​ການສະ​ເຫຼີ​ມສະຫຼອງ​ບຸນ​ປີ​ໃໝ່​ລາວ ພສ 2562 ​ເປັນ​ປີ​ທີ່​ມີ​ຄວາມ​ໝາຍ​ຄວາມ​ສຳຄັນ ​ເຊິ່ງ​ເປັນ​ປີ​ທີ່​ທົ່ວ​ພັກ ​ແລະ ທົ່ວ​ປວງ​ຊົນ​ຊາວ​ແຂວງ​ບໍລິ​ຄຳ​ໄຊ​ສືບ​ຕໍ່​ຈັດ​ຕັ້ງ​ຜັນ​ຂະຫຍາຍມະຕິ​ກອງ​ປະຊຸມ​ໃຫຍ່ ຄັ້ງ​ທີ VI ຂອງ​ອົງຄະ​ນະ​ພັກ​ແຂວງ​ບໍລິ​ຄຳ​ໄຊ ​ແລະ   ແຜ​ນພັດທະນາ​ເສດຖະກິດ-ສັງຄົມຂອງແຂວງ ຄັ້ງ​ທີ IV​ ເຂົ້າ​ສູ່​ຊີວິດ​ຕົວ​ຈິງ ​ແລະ ມີ​ຜົນສຳ​ເລັດ​ໃນ​ຫຼາຍ​ດ້ານ ​ໂດຍ​ສະ​ເພາະ​ແມ່ນ​ການ​ຊີ້​ນຳ-ນຳພາ​ການ​ປົກ​ປັກ​ຮັກສາ ​ແລະ ສ້າງສາ​ພັດທະນາປະ​ເທດ​ຊາດ ກໍ່​ຄື​ແຂວງ​ບໍລິ​ຄຳ​ໄຊ ​ໃນ​ໄລຍະ​ຜ່ານ​ມາ​.

       ປະຈຸ​ບັນ​ທົ່ວ​ອົງຄະ​ນະ​ພັກ​ແຂວງ, ກຳລັງ​ປະກອບ​ອາວຸດ ​ແລະ ທົ່ວ​ປວງ​ຊົນ​ບັນດາ​ເຜົ່າຊາວ​ແຂວງ​ບໍລິ​ຄຳ​ໄຊພວມພ້ອມ​ກັນ​ມ່ວນ​ຊື່ນ​ໃນ​ການສະ​ເຫຼີ​ມສະ​ຫຼອງ​ວັນ​ສ້າງ​ຕັ້ງ​ແຂວງ​ບໍລິ​ຄຳ​ໄຊຄົບຮອບ 35 ປີຢ່າງ​​ເປີກ​ບານ​ມ່ວນ​ຊື່ນ. ພ້ອມ​ກັນ​ນັ້ນ, ​ແຂວງ​ພວກ​ເຮົາກໍ່​​ໄດ້ສຸມ​ໃສ່​​ແກ້​ໄຂວຽກ​ງານຈຸດ​ສຸມຍຸດ​ທະ​ສາດ​ຂອງ​ແຂວງ ​ໂດຍ​ສະ​ເພາະການ​ແກ້​ໄຂ 4 ​ເຖື່ອນ: ຄົນເຖື່ອນ, ລົດເຖື່ອນ, ອາວຸດເຖື່ອນ ແລະ ສິນຄ້າເຖື່ອນ, ຜ່ານການຊີ້ນຳ-ນຳພາ ແລະ ຈັດຕັ້ງປະຕິບັດວຽກງານໄດ້ພົບເຫັນບັນຫາຫຍຸ້ງຍາກບໍ່ສາມາດແກ້ໄຂໄດ້ຂາດຕົວ, ສະ​ນັ້ນ, ແຂວງໄດ້ກຳນົດ 9 ຫົວຂໍ້ ປະຊຸມສຳມະນາວິທະຍາສາດ ເພື່ອຊອກຫາວິທີແກ້ໄຂ ຄື: ວຽກ​ງານ ປກຊ-ປກສ, ປັບປຸງ​ອຳນາດ​ການ​ປົກຄອງ​ບ້ານ​ໃຫ້​ມີ​ຄວາມ​ເຂັ້ມ​ແຂງ, ການ​ແກ້​ໄຂ​ຄວາມທຸກ​ຍາກ, ບັນຫາ​ທີ່​ດິນ, ບັນຫາ​ຢາ​ເສບ​ຕິດ, ບັນຫາ​ສາສະໜາ, ອຸບັດ​ຕິ​ເຫດ​ຕາມ​ທ້ອງ​ຖະໜົນ, ການ​ຕັ້ງ​ສະນຳ, ການ​ຂັດ​ຂວາງ​ການ​ປະຕິບັດ​ວຽກງານ​ຂອງ​ເຈົ້າ​ໜ້າ​ທີ່. ຄຽງຄູ່ກັນນັ້ນ, ແຂວງບໍລິຄຳໄຊ ຂອງພວກ​ເຮົາ ກໍ່ຍັງພົບກັບສິ່ງທ້າທ້າຍຫຼາຍ​ຢ່າງ ເປັນຕົ້ນ​ຄວາມບໍ່​ສະຫງົບ, ຄວາມ​ຫຍຸ້ງຍາກ​ດ້ານ​ເສດຖະກິດ , ບັນດາ​ປະກົດ​ການ​ຫຍໍ້​ທໍ້​​ໃນ​ສັງຄົມ ​ແລະ ຄວາມຕ້ອງການພັດທະນາທ້ອງຖິ່ນມີຫຼາຍ ແຕ່ການສະໜອງທຶນເຂົ້າໃນການພັດທະນາແມ່ນມີຈຳກັດ.

       ​​ແຂວງ​ບໍລິ​ຄຳ​ໄຊ ຂອງ​ພວກ​ເຮົາ​ໃນ​ໄລຍະ​ຜ່ານ​ມາ ​ເຖິງ​ວ່າ​ມີ​ຄວາມ​ຫຍຸ້ງຍາກ ​ແລະ ທ້າ​ທາຍ​ຫຼາຍ​ປະການກໍ່ຕາມໂດຍ​ພາຍ​ໃຕ້​ການ​ຊີ້​ນຳ-ນຳພາ​ຂອງ​ອົງຄະ​ນະ​ພັກ​ແຂວງ ຕໍ່​ຄວາມ​ຮັບຜິດຊອບ​ໜ້າ​ທີ່​ການ​ເມືອງ​ສູງ​ ​ເຫັນ​ໄດ້​ວ່າ ​ເສດຖະກິດ​ຂອງ​ແຂວງ ​ໄດ້​ຮັບ​ການ​ພັດທະນາ ​ແລະ ຂະຫຍາຍຕົວ​ຢ່າງ​ຕໍ່​ເນື່ອງ, ປີ 2018 ອັດຕາ​ການ​ຂະຫຍາຍຕົວ​ທາງ​ດ້ານ​ເສດຖະກິດ ແມ່ນ 6.05%, ມູນ​ຄ່າ​ເພີ່ມ​ລວມຍອດ​ຜະລິດ​ຕະພັນ​ພາຍ​ໃນບັນລຸ 5.252 ຕື້​ກີບ, ສະ​ເລ່ຍ​ໃສ່​ຫົວ​ຄົນ​ໄດ້ 2.152 ​ໂດ​ລາ​ສະ​ຫາ​ລັດ ​ເທົ່າ​ກັບ 18 ລ້ານ​ກ່ວາ​ກີບ, ການ​ເກັບ​ລາຍ​ຮັບ​ເຂົ້າງົບປະມານບັນລຸ 910,92 ຕື້​ກີບ ​ລື່ນ​ແຜນ​ປີ 10,48%.

