ດ້ວຍຄວາມເປັນຫ່ວງເປັນໄຍຈາກການນຳພັກ - ລັດຂັ້ນແຂວງ, ຂັ້ນເມືອງ ທີ່ມີຕໍ່ປະຊາຊົນບັນດາເຜົ່າ ທີ່ຢູ່ຫ່າງໄກສອກຫຼີກ ໃນວັນທີ 12 ມີນາ 2019 ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ພ້ອມດ້ວຍຄະນະ ຕາງໜ້າໃຫ້ກອງທຶນ 1 ດວງໃຈ ບໍລິຄຳໄຊຊ່ວຍເຫລືອສັງຄົມ ໄດ້ນຳເອົາເຄື່ອງນຸງຫົ່ມ ແລະ ເຄື່ອງໃຊ້ຈຳນວນໜຶ່ງ ໄປມອບໃຫ້ປະຊາຊົນທີ່ທຸກຍາກຢູ່ບ້ານນໍ້າປັນ ແລະ ບ້ານໂພນໝັ້ນ ເມືອງໄຊຈຳພອນ, ໃນນັ້ນມອບໃຫ້ປະຊາຊົນຜູ້ທຸກຍາກບ້ານນໍ້າປັນ 31 ຄອບຄົວ, ບ້ານໂພນໝັ້ນ 79 ຄອບຄົວ ແລະ ຄອບຄົວອານາຖາ 2 ຄອບຄົວ, ສຳລັບຄອບຄົວອານາຖານອກຈາກໄດ້ເຄື່ອງນຸ່ງຫົ່ມແລ້ວ ຍັງໄດ້ຮັບເຂົ້າສານໜຽວຄອບຄົວລະ 1 ເປົາ.

     

      ການລົງມອບເຄື່ອງຊ່ວຍເຫຼືອຂອງກອງທຶນ 1 ດວງໃຈບໍລິຄຳໄຊຊ່ວຍສັງຄົມໃນຄັ້ງນີ້ ເປັນການສ້າງຄວາມອົບອຸ່ນໃຫ້ແກ່ປະຊາຊົນຜູ້ທີ່ທຸກຍາກ, ຂາດເຂີນ ຢູ່ເຂດຫ່າງໄກສອກຫຼີກ ເປັນການອຸ້ມຊູຊ່ວຍເຫຼືອຊີວິດການເປັນຢູ່ອີກບາດກ້າວໜຶ່ງ, ພ້ອມນັ້ນ ຍັງເປັນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ແຜນພັດທະນາເສດຖະກິດ - ສັງຄົມຂອງແຂວງ. ບັນຍາກາດການມອບ - ຮັບເຄື່ອງຊ່ວຍເຫຼືອ ແມ່ນເຕັມໄປດ້ວຍຄວາມອົບອຸ່ນ ເຫັນໄດ້ຈາກຮອຍຍີ້ມສຽງຫົວຂອງຜູ້ມອບ ແລະ ຜູ້ໄດ້ຮັບ.

     ກອງທຶນ 1 ດວງໃຈ ບໍລິຄຳໄຊຊ່ວຍສັງຄົມ ໃນໄລຍະຜ່ານມາ ແມ່ນໄດ້ມອບເຄື່ອງຊ່ວຍເຫຼືອ ເພື່ອບັນເທົາທຸກໃຫ້ພໍ່ແມ່ປະຊາຊົນຜູ້ທີ່ທຸກຍາກ ແລະ ຜູ້ດ້ອຍໂອກາດ ກໍ່ຄືຜູ້ທີ່ປະສົບອັກພີໄພເປັນຈຳນວນຫຼວງຫຼາຍ, ນອກນັ້ນ ຍັງໄດ້ຮ່ວມສ້າງສາຍົກລະດັບການສຶກສາ ໂດຍການບູລະນະອາຄານໂຮງຮຽນອະນຸບານ ແລະ ຊັ້ນປະຖົມເປັນຈຳນວນຫຼາຍແຫ່ງ.