ໃນວັນທີ 5 ເມສາ  2019 ນີ້ ຢູ່ທີາສະໂມສອນບ້ານນາແຫນ ເມືອງບໍລິຄັນ ໄດ້ຈັດກອງປະຊຸມສະຫຼຸບວຽກງານຮອບດ້ານໃນການຊີ້ນໍາ-ນໍາພາໃນໄລຍະ 3 ປີຜ່ານມາ ແລະ ວາງທິດທາງແຜນການ 2 ປີຕໍ່ໜ້າ ຂອງໜ່ວຍພັກບ້ານຂອງຕົນຂຶ້ນ ພາຍໄຕ້ການເປັນປະທານ ຂອງສະຫາຍ ໜູຈັນ ວົງພະຈັນ ເລຂາໜ່ວຍພັກບ້ານ - ນາຍ  ບ້ານ ນາແຫນ, ໃຫ້ກຽດເຂົ້າຮ່ວມຂອງສະຫາຍ ນາງ ວາລີ ສຸທະວົງ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ, ມີແຂກຖືກເຊີນຈາກໜ່ວຍພັກອ້ອມຂ້າງ ຕະຮອດສະມາຊິກພັກ ພາຍໃນໜ່ວຍ ເຂົ້າຮ່ວມ.

   ສະຫາຍ ໜູຈັນ ວົງພະຈັນເລຂາໜ່ວຍພັກບ້ານນາແຫນ ໄດ້ໃຫ້ກຽດຂຶ້ນຜ່ານບົດສະຫຼຸບການຈັດຕັ້ງປະຕິບັດວຽກງານຮອບດ້ານ 3 ປີຂອງບ້ານ ແລະ ທິດທາງແຜນການ 2 ປີຕໍ່ໜ້າ ວ່າ: ຜ່ານມາ ສະມາຊິກພັກຂອງພວກເຮົາ ໄດ້ນໍາເອົາແນວທາງນະໂຍບາຍຂອງພັກ, ມະຕິຄໍາສັ່ງ, ກົດໝາຍຂອງລັດ ລົງເຊື່ອມຊືມໃຫ້ແກ່ສະມາຊິກພັກ, ອໍານາດການປົກຄອງ ແລະ ພໍ່ແມ່ປະຊາຊົນບັນດາເຜົ່າເປັນປະຈໍາ, ເຮັດໃຫ້ອໍານາດການປົກຄອງ ພໍ່ແມ່ປະຊາຊົນ ມີແນວຄິດອຸ່ນອຽນທຸ່ນທ່ຽງ ເຊື້ອໜັ້ນຕໍ່ການນໍາພາຂອງພັກ ເດີນຕາມແນວທາງການປ່ຽນແປງໃໝ່ຂອງພັກ, ຮູ້ຈັກຈໍາແນກມິດສັດຕູໄດ້ຈະແຈ້ງ ເຮັດໃຫ້ບ້ານມີຄວາມສະຫງົບໂດຍພື້ນຖານ, ມີຄວາມເປັນລະບຽບຮຽບຮ້ອຍ ປະກົດການຫຍໍ້ທໍ້ຕ່າງໆ ໄດ້ຮັບການແກ້ໄຂຢ່າງທັນການ, ການພັດທະນາເສດຖະກິດສັງຄົມໄດ້ຮັບການຂະຫຍາຍຕົວຢ່າງຕໍ່ເນື່ອງ ມັນສະແດງອອກ ຄື: ຄອບຄົວທຸກຍາກໄດ້ຫຼຸດລົງ. ບ້ານ ນາແຫນ ມີສະມາຊິກພັກທັງໝົດ 28 ສະຫາຍ ຍິງ 09 ສະຫາຍ, ມີ 135 ຫຼັງຄາເຮືອນ, ມີພົນລະເມືອງທັງໝົດ 737 ຄົນ ຍິງ 359 ຄົນ, ອາຊີບຕົ້ນແມ່ນປູກຝັງ, ລ້ຽງສັດ ແລະ ຄ້າຂາຍເປັນສຳຮອງ ສະເລ່ຍລາຍຮັບຕໍ່ຫົວຄົນ ໄດ້ 9.162.000 ກີບ/ຄົນ/ປີ, ສະເລ່ຍເຂົ້າກີນ ໄດ້ 212 ກິໂລ/ຄົນ/ປີ.

      ໃນຕອນທ້າຍ ກອງປະຊຸມຍັງໄດ້ຮັບຟັງການໂອ້ລົມຂອງສະຫາຍນາງ ວາລີ ສຸດທະວົງ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ  ເຊີ່ງກ່ອນອຶ່ນ ສະຫາຍ ໄດ້ກ່າວສະແດງຄວາມຍ້ອງຍໍຊົມເຊີຍ ຕໍ່ຜົນງານ ແລະ ໄຊຊະນະ ຂອງການຈັດຕັ້ງບ້ານ ທີ່ໄດ້ເຄື່ອນໄຫວປະຕິບັດແນວທາງຂອງພັກ ລະບຽບກົດໝາຍຂອງລັດໃນໄລຍະຜ່ານມາ ແລະ ທ່ານຍັງເນັ້ນໜັກໃຫ້ຄະນະພັກ ແລະ ສະມາຊິກພັກ ຈົ່ງສືບຕໍ່ຊີ້ນຳ-ນຳພາເຮັດວຽກງານຂອງຕົນຮັບຜິດຊອບຢ່າງເຕັມສ່ວນ ເພື່ອຮັບໃຊ້ໜ້າທີ່ການເມືອງຂອງພັກ ຮັບໃຊ້ລະບອບປະຊາທິປະໄຕປະຊາຊົນ ແລະ ເພື່ອປະຊາຊົນ ຢ່າງແທ້ຈິງ.