ໃນຕອນເຊົ້າຂອງວັນທີ 08 ເມສາ 2019 ຢູ່ທີ່ຫ້ອງຮັບຮອງຂອງແຂວງ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ພ້ອມດ້ວຍພະແນກການທີ່ກ່ຽວຂ້ອງ ໄດ້ຕ້ອນຮັບການເຂົ້າພົບປະຢ້ຽມຢາມຂອງອາສາສະໝັກຈາກອົງການໄຈກາຈາກປະເທດຍີ່ປຸ່ນທັງ 3 ທ່ານ ຄື: ທ່ານ ນາງ ມິກະ ໂຮໂຊເດະ, ທ່ານ ນາງ ນາໂຫ ອຸເມະຕະນິ ແລະ ທ່ານ ເຄອິຊຸເກະ ນະກະມຸລະ ເນື່ອງໃນໂອກາດທີ່ມາເຄື່ອນໄຫວເຮັດວຽກຢູ່ແຂວງບໍລິຄໍາໄຊ.

     ໂອກາດນີ້ ທ່ານເຈົ້າແຂວງ  ໄດ້ລາຍງານສະພາບລວມໂດຍຫຍໍ້ ໃນການພັດທະນາເສດຖະກິດ - ສັງຄົມຂອງແຂວງ ໃນແຕ່ລະດ້ານໃນໄລຍະຜ່ານມາ ໃຫ້ກັບທາງອົງການໄຈກາທັງ 3 ທ່ານໄດ້ຮັບຊາບ ໂດຍສະເພາະກໍ່ແມ່ນການຈັດຕັ້ງປະຕິບັດການພັດທະນາເສດຖະກິດ-ສັງຄົມຂອງແຂວງ, ການເຕີບໃຫຍ່ຂະຫຍາຍຕົວຕະຫຼອດໄລຍະຜ່ານມາ.

  ຈຸດປະສົງຂອງການມາເຄື່ອນໄຫວວຽກງານຢູ່ແຂວງບໍລິຄຳໄຊ ກໍ່ແມ່ນເພື່ອມາຊ່ວຍວຽກງານຂອງແຕ່ລະດ້ານຄື: ທ່ານນາງ ມິກະ ໂຮໂຊເດະ ປະຈຳຢູ່ໂຮງໝໍແຂວງບໍລິຄຳໄຊ, ທ່ານນາງ ນາໂຫ ອຸເມະຕະນິ ປະຈຳຢູ່ພະແນກອຸດສາຫະກຳ ແລະ ການຄ້າແຂວງ ແລະ ທ່ານ ເຄອິຊຸເກະ ນະກະມຸລະ ປະຈຳຢູ່ ສູນວັດທະນະທຳເດັກ ເພື່ອຊ່ວຍສອນການສະແດງສິນລະປະ, ໂດຍການມາເຄື່ອນໄຫວໃນເທື່ອນີ້ ແມ່ນຈະໃຊ້ເວລາຢູ່ 2 ປີ ຈຶ່ງຈະສຳເລັດການປະຕິບັດວຽກງານ.