ເພື່ອເຮັດໃຫ້ການຮັບໃຊ້ ແລະ ຊ່ວຍເຫຼືອຄົນເຈັບ ໃນເທດສະການສົ່ງທ້າຍປີເກົ່າ ພ.ສ 2561  ແລະ ຕ້ອນຮັບປີໃໝ່ ພ.ສ 2562 ໃນລະຫວ່າງວັນທີ 14-16 ເມສາ 2019   ທີ່ຈະມາເຖິງນີ້ ມາໃນວັນທີ 5 ເມສາ 2019 ທ່ານ ດຣ ຈັນທອນ ຄູຫາເທບ ຮອງອຳນວຍການໂຮງໝໍແຂວງບໍລິຄຳໄຊ ໄດ້ໃຫ້ສຳພາດຜ່ານສື່ມວນຊົນຂອງແຂວງ ກ່ຽວກັບການກຽມຄວາມພ້ອມໃນການຮັບໃຊ້ຄົນເຈັບທີ່ອາດເກີດຂຶ້ນຈາກອຸບັດເຫດ.

          ຕາມການລາຍງານຂອງທ່ານ ດຣ ຈັນທອນ ຄູຫາເທບ ໄດ້ໃຫ້ຮູ້ວ່າ: ໃນການຮັບໃຊ້ຄົນເຈັບໃນເທດສະການປີໃໝ່ລາວໃນໄລຍະຜ່ານມາ ເຫັນວ່າເກີດຂຶ້ນຫຼາຍພໍສົມຄວນ ໂດຍປີ 2018 ເກີດຂຶ້ນ 46 ກໍລະນີ ແຕ່ເຈັບໜັກພຽງແຕ່ 5 ຄົນ ສຳລັບປີ 2019 ນີ້ ທາງໂຮງໝໍແຂວງ ໄດ້ກຽມຄວາມພ້ອມກ່ຽວກັບການບໍລິການຄົນເຈັບທີ່ອາດເກີດຂຶ້ນໃນຊ່ວງເທດສະການດັ່ງກ່າວເປັນຕົ້ນແມ່ນ ໄດ້ຝຶກອົບຮົມໃຫ້ບັນດາໂຮງຮຽນມັດທະຍົມໄດ້ 3 ແຫ່ງ, ຝຶກອົບຮົມໃຫ້ໂຮງຮຽນນາຍ 10 ຕຳຫຼວດ ແລະ ຕຳຫຼວດຈະລາຈອນ ໃຫ້ເຂົາເຈົ້າຮັບຮູ້ວິທີການຕ່າງໆ ກ່ຽວກັບການປະຖົມພະຍາບານເບື້ອງຕົ້ນຖືເປັນວຽກທີ່ສຳຄັນຫຼາຍ, ພ້ອມນີ້ໂຮງໝໍແຂວງ ຍັງໄດ້ກະກກກຽມພະນັກງານທຸກຂະແໜງການ ປະຈຳການຕະຫຼອດ 24 ຊົ່ວໂມງ ຖ້າເກີດກໍລະນີສຸກເສີນ ກໍ່ຕ້ອງໄດ້ເສີມກຳລັງເພື່ອໃຫ້ທັນກັບເຫດການ, ຮັບປະກັນອຸປະກອນຮັບໃຊ້ໃຫ້ພຽງພໍ, ນອກນັ້ນ ການກະກຽມພາຫະນະຮັບໃຊ້ ເປັນຕົ້ນແມ່ນລົດຮັບສົ່ງຄົນເຈັບ ແມ່ນກຽມພ້ອມລະອຽດພໍສົມຄວນ.

          ຕອນທ້າຍ ທ່ານຮອງອຳນວຍການໂຮງໝໍແຂວງ ຍັງຝາກເຖິງບັນດາພະນັກງານ, ທຳຫານ-ຕຳຫຼວດ ຕະຫຼອດຮອດປະຊາຊົນບັນດາເຜົ່າ ຈົ່ງໄດ້ພ້ອມກັນປະຕິບັດກົດລະບຽບຈະລາຈອນຢ່າງເຂັ້ມງວດ ເພື່ອຫຼຸດຜ່ອນການເກີດອຸບັດເຫດ ທີ່ອາດເກີດຂຶ້ນໃນເທດສະການດັ່ງກ່າວ.