ໃນວັນທີ 5 ເມສາ 2019 ຜ່ານມາ ຢູ່ຫ້ອງປະຊຸມຊັ້ນ III ຫ້ອງວ່າການປົກຄອງເມືອງວຽງທອງ ແຂວງບໍລິຄໍາໄຊ ໄດ້ຈັດກອງປະຊຸມໃຫຍ່ ຄັ້ງທີ IV ຂອງສະຫະພັນນັກຮົບເກົ່າເມືອງ ໂດຍການເປັນປະທານຂອງ ທ່ານ ຮທ ອ່ອນແກ້ວ ອຸດລາຍັນ ປະທານສະຫະພັນນັກຮົບເກົ່າເມືອງ, ເປັນກຽດເຂົ້າຮ່ວມຂອງ ທ່ານ ວົງສີ ທອງສີອິນທິປັນຍາ ກໍາມະການພັກແຂວງ,  ເລຂາພັກເມືອງ, ເຈົ້າເມືອງວຽງທອງ, ທ່ານ ພັທ ດວງຕາ ໄຊຍະທໍາ ປະທານສະຫະພັນນັກຮົບເກົ່າແຂວງບໍລິຄໍາໄຊ, ມີຜູ້ແທນ, ສະມາຊິກສະຫະພັນນັກຮົບເກົ່າ ແລະ ແຂກຖືກເຊີນ ເຂົ້າຮ່ວມ.

 

   ວາລະກອງປະຊຸມ ໄດ້ຜ່ານບົດລາຍງານການເມືອງ ໂດຍໄດ້ຕີລາຄາຄືນການຊິ້ນໍາ-ນໍາພາຂອງຄະນະບໍລິຫານງານສະຫະພັນນັກຮົບເກົ່າເມືອງໄລຍະຜ່ານມາ ເຊີ່ງມີທັງດ້ານດີ, ດ້ານອ່ອນ ແລະ ຂໍ້ຄົງຄ້າງ ພ້ອມທັງຜ່ານທິດທາງແຜນການໃນ 5 ປີຕໍ່ໜ້າ, ຜ່ານແຜນພັດທະນາເສດຖະກິດສັງຄົມຄັ້ງທີ III. ສະຫະພັນນັກຮົບເກົ່າເມືອງວຽງທອງປະກອບມີ 582 ສະຫາຍ ຍິງ 13 ສະຫາຍ, ມີໜ່ວຍນັກຮົບເກົ່າທັງໝົດ 26 ໜ່ວຍ ແລະ 9 ຈຸນັກຮົບເກົ່າ. ຜ່ານມາ ຄະນະນໍາສະຫະພັນນັກຮົບເກົ່າແຕ່ລະຂັ້ນໄດ້ເອົາໃຈໃສ່ສຶກສາອົບຮົມແນວຄິດການເມືອງ, ປຸກລະດົມຊຸກຍູ້ຄວາມສາມັກຄີ, ຊີ້ນໍາ-ນໍາພາດ້ານວິຊາສະເພາະຂອງສະຫະພັນນັກຮົບເກົ່າ, ຮັກສາທາດແທ້ມູນເຊື້ອຂອງກອງທັບ, ນໍາພາປະຕິບັດຕາມຂໍ້ແຂ່ງຂັນ 3 ດີ 6 ຮັກສາຂອງສະຫະພັນນັກຮົບເກົ່າແຫ່ງຊາດວາງອອກ. ຈາກນັ້ນ ບັນດາຜູ້ແທນແຕ່ລະຂົງເຂດ ກໍ່ໄດ້ຜັດປ່ຽນກັນຂຶ້ນປະກອບຄໍາຄິດ-ຄໍາເຫັນ ເພື່ອເປັນແນວທາງໃຫ້ແກ່ການຈັດຕັ້ງຜັນຂະຫຍາຍບັນດາຂໍ້ກຳນົດ ກົດລະບຽບ ແລະ ບັນດາມະຕິຕ່າງໆຂອງພັກວາງອອກ. 

        ກອງປະຊຸມໄດ້ປ່ອນບັດຄັດເລືອກເອົາຄະນະບໍລິຫານງານສະຫະພັນນັກຮົບເກົ່າເມືອງຊຸດໃໝ່ເຊີ່ງໄດ້ເລືອກເອົາ ສະຫາຍ ຮທ ອ່ອນແກ້ວ ອຸດລາຍັນ ເປັນປະທານ, ສະຫາຍ ພັຕ ຄໍາຜອງ ໄຊສົມຊາງ ເປັນຮອງປະທານ, ສະຫາຍ ພັທ ສົມໃຈ ໄຊປົວວ່າງ ເປັນຮອງປະທານ-ທັງເປັນປະທານກວດກາ.

         ກອງປະຊຸມຍັງໄດ້ມອບໃບຍ້ອງຍໍ, ຫຼຽນກຽດຕິຄຸນກອງທັບ ໃຫ້ຜູ້ທີ່ມີຜົນງານດີເດັ່ນໃນການປະຕິບັດວຽກງານ ໃນໄລຍະຜ່ານມາ ອີກດ້ວຍ.