ອີງ​ຕາມ ກົດໝາຍ​ພັນທະ​ປ້ອງ​ກັນຊາ​ດສະບັບ​ເລກທີ 025/ສພຊ ລົງ​ວັນ​ທີ 13/12/2012 ຄະນະ​ພັກ - ​ຄະນະ​ບັນຊາ​ກອງພັນ​ໃຫຍ່ 642 ຈຶ່ງ​ໄດ້​ເປີດ​ຊຸດ​ອົບຮົມ - ​ຫັດ​ແອບ​ທະຫານ​ໃໝ່ ( ທະຫານພັນທະ ) ຂຶ້ນຢ່າງ​ເປັນ​ທາງ​ການ ​ໃນ​ຕອນ​ແລງຂອງ​ວັນ​ທີ 06 ມີນາ ປີ 2019 ​ໂດຍ​ໃຫ້​ກຽດ​ເປັນ​ປະທານ ​ແລະ ​ເຂົ້າ​ຮ່ວມ​ຂອງ​ທ່ານ ພັ.ອ ແສງມະນີວອນ ຄຳມະນີ ເລຂາຄະນະພັກຫົວ ໜ້າ​ການເມືອງກອງພັນ​ໃຫຍ່ 642 ພ້ອມ​ດ້ວຍ​ຄະນະ​, ມີ​ບັນດາ​ຫົວໜ້າ​ພະ​ແນ​ກ - ຂະ​ແໜງການ, ກອງພັນ​ນ້ອຍ, ກອງຮ້ອຍ​ເອກະລາດ ແລະ ​ບັນດາ​ຄູ-​ອາຈານ, ​ນັກຮົບ​ທະຫານ​ໃໝ່​ເຂົ້າ​ຮ່ວມ.

          ​ໃນ​ພິທີສະຫາຍພັ.ທ ສີນວນ ສັກຕິເດດ ຫົວໜ້າຂະແໜງອົບຮົມກົມກອງກໍ່ໄດ້ຂຶ້ນ​​ຜ່ານ​ແຜນການ​ອົບຮົມ​ທະຫານ​ໃໝ່ ໂດຍ ຈະ​ໄດ້​ອົບຮົມ​ວິຊາ​ການ​ເມືອງ, ການ​ທະຫານ, ພະລາທິການ - ​ເຕັກນິກ, ສະເພາະເນື້ອໃນອົບຮົມການທະຫານ ແມ່ນຈະໄດ້ຮໍ່າຮຽນວິຊາຂັ້ນພື້ນຖານທະຫານລາບ ແລະ ທະຫານປ້ອງກັນອາກາດໄປພ້ອມໆກັນ.

        ຈຸດປະສົງ​ໃນ​ການ​ອົບຮົມ​ໃນ​ຄັ້ງ​ນີ້​ ແມ່ນ​ແນ່​ໃສ່​ໃຫ້​ອ້າຍ​ນ້ອງ​ທະຫານ​ໃໝ່​ຮູ້​ໄດ້​ລະບຽບ​ແບບ​ແຜນ​ຂອງ​ກອງທັບ, ຮູ້​ນຳ​ໃຊ້​ອາວຸດ - ຍຸດທະວິທີ​ການ​ທະຫານ, ຮູ້​ບົວລະບັດ​ຮັກສາ​ເຄື່ອງ​ຂອງ​ທີ່​ການຈັດຕັ້ງປະ​ກອບ​ໃຫ້, ກຳ​ແໜ້ນ​ຂໍ້​ກຳນົດ​ກົດ​ລະບຽບ, 07 ລະບອບ 18 ວຽກ​ໃນ​ມື້ໜື່ງ, ມີ​ແນວ​ຄິດ​ຫຼັກ​ໝັ້ນ​ຄຸນສົມບັດ​ສິນ​ທຳ​ປະຕິວັດ, ຮູ້ຈັກ​ຮັກ​ຊາດ,ປົກ​ປັກ​ຮັກສາ​ໝາກຜົນ​ຂອງ​ການ​ປະຕິວັດ​ ເຮັດສຳ​ເລັດ​ທຸກ​ໜ້າ​ທີ່ວຽກງານທີ່​ພັກ-​ລັດ ​ແລະ ປະຊາຊົນ​ມອບ​ໝາຍ​ໃຫ້. 

          ​​ໂອກາດ​ນີ້​ທ່ານພັ.ອແສງມະນີວອນ ຄຳມະນີ ເລຂາຄະນະພັກຫົວໜ້າ​ການເມືອງກອງພັນ​ໃຫຍ່ 642 ກໍ່​ໄດ້​ຮຽກຮ້ອງ​ໃຫ້​ຄະນະ​ຮັບຜິດຊອບ ຄູ -​ອາຈານ ​ແລະ ນັກຮົບ​ແຕ່ລະຄົນ ​ຈົ່ງ​ພ້ອມ​ກັນ​ຈັດ​ຕັ້ງ​ປະຕິບັດ​ແບບ​ແຜນການ​ອົບຮົມ - ​ຫັດ​ແອບ​ໃຫ້​ເຂັ້ມ​ງວດ​ກຳ​ແໜ້ນ​ໄດ້​ທິດ​ສະ​ດີຫຼັກການຂອງ​ວຽກ​ງານ​ປ້ອງ​ກັນຊາ​ດ - ປ້ອງ​ກັນ​ຄວາມ​ສະຫງົບ​ເຮັດ​ໃຫ້ ການ​ອົບຮົມ - ​ຫັດ​ແອບ​ ​ບັນ​ລຸ​ຄາດໝາຍ ​ແລະ ມີ​ຄຸນ​ນະພາ​ບສູງ. ການ​ອົບຮົມ​ຄັ້ງ​ນີ້ຈະ​ດຳ​ເນີນ​ໄປ​ເປັນ​ເວລາ 03 ​ເດືອນຈຶ່ງ​ຈະ​ອັດ​ລົງ.