ໃນວັນທີ 9 ເມສາ 2019 ຢູ່ຫ້ອງຮັບຮອງຂອງແຂວງ ທ່ານ ຫງວຽນຫ້າຍເຢືອງ ຫົວໜ້າພະແນກພົວພັນຕ່າງປະເທດແຂວງເຫງະອານ ພ້ອມຄະນະ ໄດ້ເຂົ້າອວຍພອນການນຳຂອງແຂວງບໍລິຄຳໄຊ ເນື່ອງໃນໂອກາດປີໃໝ່ລາວ ພສ 2562 ທີ່ໃກ້ຈະມາເຖິງນີ້ ໂດຍການຕ້ອນຮັບຂອງ ທ່ານ ບຸນມາ ບຸຈະເລີນ ຮອງເລຂາພັກແຂວງ ຮອງເຈົ້າແຂວງບໍລິຄຳໄຊ ພ້ອມດ້ວຍຄະນະ.

     

   ໃນໂອກາດນີ້ ທ່ານ ຫງວຽນຫ້າຍເຢືອງ ໄດ້ອວຍພອນໄຊອັນປະເສີດ ຕໍ່ການນຳຂອງແຂວງ ຕະຫຼອດເຖິງພະນັກງານ, ນັກຮົບທຸກທົ່ວໜ້າ ແລະ ພໍ່ແມ່ປະຊາຊົນບັນດາເຜົ່າຊາວແຂວງບໍລິຄຳໄຊ ຈົ່ງມີສຸຂະພາບແຂງແຮງ, ສືບຕໍ່ຊີ້ນໍາ-ນຳພາແຂວງບໍລິຄຳໄຊໃຫ້ກ້າວຂຶ້ນຢ່າງບໍ່ຢຸດຢັ້ງ. ພ້ອມດຽວກັນນັ້ນທັງສອງຝ່າຍ ຍັງໄດ້ຫວນຄືນການພົວພັນຮ່ວມມືກັນໃນໄລຍະຜ່ານມາ ເປັນຕົ້ນແມ່ນວຽກງານການສຶກສາ, ສະພາບການທາງດ້ານເສດຖະກິດ-ສັງຄົມ, ວຽກງານຊາຍແດນ ແລະ ວຽກງານອື່ນໆ   ເຊິ່ງໄດ້ສະແດງເຖິງມູນເຊື້ອອັນດີຂອງສອງຊາດລາວ-ຫວຽດນາມອ້າຍນ້ອງ ທີ່ໄດ້ມີຄວາມສາມັກຄີແບບພິເສດ ແລະ ການພົວພັນຮ່ວມມືຮອບດ້ານ ເວົ້າລວມ, ເວົ້າສະເພາະກໍ່ຄືແຂວງບໍລິຄຳໄຊ ສປປ ລາວ ກັບ ແຂວງເຫງະອານ ສສ ຫວຽດນາມ.

    ໂອກາດນີ້ ທ່ານຮອງເຈົ້າແຂວງບໍລິຄຳໄຊ ໄດ້ຕີລາຄາສູງ ແລະ ສະແດງຄວາມຂອບໃຈຕໍ່ຄະນະນຳແຂວງເຫງະອານ ພ້ອມທັງອວຍພອນໃຫ້ຄວາມສາມັກຄີແບບພິເສດ ແລະ ການພົວພັນຮ່ວມມືຮອບດ້ານ ລະຫວ່າງ ລາວ-ຫວຽດນາມ ຫວຽດນາມ-ລາວ ໃຫ້ມີຄວາມໜັກແໜ້ນໝັ້ນຄົງ ຍືນຍົງທະນົງແກ່ນ ຕະຫຼອດໄປ.