ກອງປະຊຸມເຊື່ອມຊືມ, ຜັນຂະຫຍາຍມະຕິກອງປະຊຸມຄົບຄະບໍລິຫານງານສູນກາງພັກຄັ້ງທີ 7 ສະໄໝທີ X ໄດ້ຈັດຂຶ້ນໃນຕອນເຊົ້າຂອງວັນທີ 09 ເມສາ 2019 ຢູ່ສະໂມສອນໃຫຍ່ຂອງແຂວງ ໃຫ້ກຽດເຊື່ອມຊືມໂດຍທ່ານ ແດນປີ ມູນທະດີ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ, ມີບັນດາສະມາຊິກພັກ, ພະນັກງານທົ່ວຂົງເຂດເສດຖະກິດ ແລະ ລັດວິສາຫະກິດ ຂົ້າຮ່ວມເຊື່ອມຊືມ.

          ທ່ານ ແດນປີ ມູນທະດີ ໄດ້ເຜີຍແຜ່ມະຕິ ວ່າດ້ວຍການເພີ່ມທະວີການນຳພາ ແກ້ໄຂຄວາມທຸກຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງຂອງການຄຸ້ມຄອງມະຫາພາກ ເຊິ່ງມີເນື້ອໃນເວົ້າເຖິງຄວາມຫຍຸ້ງຍາກ ແລະ ສິ່ງທ້າທາຍໃນດ້ານຕ່າງໆ ໃນນັ້ນລວມທັງຄວາມຫຍຸ້ງຍາກອັນໜັກໜ່ວງດ້ານເສດຖະກິດ-ການເງິນ ໄດ້ຮັບການໄຈ້ແຍກເລິກເຊິ່ງຕື່ມອີກ, ທັງຊີ້ໃຫ້ເຫັນວ່າ ບັນຫາທີ່ເກີດຂຶ້ນ ໄດ້ກາຍເປັນໄພອັນຕະລາຍທີ່ແທ້ຈິງ ຕໍ່ບົດບາດການນຳພາຂອງພັກ ແລະ ຕໍ່ລະບອບໃໝ່ຂອງພັກເຮົາ, ຕໍ່ສິ່ງທ້າທາຍ ທົດສອບອັນໜັກໜ່ວງ ຄະນະບໍລິຫານງານສູນກາງພັກ ໄດ້ຖືການແກ້ໄຂບັນຫາຄວາມຫຍຸ້ງຍາກດ້ານເສດຖະກິດ-ການເງິນ ເປັນວຽກງານທີ່ມີລັກສະນະເປັນໃຈກາງໃນວາລະການເຄື່ອນໄຫວຂອງຕົນ ພິເສດ ກົມການເມືອງສູນກາງພັກ ໄດ້ຊີ້ນຳຕໍ່ເນື່ອງ ຕໍ່ລັດຖະບານ, ສະພາແຫ່ງຊາດ ຄົ້ນຄ້ວາຫັນບັນດາມະຕິຂອງພັກ ໃຫ້ເປັນນິຕິກຳຕ່າງໆຈຳນວນຫຼວງຫຼາຍສົມຄວນ ເພື່ອເລັ່ງແກ້ໄຂບັນຫາຄວາມຫຍຸ້ງຍາກທີ່ເກີດຂຶ້ນ, ເຖິງຢ່າງໃດກໍ່ຕາມ ຖ້າເບິ່ງບັນຫາຢ່າງພາວະວິໄສ ຈະເຫັນວ່າ ຄຸນນະພາບການຈະເລີນເຕີບໂຕ ຂອງເສດຖະກິດແຫ່ງຊາດໃນໄລຍະຜ່ານມາ ຍັງມີລັກສະນະບອບບາງຫຼາຍ, ການຂາດດຸນງົບປະມານ ຂອງລັດຍັງສູງ, ບັນຫາໜີ້ສິນກໍ່ຍັງໜັກໜ່ວງ, ຄວາມຫຍຸ້ງຍາກໃນພາກລາຍຈ່າຍຂອງລັດ ຍັງຈະສົ່ງຜົນກະທົບແບບຕ່ອງໂສ້ເປັນວົງຈອນ ຕໍ່ຂົງເຂດເສດຖະກິດ-ສັງຄົມອື່ນໆ. ເພື່ອຮັບປະກັນໃຫ້ການແກ້ໄຂບັນຫາຄວາມຫຍຸ້ງຍາກ ແມ່ນຕ້ອງໄດ້ເພີ່ມທະວີຄວາມຮັບຜິດຊອບ ໂດຍຕ້ອງໄດ້ປະຕິບັດບົດບາດການນຳພາຂອງພັກຊີ້ນຳໂດຍກົງ ຂອງສູນກາງພັກ, ຍົກສູງຄວາມຮັບປິດຊອບ, ປັບປຸງພາຍໃນພັກໃຫ້ປອດໃສ, ເຂັ້ມແຂງ, ໜັກແໜ້ນ ແລະ ຍົກລະດັບການຕໍ່ສູ້ ທັບມ້າງກົນອຸບາຍຂອງພວກບໍ່ຫວັງດີ ທີ່ສວຍໃຊ້ຄວາມຫຍຸ້ງຍາກດ້ານເສດຖະກິດ-ການເງິນ ເພື່ອທຳລາຍບົດບາດການນຳພາຂອງພັກ.

    ກອງປະຊຸມ ຍັງໄດ້ເຊື່ອມຊືມ ມະຕິວ່າດ້ວຍການປັບປຸງຮາກຖານການເມືອງຂອງລະບອບປະຊາທິປະໄຕ ປະຊາຊົນໃຫ້ເຂັ້ມແຂງ ແລະ ໜັກແໜ້ນ, ຈຸດປະສົງ ແມ່ນເພື່ອເຮັດໃຫ້ພະນັກງານນຳພາ-ຄຸ້ມຄອງທຸກຂັ້ນ, ຕະລອດຮອດປະຊາຊົນບັນດາເຜົ່າ ເຂົ້າໃຈແຈ້ງ ກ່ຽວກັບສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງປະເທດເຮົາທີ່ຜ່ານມາ ແລະ ຜົນສະທ້ອນໃນສະເພາະໜ້າ ແລະ ຍາວນານ ກຳແໜ້ນ, ຄົ້ນຄ້ວາກຳນົດ ບັນດາມາດຕະການແທດຕົວຈິງ ແລະ ມີປະສິດທິຜົນສູງ ເພື່ອແກ້ໄຂສະພາບການດັ່ງກ່າວ ໃນທຸກຂົງເຂດວຽກງານ ເພື່ອຍູ້ແຮງການພັດທະນາໃນດ້ານຕ່າງໆ ໃຫ້ບັນລຸຄາດໝາຍທີ່ກອງປະຊຸມໃຫຍ່ຄັ້ງທີ 10 ຂອງພັກວາງອອກ. ພ້ອມນີ້ ຜູ້ເຂົ້າເຊື່ອມຊືມ ຈະໄດ້ແບ່ງໜ່ວຍ ເພື່ອຄົ້ນຄ້ວາທັງສອງມະຕິ ແລະ ລາຍງານຜົນການຄົ້ນຄວ້າຂອງແຕ່ລະໜ່ວຍ.