ໃນວັນທີ 7 ເມສາ 2019 ຢູ່ຫ້ອງຮັບຮອງຂອງແຂວງ ທ່ານ ຮ່ວາງ ຈຸງຢຸງ ຮອງເລຂາພັກຜູ້ປະຈຳການພັກແຂວງຮ່າຕິ່ງ ພ້ອມຄະນະ ໄດ້ເຂົ້າອວຍພອນການນຳຂອງແຂວງບໍລິຄຳໄຊ ເນື່ອງໃນໂອກາດປີໃໝ່ລາວ ພສ 2562 ທີ່ໃກ້ຈະມາເຖິງນີ້ ໂດຍການຕ້ອນຮັບຂອງ ທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງ ເຈົ້າແຂວງບໍລິຄຳໄຊ ພ້ອມດ້ວຍຄະນະ.

       ໃນໂອກາດນີ້ ທ່ານ ຮ່ວາງ ຈຸງຢຸງ ໄດ້ອວຍພອນໄຊອັນປະເສີດຕໍ່ການນຳຂອງແຂວງ ຕະຫຼອດຮອດພະນັກງານ, ນັກຮົບທຸກທົ່ວໜ້າ ແລະ ພໍ່ແມ່ປະຊາຊົນບັນດາເຜົ່າຊາວແຂວງບໍລິຄຳໄຊ ຈົ່ງມີສຸຂະພາບແຂງແຮງ, ສືບຕໍ່ຊີ້ນໍາ-ນຳພາແຂວງບໍລິຄຳໄຊໃຫ້ກ້າວຂື້ນຢ່າງບໍ່ຢຸດຢັ້ງ ແລະ ທ່ານຍັງໄດ້ສະແດງຄວາມຂອບໃຈແຂວງບໍລິຄຳໄຊ ທີ່ຍາມໄດ້ກໍ່ມີຄວາມສາມັກຄີທີ່ແໜ້ນແຟ້ນ ແລະ ຊ່ວຍເຫຼືອກັນດ້ວຍໄມຕີຈິດມິດຕະພາບອັນດູດດື່ມ ທີ່ເປັນມູນເຊື້ອອັນດີຂອງສອງຊາດລາວ-ຫວຽດນາມອ້າຍນ້ອງ ທີ່ໄດ້ມີການພົວພັນຮ່ວມມືຮອບດ້ານ ເວົ້າລວມ, ເວົ້າສະເພາະກໍ່ຄືແຂວງບໍລິຄຳໄຊ ສປປ ລາວ ກັບ ບັນດາແຂວງ ຂອງ ສສ ຫວຽດນາມ. ພ້ອມນີ້ ທ່ານເຈົ້າແຂວງບໍລິຄຳໄຊ ກໍ່ໄດ້ສະແດງຄວາມຂອບໃຈຕໍ່ ທ່ານ ຮ່ວາງ ຈຸງຢຸງ ພ້ອມດ້ວຍຄະນະ ທີ່ມາອວຍພອນໃນຄັ້ງນີ້ ພ້ອມທັງອວຍພອນໃຫ້ສາຍພົວພັນຮ່ວມມືຮອບດ້ານ ແລະ ນ້ຳໃຈຊ່ວຍເຫຼືອກັນດ້ວຍໄມຕີຈິດມິດຕະພາບອັນດູດດື່ມ ລະຫວ່າງ ລາວ-ຫວຽດນາມ ຫວຽດນາມ-ລາວ ຈົ່ງມີຄວາມໝັ້ນຄົງທະນົງແກ່ນຕະຫຼອດໄປ.

    ພ້ອມດຽວກັນນັ້ນ ໃນວັນທີ 8 ເມສາ 2019 ທ່ານ ປອ ກອງແກ້ວ ໄຊສົງຄາມ ພ້ອມດ້ວຍຄະນະ ຍັງໄດ້ຕ້ອນຮັບການເຂົ້າອວຍພອນຂອງ ທ່ານ ເຈີ່ນກົງຖິ້ງ ຫົວໜ້າສະຖານກົງສູນໃຫຍ່ ສສ ຫວຽດນາມ ປະຈຳແຂວງສະຫວັນນະເຂດ ໃນໂອກາດທີ່ເຂົ້າອວຍພອນຄັ້ງນີ້ ທ່ານຫົວໜ້າສະຖານກົງສູນ ກໍ່ຍັງໄດ້ສະແດງຄວາມຂອບໃຈທີ່ແຂວງບໍລິຄຳໄຊ ໄດ້ມີການພົວພັນຮ່ວມມືອັນສະໜິດແໜ້ນ ແລະ ໃຫ້ຄວາມຊ່ວຍເຫຼືອ, ອຳນວຍຄວາມສະດວກທຸກດ້ານຕໍ່ປະຊາຊົນຊາວຫວຽດນາມ ໂດຍສະເພາະແມ່ນອຳນວຍຄວາມສະດວກໃຫ້ຊາວຫວຽດກ່ຽວ ທີ່ເຂົ້າມາທຳມາຫາກີນຢູ່ແຂວງບໍລິຄຳໄຊ.