ພິທີປາຖະກະຖາລະນຶກວັນສ້າງຕັ້ງ ອົງການກວດກາພັກ - ລັດ ສປປ ລາວ ຄົບຮອບ 37 ປີ (16 ກຸມພາ 1982 - 16 ກຸມພາ 2019) ໄດ້ຈັດຂຶ້ນໃນວັນທີ 13 ມີນາ 2019 ຢູ່ສະໂມສອນໃຫ່ຍຂອງແຂວງ ໃຫ້ກຽດປາຖະກະຖາໂດຍ ທ່ານ ແດນປີ ມູນທະດີ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງບໍລິຄຳໄຊ, ມີການນຳຂອງແຂວງ, ຄະນະກວດກາພັກ - ລັດແຕ່ລະຂັ້ນ, ພະນັກງານອາວຸໂສບຳນານ, ນາຍ ແລະ ພົນທະຫານ, ນາຍ ແລະ ພົນຕຳຫຼວດ ແລະ ພະນັກງານລັດຖະກອນອ້ອມຂ້າງແຂວງ ເຂົ້າຮ່ວມ.

     ວຽກງານກວດກາພັກ - ລັດ ແມ່ນວຽກງານໜຶ່ງໃນພາລະບົດບາດນຳພາຄຸ້ມຄອງການຈັດຕັ້ງ, ຢາກນຳພາ - ຄຸ້ມຄອງໄດ້ດີ  ແລະ ໄປຕາມຈຸດປະສົງທີ່ກຳນົດໄວ້ ຕ້ອງມີການຕິດຕາມ - ກວດກາ ພັກເຮົາກໍ່ເຫັນໄດ້ຄວາມສຳຄັນ ແລະ ເອົາໃຈໃສ່ວຽກງານກວດກາເປັນພິເສດ ໄດ້ກຳນົດທັດສະນະຢ່າງຈະແຈ້ງວ່າ “ ມີການນຳພາຕ້ອງມີການກວດກາ”, ໃນກອງປະຊຸມໃຫ່ຍຄັ້ງທີ II ຂອງພັກປີ 1972 ໄດ້ກຳນົດວຽກງານກວດກາ ແລະ ການຈັ້ດຕັ້ງຄະນະກວດກາພັກໃນກົດລະບຽບພັກເຊິ່ງລະບຸວ່າ: “ ກອງປະຊຸມຄະນະບໍລິຫານງານສູນກາງພັກ, ແຂວງ, ຂັ້ນເມືອງ ແລະ ຂັ້ນພື້ນຖານ ຕ້ອງເລືອກເອົາກຳມະການພັກຈຳນວນໜຶ່ງ ມາຈັດຕັ້ງເປັນຄະນະຮັບຜິດຊອບວຽກງານກວດກາ ແລະ ຕິດຕາມການປະຕິບັດວິໄນຕໍ່ສະມາຊິກພັກ”. ພາຍຫຼັງສະຖາປະນາ ສປປ ລາວ ໃນວັນທີ 2 ທັນວາ 1975 ວຽກງານກວດກາພັກໄດ້ສືບຕໍ່ປັບປຸງ, ມີການຈັດຕັ້ງ ແລະ ເຄື່ອນໄຫວທີ່ມີລັກສະນະເອກະລາດຈະແຈ້ງກ່ວາເກົ່າ ໃນກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ II ປີ 1980 ຈຶ່ງໄດ້ກຳນົດວ່າ ຕ້ອງຈັດຕັ້ງຄະນະກວດກາຂຶ້ນ ແລະ ໄດ້ອອກດຳລັດເລກທີ 02 ລົງວັນທີ 16 ກຸມພາ 1982 ໄດ້ກຳນົດໃຫ້ສ້າງຕັ້ງຄະນະກວດກາພັກ - ລັດ ຊຶ່ງເປັນກົງຈັກເອກະລາດ ແລະ ເຄື່ອນໄຫວຕາມຂໍ້ກຳນົດເລກທີ 04 ລົງວັນທີ 16 ກຸມພາ 1982 ວ່າດ້ວຍຄະນະກຳມະການກວດກາພັກ - ລັດ ຂອງສູນການພັກປະຊາຊົນປະຕິວັດລາວ, ສະພາລັດຖະມົນຕີ ສປປ ລາວ. ນັບແຕ່ໄດ້ຮັບການສ້າງຕັ້ງ ກັງຈັກການຈັດຕັ້ງຄະນະກຳມະການກວດກາ ໄດ້ເຄື່ອນໄຫວຕິດຕາມ, ກວດກາພັກ, ກວດກາລັດ ແລະ ຕ້ານການສໍ້ລາດບັງຫຼວງຢ່າງຮອບດ້ານ, ເຂັ້ມງວດ ແລະ ໂປ່ງໃສທີ່ສຸດ.

ສຳລັບແຂວງບໍລິຄຳໄຊ ມາຮອດປະຈຸບັນ ໄດ້ມີການປະຕິບັດວິໄນ ຕໍ່ການຈັດຕັ້ງພັກທັງໝົດ 6 ໜ່ວຍ, ໃນນີ້ຂັ້ນຕິຕຽນ 1 ໜ່ວຍ, ກ່າວເຕືອນ 1 ໜ່ວຍ, ຍຸບການຈັດຕັ້ງພັກ 4 ໜ່ວຍ, ປະຕິບັດວິໄນຕໍ່ສະມາຊິກພັກ 416 ສະຫາຍ ໃນນັ້ນ ຂັ້ນຕິຕຽນ 35 ສະຫາຍ, ກ່າວເຕືອນ 121 ສະຫາຍ, ປົດຕຳແໜ່ງ 34 ສະຫາຍ, ໂຈະຮ່ວມຊີວິດພັກ 47 ສະຫາຍ ແລະ ອື່ນໆ 179 ສະຫາຍ, ນັບແຕ່ປີ 1998 ພົບເຫັນຊັບສິນຂອງລັດເສຍຫາຍ 2.106.023,16 ໂດລາ, 4.340.120 ບາດ, 77.744.484.498 ກີບ ແລະ 20.000.000 ດົ່ງ, ສາມາດເກັບກູ້ຄືນໄດ້ແລ້ວ 1.713.497,37 ໂດລາ, 1.040.136 ບາດ, 70.693.880.211 ກີບ ແລະ 20.000.000 ດົ່ງ, ພົບເຫັນພຶດຕິກຳການສໍ້ລາດບັງຫຼວງ 28 ກໍລະນີ, ໄດ້ຮັບຄຳຮ້ອງ - ຄຳສະເໜີ 423 ເລື່ອງ, ແກ້ໄຂແລ້ວ 358 ເລື່ອງ, ສົ່ງພາກສ່ວນກ່ຽວຂ້ອງ 57 ເລື່ອງ, ສືບຕໍ່ແກ້ໄຂ 3 ເລື່ອງ ແລະ ຕິດຕາມ 5 ເລື່ອງ.