     ສະ​ນັ້ນ, ​ເຫັນ​ໄດ້​ວ່າ ຜ່ານການຊີ້ນໍາ-ນໍາພາຂອງຄະນະພັກ​​ແຕ່ລະ​ຂັ້ນໃນ​ໄລຍະ​ຜ່ານ​ມາໄດ້ເຮັດໃຫ້ແຂວງບໍລິຄໍາໄຊ ໂດຍລວມ ຍັງສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍດີ, ເສດຖະກິດສືບຕໍ່ຂະຫຍາຍຕົວຢ່າງຕໍ່ເນື່ອງ, ຂົງເຂດວັດທະນະທໍາ-ສັງຄົມ ແລະ ຂົງເຂດອຶ່ນໆ ກໍໄດ້ຮັບການບູລະນະ, ລະບົບການເມືອງນັບແຕ່ແຂວງລົງຮອດຮາກຖານໄດ້ຮັບການບູລະນະໃຫ້ເຂັ້ມແຂງໜັກແໜ້ນ, ຊີວິດການເປັນຢູ່ຂອງສະມາຊິກພັກ, ພະນັກງານ-ລັດຖະກອນ, ກໍາລັງປະກອບອາວຸດ ແລະ ປະຊາຊົນບັນດາເຜົ່າ ທາງດ້ານວັດຖຸ ແລະ ຈິດໃຈ ກໍ່ນັບມື້ດີຂຶ້ນ ແລະ ຄວາມທຸກຍາກກໍ່ນັບມື້ຖືກຕີຖອຍເປັນກ້າວໆ, ຄວາມແຕກໂຕນລະຫວ່າງຕົວເມືອງ ແລະ ຊົນນະບົດ ກໍ່ນັບມື້ຍັບເຂົ້າໃກ້ກັນ, ອັນ​ນັ້ນ, ​ແມ່ນ​ຜົນງານ​ໃນ​ການຈັດ​ຕັ້ງ​ປະຕິບັດ​ຂອງ​ອົງຄະ​ນະ​ພັກ​ແຂວງ ​ໃນ​ໄລຍະ​ຜ່ານ​ມາ.

         ບັນດາ​ທ່ານ ພໍ່​ແມ່ ພີ່ນ້ອງ​ຊາວ​ແຂວງ​ບໍລິ​ຄຳ​ໄຊ ທີ່​ຮັກ​ແພງ !

        ປີ​ ພສ 2562 ກົງ​ກັບ​ປີ​ກຸນ ສຳລັບ​ແຂວງ​ບໍລິ​ຄຳ​​ໄຊ ຂອງ​ພວກ​ເຮົາ ຍັງ​ສືບ​ຕໍ່​ແມ່ນ​ປີ​ໜຶ່ງ​ທີ່​ມີ​ສິ່ງ​ທ້າ​ທາຍ ​ແລະ ທົດ​ສອບ​ຫຼາຍ​ດ້ານ ​ເປັນ​ຕົ້ນ: ວຽກ​ງານ ປກຊ-ປກສ , ປະກົດ​ການ​ຫຍໍ້​ທໍ້​ໃນ​ດ້ານ​ຕ່າງໆ ທີ່​ເກີດ​ຂຶ້ນ​ໃນ​ສັງຄົມ, ຄວາມ​ຫຍຸ້ງຍາກ​ທາງ​ດ້ານ​ເສດຖະກິດ ​ແລະ ອື່ນໆ. ​ໃນ​ໂອກາດ​ນີ້ ຂ້າພະ​ເຈົ້າ ຕ່າງ​ໜ້າ​ໃຫ້​ຄະນະ​ພັກ, ອົງການ​ປົກຄອງ, ສະພາ​ປະຊາຊົນ​ແຂວງ ​ແລະ ​ໃນ​ນາມ​ສ່ວນ​ຕົວ ຂໍ​ຮຽກຮ້ອງ​ທຸກ​ພາກສ່ວນ​ຈົ່ງ​ໄດ້​ເພີ່ມ​ທະວີ​ຄວາມ​ສາມັກຄີ​ເປັນ​ຈິດ​ໜຶ່ງ​ໃຈ​ດຽວ, ມີ​ຄວາມ​ເອກະ​ພາບ ດ້ວຍ​ຄວາມ​ຮັບຜິດຊອບ​ສູງ​ເພື່ອ​ພ້ອມ​ພາກັນ​ຜ່ານ​ຜ່າ​ທຸກ​ຄວາມ​ຫຍຸ້ງຍາກ, ຊີ້​ນຳ-ນຳພາ​ໃນ​ການຈັດ​ຕັ້ງ​ປະຕິບັດ​ຢ່າງ​ແຂງແຮງ ບັນດາ​ຄາດໝາຍ​ສູ້​ຊົນ​ທີ່​ໄດ້​ກຳນົດ​ໄວ້​ໃນ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ VI ຂອງ​ແຂວງ ແລະ ແຜນ​ພັດທະ​ນາ​ເສດຖະກິດ-ສັງຄົມຂອງແຂວງ ຄັ້ງ​ທີ IV ກໍ່​ຄືວິໃສທັດຂອງແຂວງ​ແຕ່ປີ 2015 ຮອດ​ປີ 2030 ທີ່ວ່າ: ສ້າງແຂວງໃຫ້ເປັນປະຕູເສດຖະກິດ, ແຫຼ່ງຜະລິດພະລັງງານ, ບໍລິການທາງຜ່ານ, ຄຸ້ມຄອງສິ່ງແວດລ້ອມແບບຍືນຍົງ” ໃນນັ້ນ: ຖືເອົາການພັດທະນາເສດຖະກິດເປັນໃຈກາງ, ເອົາການພັດທະນາສັງຄົມ ເປັນສຳຄັນ, ການພັດທະນາຊັບພະຍາກອນມະນຸດເປັນກຸນແຈ ແລະ ຖືເອົາການປົກປັກຮັກສາສິ່ງ ແວດລ້ອມເປັນວຽກທີ່ຈຳເປັນ ​ໃຫ້​ປະກົດ​ຜົນ​ເປັນ​ຈິງ​ເທື່ອ​ລະ​ກ້າວ ​ແລະ ປະຕິບັດ​ສຳ​ເລັດ​ໃນ​ການ​ປົກ​ປັກ​ຮັກສາ ແລະ ສ້າງສາ​ແຂວງ​ບໍລິ​ຄຳ​ໄຊ ​ໃຫ້​ກ້າວ​ຂື້ນ​ຢ່າງ​ບໍ່​ຢຸດ​ຢັ້ງ.

         ບັນ​ດາທ່ານ ພໍ່​ແມ່ ພີ່ນ້ອງ ​ແລະ ​ເພື່ອ​ນມິດ​ສະຫາຍທັງຫຼາຍ !

