ໃນຕອນ​ບ່າຍຂອງວັນທີ 13 ມີນາ 2019 ຢູ່​ທີ່​ຫ້ອງປະຊຸມເບີ 02 ຂອງແຂວງ ທ່ານ ຕົງເຢຢາງ ຢົງເຊງ ຮອງປະທານຄະນະບໍລິຫານງານສູນກາງສະຫະພັນກຳມະບານລາວ ພ້ອມດ້ວຍຄະນະ ໄດ້ເດີນທາງມາຢ້ຽມຢາມແຂວງບໍລິຄຳໄຊ ມີບັນດາຄະນະບໍຫານງານກຳມະບານແຂວງ, ປະທານສະຫະພັນກຳມະບານ 7 ຕົວເມືອງ ແລະ ປະທານກຳມະບານຮາກຖານອ້ອມຂ້າງແຂວງເຂົ້າຮ່ວມ.

       ໃນພິທີ ທ່ານ ດຳລົງ ທັບລາດ ປະທານສະຫະພັນກຳມະບານແຂວງ ໄດ້ຜ່ານບົດສະຫຼຸບ ການຈັດຕັ້ງປະຕິບັດມະຕິກອງປະຊຸມໃຫ່ຍໃນໄລຍະ 1 ປີຜ່ານມາ ເຫັນວ່າຫຼາຍວຽກງານຖືກປະຕິບັດ ແລະ ໄດ້ຮັບຜົນສຳເລັດເປັນຢ່າງດີ ໂດຍສະເພາະວຽກງານສຶກສາອົບຮົມການເມືອງ-ແນວຄິດ, ວຽກງານໂຄສະນາ, ວຽກງານຈັດຕັ້ງ, ກໍ່ສ້າງພະນັກງານກຳມະບານ ໃນປີ 2018 ໄດ້ຂະຫຍາຍໃໝ່ 437 ສະຫາຍ, ລວມສະມາຊິກກຳມະບານທັງໝົດ 9.282 ສະຫາຍ, ຍິງ 4.213 ສະຫາຍ ແລະ ຍັງໄດ້ເສີມຂະຫຍາຍວຽກງານການປົກປ້ອງສິດ ແລະ ຜົນປະໂຫຍດອັນຊອບທຳຂອງຊາວຜູ້ອອກແຮງງານ ໂດຍໄດ້ລົງຕິດຕາມກວດກາການໃຊ້ແຮງງານຢູ່ບັນດາຫົວໜ່ວຍຕ່າງໆພາຍໃນແຂວງເຊັ້ນ: ຮັບຄຳຮ້ອງຂໍ 8 ສະບັບ, ແກ້ໄຂຂໍ້ຂັດແຍ່ງແຮງງານໄດ້ 2 ເລື່ອງ, ທວງເງິນຄືນໃຫ້ກຳມະກອນໄດ້ 212.637.000 ກີບ, ໄດ້ສົ່ງຕາມຂະບວນຍຸຕິທຳ 1 ເລື່ອງ, ສ້າງຕັ້ງຜູ້ຕາງໜ້າຜູ້ອອກແຮງງານໄດ້ 2 ບໍລິສັດ ແລະ 4 ກຸ່ມແຮງງານນອກລະບົບ, ສຳລັບວຽກງານກອງທຶນກໍ່ໄດ້ເຄື່ອນໄຫວຢ່າງຕໍ່ເໜື່ອງໃນການລະດົມທຶນ ແລະ ປະຕິບັດນະໂຍບາຍໃຫ້ບັນດາສະມາຊິກກຳມະບານຜູ້ທີ່ປະສົບບັນຫາເຊັ້ນ: ເສຍຊີວິດ, ເກີດລູກ, ຜ່າຕັດ, ໄຟໃໝ້ເຮືອນ ແລະ ອື່ນໆ, ໃນປີ 2018 ປະຕິບັດນະໂຍບາຍທັງໝົດເປັນເງິນ 456.144.500 ກີບ.

       ພ້ອມນີ້ ທ່ານ ຕົງເຢຢາງ ຢົງເຊງ ໄດ້ໂອ້ລົມ ແລະ ໃຫ້ທິດຊີ້ນຳຕໍ່ ສະຫະພັນກຳມະບານແຂວງວ່າ: ກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ສະຫະພັນກຳມະບານແຂວງຍາດມາໄດ້ນັ້ນ ພ້ອມທັງຊີ້ນຳໃຫ້ກຳມະບານແຂວງ ສືບຕໍ່ກະກຽມການດຳເນີນກອງປະຊຸມໃຫຍ່ຂອງຕົນຢູ່ແຕ່ລະຂົງເຂດໃຫ້ສຳເລັດ, ບັນຫາບຸກຄະລາກອນ ຕ້ອງໄດ້ທາບທາມຢ່າງຈິງຈັງ ຮັບປະກັນບົດບາດການນຳພາ ຢ່າງກວ້າງຂວາງຂອງແຕ່ລະຂົງເຂດຂອງຕົນ, ການຮ່າງແຜນງານພາກຍຸດທະສາດ ບົດລາຍງານການເມືອງ ໃຫ້ມີຄວາມລະອຽດ, ເອົາໃຈໃສ່ວຽກງານກອງທຶນ ເຊິ່ງເປັນວຽກງານທີ່ສຳຄັນ ໃນການເຕົ້າໂຮມຄວາມສາມັກຄີຂອງພະນັກງານ ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານທົ່ວແຂວງ ແນໃສ່ເພື່ອຊ່ວຍເຫຼືອສະມາຊິກໃນເວລາເຈັບເປັນ ແລະ ເສຍຊີວິດ, ສືບຕໍ່ຊຸກຍູ້ ຂະບວນການແຂ່ງຂັນ 5 ເປັນເຈົ້າ ຕິດພັນກັບຂະບວນການສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ ໂດຍຖືເອົາວຽກງານແຂ່ງຂັນໜ້າທີ່ການເມືອງ ເປັນວຽກງານທີ່ສຳຄັນຂອງກຳມະບານ.