ກອງປະຊຸມເຜີຍແຜ່ກົດໝາຍວ່າດ້ວຍລັດຖະບານ ສະບັບປັບປຸງ 2016 ແລະ ນິຕິກຳກ່ຽວຂ້ອງ ໄດ້ຈັດຂຶ້ນໃນຕອນເຊົ້າຂອງວັນທີ 13 ມີນາ 2019 ຢູ່ຫ້ອງວ່າການປົກຄອງແຂວງບໍລິຄຳໄຊ ໂດຍການເປັນປະທານຂອງທ່ານ ສຈ.ປອ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ, ມີການນຳຂອງແຂວງ, ເມືອງ ຈາກ 5 ແຂວງ ຄື: ແຂວງວຽງຈັນ, ໄຊສົມບູນ, ບໍລິຄຳໄຊ, ຄຳມ່ວນ ແລະ ແຂວງສະຫວັນນະເຂດ ເຂົ້າຮ່ວມ.

          ທ່ານ ສຈ.ປອ ຈະເລີນ ເຢຍປາວເຮີ ໄດ້ກ່າວຕໍ່ພິທີວ່າ: ໃນທ່າມກາງທົ່ວພັກ, ທົ່ວກອງທັບ ແລະ ທົ່ວປວງຊົນລາວທັງຊາດ ດຳເນີນການຈັດຕັ້ງ ແລະ ຜັນຂະຫຍາຍເນື້ອໃນມະຕິກອງປະຊຸມໃຫຍ່ ຄັ້ງທີ 10 ຂອງພັກປະຊາຊົນປະຕິວັດລາວ ໃຫ້ປະກົດຜົນສຳເລັດເທື່ອລະກ້າວ ເຊິ່ງມະຕິມີທິດຊີ້ນຳ ກ່ຽວກັບການຍົກສູງປະສິດທິພາບໃນການຄຸ້ມຄອງລັດດ້ວຍກົດໝາຍ ການສ້າງຄວາມໝັ້ນຄົງໃຫ້ແກ່ການສ້າງລັດປະຊາທິປະໄຕປະຊາຊົນ ແມ່ນຕ້ອງສ້າງໃຫ້ເປັນລັດທີ່ປົກຄອງດ້ວຍກົດໝາຍ ແລະ ຕ້ອງດຳເນີນໄປບົນພື້ນຖານຢຶດໝັ້ນຫຼັກການທີ່ວ່າ ພັກນຳພາ ແລະ ກຳອຳນາດຕາມກົດໝາຍ, ລັດຄຸ້ມຄອງສັງຄົມດ້ວຍກົດໝາຍ, ປະຊາຊົນເປັນເຈົ້າ ສະເໝີພາບຕໍ່ກົດໝາຍ. ການເຜີຍແຜ່ໃນຄັ້ງນີ້ ມີທັງໝົດ 4 ເອກະສານ ຄື: ກົດໝາຍວ່າດ້ວຍລັດຖະບານ ( ສະບັບປັບປຸງ ) ມີ 8 ໝວດ 36 ມາດຕາ, ດຳລັດວ່າດ້ວຍການຈັດຕັ້ງ ແລະ ການເຄື່ອນຂອງຫ້ອງວ່າການສຳນັກງານນາຍົກລັດຖະມົນຕີ ເລກທີ 93/ນຍ ມີ 5 ໝວດ 12 ມາດຕາ, ດຳລັດວ່າດ້ວຍການປະສານງານ ລະຫວ່າງ ບັນດາກະຊວງ, ອົງການລັດທຽບເທົ່າກະຊວງ, ແຂວງ, ນະຄອນຫຼວງ ກັບ ສຳນັກງານນາຍົກລັດຖະມົນຕີ ເລກທີ 177/ລບ ມີ 5 ໝວດ 27 ມາດຕາ ແລະ ຄຳແນະນຳ ກ່ຽວກັບການຈັດຕັ້ງ ແລະ ການເຄື່ອນໄຫວຂອງຫ້ອງວ່າການຂັ້ນແຂວງ ແລະ ຂັ້ນເມືອງ.

     ທັງນີ້ ກໍ່ເພື່ອເຮັດໃຫ້ຜູ້ເຂົ້າຮ່ວມ ໄດ້ຮັບຮູ້ເຊື່ອມຊືມເນື້ອໃນຈິດໃຈຂອງບັນດານິຕິກຳດັ່ງກ່າວ ແລະ ນຳໄປຈັດຕັ້ງຜັນຂະຫຍາຍ ເຂົ້າສູ່ຂົງເຂດວຽກງານ ແລະ ທ້ອງຖິ່ນຂອງຕົນ ໃຫ້ປະກົດຜົນເປັນຈິງ, ແນໃສ່ເຮັດໃຫ້ແທດເໝາະກັບສະພາບການພັດທະນາເສດຖະກິດ - ສັງຄົມ ກໍ່ຄືເງື່ອນໄຂຈຸດພິເສດ ໃນການບໍລິຫານຄຸ້ມຄອງລັດໃນແຕ່ລະໄລຍະ, ທັງເຮັດໃຫ້ການປະສານງານລະຫວ່າງ ຫ້ອງວ່າການສຳນັກງານນາຍົກລັດຖະມົນຕີ ກັບບັນດາຂະແໜງການຂອງສູນກາງ ແລະ ທ້ອງຖິ່ນ ມີຄວາມກົມກຽວກັນດີ, ມີຄວາມຄ່ອງແຄ້ວ ແລະ ກາຍເປັນບ່ອນອີງໃຫ້ແກ່ການຈັດຕັ້ງ ແລະ ເຄື່ອນໄຫວວຽກງານ ນັບມື້ນັບໄດ້ຮັບຜົນດີຂຶ້ນເປັນກ້າວໆ. ພ້ອມນີ້ ຜູ້ເຂົ້າຮ່ວມ ຍັງຈະໄດ້ພ້ອມກັນຄົ້ນຄ້ວາປະກອບຄຳເຫັນ ເພື່ອຄວາມເປັນເອກະພາບ ແລະ ນຳໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງ ຢ່າງຖືກຕ້ອງ ແລະ ແທດເໝາະກັບສະພາບເງື່ອນໄຂຄວາມເປັນຈິງ ແລະ ເພື່ອນຳໄປຄົ້ນຄ້ວາປັບປຸງນິຕິກຳດັ່ງກ່າວໃນອະນາຄົດ.