ໃນໂອກາດທີ່ທົ່ວພັກ ທົ່ວກອງທັບພວມສະເຫຼີມສະຫຼອງ ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ຢ່າງຄຶກຄື້ນມ່ວນຊື່ນ, ໃນຕົ້ນເດືອນມີນາ 2019 ຜ່ານມານີ້, ພັນເອກ ແສງມະນີວອນ ຄຳມະນີ ເລຂາຄະນະພັກ, ຫົວໜ້າການເມືອງກອງພັນໃຫຍ່ 642 ໄດ້ມອບລົດໄຖ ຈຳນວນ 1 ຄັນ ມູນຄ່າ 22 ລ້ານ ກວ່າກີບ ໃຫ້ກອງຮ້ອຍສູນບັນຊາທີ່ຂຶ້ນກັບ ກອງພັນໃຫຍ່ 642 ເພື່ອນຳໃຊ້ເຂົ້າໃນວຽກງານຜະລິດປູກຝັງ-ລ້ຽງສັດຂອງກົມກອງ ເຊິ່ງລົດໄຖນານ້ອຍດັ່ງກ່າວ ແມ່ນທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ນຳມາມອບໃຫ້ກອງພັນໃຫຍ່ 642 ໃນໂອກາດຜ່ານມາ, ສະນັ້ນ ຈຶ່ງໄດ້ມອບຕໍ່ໃຫ້ກົມກອງ ຮາກຖານຂອງຕົນນຳໃຊ້ເຂົ້າໃນການຜະລິດປັບປຸງຊີວິດການເປັນຢູ່ຂອງນາຍ ແລະ ພົນທະຫານ, ກ່າວຮັບໂດຍ ພັນໂທ ນິກອນ ພົງສະຫວັດ ຫົວໜ້າການທະຫານກອງຮ້ອຍດັ່ງກ່າວ, ສະຫາຍໄດ້ກ່າວສະແດງຄວາມຮູ້ບຸນຄຸນໄປຍັງການນຳພັກ-ລັດ ທີ່ເປັນຫ່ວງເປັນໄຍຕໍ່ກົມກອງທະຫານໃນກອງທັບປະຊາຊົນລາວ ໂດຍສະເພາະກອງຮ້ອຍສູນບັນຊາທີ່ຂຶ້ນກັບກອງພັນໃຫຍ່ 642 ແລະ ໃຫ້ຄຳໝັ້ນສັນຍາວ່າ ຈະປົກປັກຮັກສາ ແລະ ນຳໃຊ້ເຂົ້າວຽກງານທຳການຜະລິດ ໃຫ້ໄດ້ຍາວນານ ແລະ ເກີດປະໂຫຍດສູງສຸດ.