ໃນລະຫວ່າງວັນທີ 6 - 7 ມີນາ 2019 ທ່ານ ນາງ ສີໃສ ລືເດດມູນສອນ ກຳມະການສູນກາງພັກ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 11 ແຂວງບໍລິຄຳໄຊ ພ້ອມດ້ວຍສະມາຊິກສະພາປະຊາຊົນແຂວງ ໄດ້ລົງເຄື່ອນໄຫວພົບປະຢ້ຽມຢາມ ແລະ ເຜີຍແຜ່ຜົນສຳເລັດ ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ແລະ ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຊຸດທີ I ໃຫ້ພໍ່ແມ່ປະຊາຊົນບ້ານຫາດໄຄ້, ບ້ານຫ້ວຍເລິກ, ບ້ານພະບາດໂພນສັນ (ຄຸ້ມນາເຂົ້າພະ) ແລະ ໂຮງຮຽນທະຫານຊາຍແດນ 712 ເມືອງທ່າພະບາດ.

     ໃນໂອກາດນີ້ ຄະນະ ສສຊ ແລະ ສສຂ ໄດ້ຮັບຟັງການລາຍງານສະພາບການພັດທະນາເສດຖະກິດ - ສັງຄົມ ຂອງບ້ານໂດຍຫຍໍ້. ຈາກນັ້ນ ຄະນະ ສສຊ, ສສຂ  ຍັງໄດ້ນຳເອົາເນື້ອໃນຈິດໃຈຜົນສຳເລັດຂອງກອງປະຊຸມດັ່ງກ່າວ ເປັນຕົ້ນແມ່ນມະຕິກອງປະຊຸມ ສສຊ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ - ສັງຄົມ ປະຈຳປີ 2018 ແລະ ທິດທາງແຜນການ ປະຈຳປີ 2019 ແລະ ມະຕິກອງປະຊຸມ ສພຂ ວ່າດ້ວຍການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ - ສັງຄົມ ປະຈຳປີ 2018 ແລະ ທິດທາງແຜນການ ປະຈຳປີ 2019. ພ້ອມກັນນັ້ນ ຄະນະຍັງໄດ້ຍົກໃຫ້ເຫັນບາງມາດຕາຂອງກົດໝາຍວ່າດ້ວຍຄອບຄົວ, ວຽກງານສາສະໜາ ແລະ ຊົນເຜົ່າ, ວຽກງງານບົດບາດຍິງ - ຊາຍ, ໄພຄຸກຄາມ ແລະ ຜົນຮ້າຍຂອງຢາເສບຕິດ. ຫຼັງຈາກນັ້ນ ກໍໄດ້ເປີດໂອກາດໃຫ້ພໍ່ແມ່ປະຊາຊົນ ໄດ້ປະກອບຄຳຄິດ - ຄຳເຫັນ ແລະ ຄຳສະເໜີບາງບັນຫາທີ່ພໍ່ແມ່ປະຊາຊົນໃຫ້ຄວາມສົນໃຈ  ເພື່ອຊີ້ແຈງໃຫ້ຄວາມກະຈ່າງແຈ້ງ ແລະ ໃຫ້ພາກສ່ວນທີ່ກ່ຽວຂອງນໍາໄປພິຈາລະນາ ແລະ ແກ້ໄຂໃນຕໍ່ໜ້າ. ໃນໂອກາດດັ່ງກ່າວ ທ່ານຮອງປະທານສະພາແຫ່ງຊາດພ້ອມດ້ວຍຄະນະ ຍັງໄດ້ນຳເອົາອຸປະກອນ ແລະ ເຄື່ອງຫຼິ້ນກິລາຈຳນວນໜຶ່ງ ໄປມອບໃຫ້ໂຮງຮຽນທະຫານຊາຍແດນ 712 ເຊິ່ງປະກອບດ້ວຍບານເຕະ, ບານສົ່ງ, ກະຕໍ້, ຕາໜ່າງໃສ່ໂກນບານເຕະ, ຕາໜ່າງບານສົ່ງ ແລະ ຕາໜ່າງກະຕໍ້ ລວມມູນຄ່າທັງໝົດ 2 ລ້ານກ່ວາກີບ.