       ອີກເທື່ອໜຶ່ງ ຂ້າພະເຈົ້າ ​ຂໍຮຽກຮ້ອງ​ມາຍັງພໍແມ່​ພີ່ນ້ອງຊາວແຂວງບໍລິຄຳໄຊຕໍ່​ກັບການສະເຫຼີມສະຫຼອງບຸນປີໃໝ່ ປະຈຳປີ ພສ 2562  ທີ່ຈະໝູນວຽນມາເຖິງນີ້ ເປັນໂອກາດໜຶ່ງທີ່ສຳຄັນໃນການສືບຕໍ່ເສີມຂະຫຍາຍ​ມູນເຊື້ອ, ຮີດຄອງປະເພນີອັນດີງາມ ແລະ ​ຄວາມສາມັກຄີ​ອັນ​ເປັນ​ປຶກ​ແຜ່ນຂອງຊາດ ທີ່ມີມາແຕ່ດົນນານ, ບຸນໃຫຍ່ປະຈຳຊາດ ​ໃຫ້ທົ່ວປວງຊົນລາວທັງຊາດ ຖືເອົາໂອກາດນີ້ອວຍໄຊໃຫ້ພອນເຊິ່ງກັນ ແລະ ກັນ, ຈັດຕັ້ງສະເຫຼີມສະຫຼອງດ້ວຍບັນຍາກາດເບີກບານມ່ວນຊື່ນ, ຖືກຕ້ອງຕາມຮີດຄອງປະເພນີ ແລະ ວັດທະນະທຳອັນດີງາມຂອງຊາດ ຕິດພັນກັບການສົ່ງເສີມການທ່ອງທ່ຽວ, ບົນຈິດໃຈປະຢັດມັດທະຍັດ ແລະ ຮຽກຮ້ອງມາຍັງພາກສ່ວນທີ່ກ່ຽວຂ້ອງຂອງແຂວງ ໃຫ້ເອົາໃຈໃສ່ຕິດຕາມ, ກວດກາ ຄຸ້ມຄອງລາຄາສິນຄ້າເຄື່ອງອຸປະໂພກ ແລະ ບໍລິໂພກໃນທ້ອງຕະຫຼາດ ເພື່ອບໍ່ໃຫ້ມີການສວຍໂອກາດຂື້ນລາຄາສິນຄ້າ ໂດຍບໍ່ມີເຫດຜົນ. ນອກນັ້ນ, ກໍ່ໃຫ້ເອົາໃຈໃສ່ໃນການຮັກສາຄວາມປອດໄພ ແລະ ຄວາມເປັນລະບຽບຮຽບຮ້ອຍໃນສັງຄົມ ໂດຍໃຫ້ມີການແບ່ງຄວາມຮັບຜິດຊອບໃນການຕິດຕາມ, ກວດກາເວນຍາມ ແລະ ປະຈຳການຢ່າງເປັນປົກກະຕິ ພ້ອມທັງເພີ່ມທະວີການໂຄສະນາ ເພື່ອສ້າງຈິດສຳນຶກໃຫ້ພົນລະເມືອງໃນທົ່ວແຂວງ ເຄົາລົບກົດລະບຽບຈະລາຈອນ ເພື່ອປ້ອງກັນອຸບັດຕິເຫດ ໃນຊ່ວງບຸນປີໃໝ່ລາວນີ້ ໃຫ້ມີຄວາມສະຫງົບປອດໄພຕະຫຼອດປີໃໝ່.

        ໃນ​ໂອກາດ​ປີໃໝ່ລາວ ພສ 2562 ປີ​ກຸນ ໃກ້ຈະມາເຖິງນີ້ ຂ້າພະເຈົ້າ ຕາງໜ້າ​ໃຫ້ຄະນພັກ, ອົງການ​ປົກຄອງ, ສະພາ​ປະຊາຊົນ​ແຂວງ ​ແລະ ໃນ​ນາມ​ສ່ວນ​ຕົວ ຂໍ​ສົ່ງພອນ​ໄຊ​ອັນ​ປະເສີດ​ມາ​ຍັງ​ສະ​ມາຊິກ​ພັກ ພະນັກງານ ທະຫານ ຕຳຫຼວດ, ນັກຮຽນ​ຮູ້ປັນຍາ​ຊົນ, ນັກທຸລະກິດ, ພໍ່ຄ້າ​-ຊາວ​ຂາຍ ແລະ ພໍ່ແມ່ພີ່ນ້ອງ​ຊາວ​ແຂວງບໍລິຄຳໄຊທຸກ​ທົ່ວ​ໜ້າ ຕະຫຼອດ​ຮອດ​ຊາວຕ່າງປະເທດ​ທີ່​ດຳລົງ​ຊີວິດ ແລະ ປະຕິບັດ​ວຽກ​ງານ​ຢູ່ແຂວງບໍລິຄຳໄຊ ຈົ່ງ​ປະສົບ​ແຕ່​ຄວາມ​ຜາ​ສຸກ​ໃນ​ຊີວິດ​ສ່ວນ​ຕົວ ແລະ ຄອບຄົວ, ມີຜົນສຳເລັດ​ໃນ​ໜ້າທີ່​ວຽກ​ງານ ຍາດ​ໄດ້​ໄຊຊະນະ​ໃໝ່​ທີ່​ຍິ່ງ​ໃຫຍ່ກ່ວາ​ເກົ່າ ພ້ອມ​ກັນ​ສະ​ເຫຼີ​ມສະຫຼອງບຸ​ນ​ປີ​ໃໝ່ດ້ວຍ​ຄວາມ​ມ່ວນ​ຊື່ນ ​ແລະ ຕະຫຼອດ​ປອດ​ໄພ​ທຸກ​ປະການ.

