ໂດຍປະຕິບັດຕາມແຈ້ງການຂອງກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານກະຊວງ ປກສ ສະບັບເລກທີ 1615/ຄກຖ ລົງວັນທີ 24 ເມສາ 2018 ວ່າດ້ວຍການຂຶ້ນແຜນຝຶກອົບຮົມໃຫ້ ປກສ ບໍລິການປະຊາຊົນ ແລະ ປກສ  ບ້ານ, ສະນັ້ນ ມາໃນຕອນເຊົ້າວັນທີ 13 ມີນາ 2019 ນີ້ ຢູ່ທີ່ຫ້ອງການ ປກສ ກຸ່ມ ເທດສະບານ 02 ປກສ ເມືອງປາກຊັນ ແຂວງບໍລິຄໍາໄຊ ໄດ້ເປີດຝຶກອົບຮົມໃຫ້ ປກສ ບໍລິການປະຊາຊົນ ແລະ ປກສ  ບ້ານ ຂື້ນຢ່າງເປັນທາງການ ເປັນປະທານໂດຍ ທ່ານ ພັນໂທ ທົນທະວີ ໂພຄຳ ຄະນະພັກ, ຮອງຫົວໜ້າກອງບັນຊາການ ປກສ ເມືອງປາກຊັນ, ເປັນກຽດເຂົ້າຮ່ວມຂອງ ທ່ານ ພັນໂທ ບົວສອນ ກຽດຕະວົງ ຮອງຫົວໜ້າຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ກອງບັນຊາການ ປກສ ແຂວງ ບໍລິຄຳໄຊ, ມີຄູຝຶກຈາກຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ປກສ ແຂວງ ແລະ ເຈົ້າໜ້າທີ່ ປກສ ບໍລິການປະຊາຊົນ, ປກສ ບ້ານ, ເລຂາພັກບ້ານ - ນາຍບ້ານ, ນັກຝຶກອົບຮົມ ເຂົ້າຮ່ວມ.

           

            ໃນພິທີບັນດາຄູຝຶກຈາກຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ປກສ ແຂວງ, ປກສ ເມືອງ ກໍ່ໄດ້ຜັດປ່ຽນກັນເຜີຍແຜ່ ແລະ ບັນລະຍາຍ ເຊິ່ງເອກະສານທີ່ນຳມາຈັດຕັ້ງເຊື່ອມຊືມໃນບັ້ນຝືກອົບຮົມຄັ້ງນີ້ ລວມມີ 09 ເອກະສານ ຄື: ຄຳສັ່ງແນະນຳຂອງທ່ານນາຍົກລັດຖະມົນຕີ ສະບັບເລກທີ 27/ນຍ ລົງວັນທີ 05 ຕຸລາ 2011 ວ່າດ້ວຍການເພີ່ມທະວີວຽກງານສະກັດກັ້ນ ແລະ ໄກ້ໄຂປະກົດການຫຍໍ້ທໍ້ໃນສັງຄົມ, ຄຳສັ່ງຂອງລັດຖະມົນຕີວ່າການກະຊວງ ປກສ ສະບັບເລກທີ 1526/ປກສ ລົງວັນທີ21 ມີນາ 2013 ວ່າດ້ວຍການເພີ່ມທະວີວຽກງານກໍ່ສ້າງຮາກຖານການເມືອງຂອງກຳລັງ ປກສ, ເອກະສານວ່າດ້ວຍການຈັດຕັ້ງເຄື່ອນໄຫວຂອງກຳລັງ ປກສ ກຸ່ມບ້ານ - ປກສ ບ້ານ, ເອກະສານວ່າດ້ວຍການຈົດທະບຽນຄຸ້ມຄອງສຳມະໂນຄົວ ຄົນລາວ ແລະ ຄົນຕ່າງດ້າວ, ເອກະສານ ວ່າດ້ວຍການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ເອກະສານວຽກງານຄຸ້ມຄອງເປົ້າໝາຍ, ເອກະສານວຽກງານປ້ອງກັນສະຖານທີ່ເກີດເຫດ, ເອກະສານສືບສວນ - ສອບສວນຂັ້ນພື້ນຖານ ແລະ ແນະນຳຈົດກ່າຍປື້ມ 05 ຊະນິດ.

          ຕອນທ້າຍ ຍັງໄດ້ຮັບຟັງຄຳເຫັນໂອ້ລົມ ແລະ ທິດຊີ້ນຳຈາກ ທ່ານ ພັນໂທ ບົວສອນ ກຽດຕະວົງ ຮອງຫົວໜ້າຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ປກສ ແຂວງ ເຊິ່ງທ່ານໄດ້ເນັ້ນໜັກໃຫ້ກຳລັງ ປກສ ບໍລິການປະຊາຊົນ ແລະ ປກສ ບ້ານ ພ້ອມອຳນາດການປົກຄອງທຸກຂັ້ນ ໄດ້ນຳເອົາແນວທາງນະໂຍບາຍຂອງພັກ - ລະບຽບກົດໝາຍຂອງລັດ ແລະ ແນວທາງ ປກຊ - ປກສ ລົງເຜີຍແຜ່ໃຫ້ແກ່ປະຊາຊົນບັນດາເຜົ່າຮັບຮູ້ເຂົ້າໃຈ ແລະເຮັດໃຫ້ວຽກງານດັ່ງກ່າວກາຍເປັນວຽກງານຂອງທົ່ວປວງຊົນຮອບດ້ານ,  ຈົ່ງພ້ອມກັນນຳເອົາເນື້ອໃນທິດທາງແຜນການໄປຈັດຕັ້ງປະຕິບັດໃຫ້ປະກົດຜົນເປັນຈິງ ເພື່ອເຮັດໃຫ້ທົ່ວເມືອງປາກຊັນມີຄວາມສະຫງົບປອດໄພສັງຄົມມີຄວາມເປັນລະບຽບຮຽບຮ້ອຍດີຂຶ້ນເລື້ອຍໆ.