິທີບາສີສູ່ຂວັນ ແລະ ສົງນ້ຳໃຫ້ແກ່ພະນັກງານອະວຸໂສບຳນານ, ການນຳຂອງແຂວງ, ເມືອງ ເພື່ອເປັນການສະແດງຄວາມຮູ້ບຸນຄຸນ ຕາມຮີດຄອງປະເພນີລາວ ທີ່ປະຕິບັດກັນມາຕັ້ງແຕ່ບູຮານນະການ. ພ້ອມນີ້ ການນຳແຂວງບໍລິຄຳໄຊ ຍັງໄດ້ພ້ອມກັນຮ້ອງເພງສົ່ງທ້າຍປີເກົ່າຕ້ອນຮັບປີໃໝ່ ດ້ວຍຄວາມເບີກບານມ່ວນຊື່ນ.