ເພື່ອຮັບປະກັນໃຫ້ແກ່ການສະເຫຼີມສະຫຼອງ ວັນບຸນປີໃໝ່ ພ.ສ 2562 ເລີ່ມແຕ່ວັນທີ 11-17 ເມສາ 2019 ທີ່ຈະໝູນວຽນມາເຖິງນີ້ ຮັບປະກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍທາງດ້ານສັງຄົມ ເຮັດໃຫ້ການສັນຈອນມີຄວາມສະດວກປອດໄພ ຫຼີກລ້ຽງການເກີດອຸບັດຕິເຫດ, ທັງເປັນການຈັດຕັ້ງປະຕິບັດເນື້ອໃນກອງປະຊຸມວິທະຍາສາດ ການຫຼຸດຜ່ອນອຸບັດຕິເຫດຢູ່ແຂວງບໍລິຄຳໄຊ ໃຫ້ໄດ້ຮັບຜົນຕາມຄາດໝາຍທີ່ວາງໄວ້ ມາໃນວັນທີ 08 ເມສາ 2019 ທ່ານ ພັຕ ບຸນມີ ລໍວັນໄຊ ຮອງພະແນກຈະລາຈອນແຂວງ ໄດ້ໃຫ້ສຳພາດຜ່ານສື່ມວນຊົນ ກ່ຽວກັບຄວາມພ້ອມ ແລະ ການປະຕິບັດກົດລະບຽບຈະລາຈອນໃນເທດສະການບຸນປີໃໝ່ລາວ.

          ຈາກການໃຫ້ສຳພາດຂອງທ່ານ ພັຕ ມີໄຊ ລໍວັນໄຊ ໄດ້ໃຫ້ຮູ້ວ່າ: ການຫຼິ້ນບຸນປີໃໝ່ລາວທີ່ຈະມາເຖິງນີ້ ທາງພະແນກຈະລາຈອນ ໄດ້ກະກຽມກຳລັງພົນ, ພະຫະນະອຸປະກອນ ຕາມຫຼັກການວິຊາສະເພາະ ແລະ ໄດ້ກຳນົດໜ້າທີ່ວຽກງານຂອງໜ້າວຽກຢ່າງລະອຽດ ເປັນຕົ້ນແມ່ນວຽກງານໂຄສະນາ ເຊິ່ງໄດ້ລົງໂຄສະນາແບບເຄື່ອນທີ່ ໂດຍຜ່ານມາໄດ້ລົງເຜີຍແຜ່ຕາມໂຮງຮຽນ ມັດທະຍົມ ແລະ ຕາມບ້ານຕ່າງໆ ກ່ຽວກັບການປະຕິບັດກົດລະບຽບຈະລາຈອນ, ໄດ້ແບ່ງຈຸປະຈຳການແຕ່ລະແຍກ ໂດຍສະເພາະ 3 ແຍກ 4 ແຍກ ຫຼື ບ່ອນທີ່ສັບສົນ, ມີຈຸດກວດກາຕິດຕາມສະພາບແບບເຄື່ອນທີ່ ແລະ ມີການຕັ້ງຈຸດກວດກາເຂົ້າອອກ ເພື່ອຕິດຕາມສະພາບ ແລະ ກ່າວເຕືອນຜູ້ລະເມີດ.

          ສຳລັບກໍລະນີ ມີຜູ້ລະເມີດ ເຊັ່ນວ່າ: ເມົາແລ້ວຂັບລົດ, ເກີດອຸບັດຕິເຫດແລ້ວຫຼົບໜີ, ຂີ່ລົດເປັນແພ-ແລ່ນໄວ, ເອົາສິ່ງກີດຂວາງການສັນຈອນ ແລະ ອື່ນໆ ຂັ້ນທຳອິດແມ່ນຈະໄດ້ສຶກສາອົບຮົມ, ປັບໄໝ ຫຼື ຂັ້ນຮຸນແຮງແມ່ນຈະໄດ້ດຳເນີນຕາມລະບຽບກົດໝາຍ.

     ຕອນທ້າຍ ທ່ານຍັງໄດ້ຮຽກຮ້ອງມາຍັງ ຜູ້ໃຊ້ລົດ ໃຊ້ຖະໜົນ ຈົ່ງມີສະຕິສູງ ໃນການສັນຈອນໄປ-ມາ ເພື່ອຫຼີກລ້ຽງຈາກການເກີດອຸບັດຕິເຫດ ທີ່ອາດເຮັດໃຫ້ມີການສູນເສຍຊັບສິນ ຫຼື ເສຍຊີວິດໄດ້ ສະນັ້ນ ທຸກຄົນຕ້ອງປະຕິບັດກົດລະບຽບຂອງຈະລາຈອນຢ່າງເຂັ້ມງວດ.