       ພິເສດ ຂ້າພະເຈົ້າ​ຂໍ​ຝາກຄວາມ​ຢ້ຽມຢາມ​ຖາມ​ຂ່າວ ຄວາມ​ເປັນ​ຫ່ວງ​ເປັນ​ໄຍ ແລະ ອວຍພອນ​ໄຊ​ອັນ​ອົບ​ອຸ່ນ​ມາ​ຍັງພະນັກງານ ທະຫານ ຕຳຫຼວດ ຖັນ​ແຖວ​ກຳລັງ​ປະກອບ​ອາວຸດ ທີ່ພວມ​ປະຕິບັດ​ໜ້າທີ່​ອັນ​ສູງ​ສົ່ງ ແລະ ມີ​ກຽດ​ສະຫງ່າ ​ໃນ​ການ​ປົກປັກ​ຮັກສາ​ເຂດ​ນ້ຳ​ແດນ​ດິນ​ອັນຄົບ​ຖ້ວນ​ຂອງ​ຊາດ​ລາວ ຈົ່ງ​ມີ​ສຸຂະ​ພາບ ແລະ ພາລະ​ນາ​ໄມ​ສົມບູນ​ແຂງ​ແຮງ ພ້ອມ​ດຽວ​ກັນ​ນີ້ ຂ້າພະເຈົ້າ​ກໍ່​ຂໍຝາກ​ຄວາມ​ຢ້ຽມຢາມ​ຖາມ​ຂ່າວ ມາ​ຍັງພະນັກງານ​ບຳນານ ແລະ ຜູ້​ອາວຸໂສ ຜູ້​ເສຍ​ອົງຄະ ແລະ ປະຊາຊົນ​ບັນດາເຜົ່າ​ທຸກ​ຖ້ວນ​ໜ້າທີ່​ກຳລັງ​ຮັກສາ​ປິ່ນປົວ​ຢູ່​ຕາມ​ໂຮງໝໍ​ແຫ່ງ​ຕ່າງໆ ຈົ່ງ​ຫາຍ​ຈາກ​ພະຍາດ​ໂລຄາ​ໂດຍ​ໄວ​ກັບ​ຄືນ​ເມືອຫາ​ຄອບຄົວ ກົມ​ກອງ ເພື່ອ​ສືບຕໍ່ປະກອບສ່ວນປະຕິບັດ​ໜ້າທີ່​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດຊາດ​ ກໍ່ຄືແຂວງບໍລິຄຳໄຊ ຂອງ​ພວກ​ເຮົາ.

      ອີກ​ເທື່ອ​ໜຶ່ງ ໃນ​ປີ​ກຸນ ​ພສ 2562 ນີ້ ໃຫ້​ທຸກໆ​ຄົນ​ຈົ່ງ​ມີ​ແຕ່ຄວາມສຸກ​ກາຍ​ສະບາຍ​ໃຈ ປາສະ​ຈາກ​ພະຍາດ​ໂລຄາ​ທັງ​ປວງ ແລະ ມີ​ໂຊກ​ໃຫຍ່​ໄຊ​ງາມ​ຕະຫຼອດ​ປີ.