ພິມ
ໝວດ: ຂ່າວປະຈຳວັນ.
ກົດເບິ່ງ: 182

          ພິທີສະເຫຼີມສະຫຼອງວັນສ້າງຕັ້ງແຂວງບໍລິຄຳໄຊ ຄົບຮອບ 35 ປີ ( 06 ມີນາ 1984 – 06 ມີນາ 2019 ) ໄດ້ຈັດຂຶ້ນຢ່າງເປັນທາງການ ໃນຕອນບ່າຍຂອງວັນທີ 06 ມີນາ 2019 ຢູ່ເດີ່ນສວນອະນຸສາວະລີທ່ານ ສີສົມພອນ ລໍວັນໄຊ ໂດຍການເຂົ້າຮ່ວມຂອງທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາສູນກາງພັກ, ຮອງປະທານປະເທດແຫ່ງ ສປປ ລາວ, ທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາຄະນະບໍລິຫານພັກແຂວງ ເຈົ້າແຂວງບໍລິຄຳໄຊ, ມີອະດີດການນຳ, ນັກຮົບປະຕິວັດອາວຸໂສ, ວິລະຊົນແຫ່ງຊາດ, ການນຳພັກ - ລັດຂັ້ນສູນກາງ, ຄະນະປະຈຳພັກແຂວງ, ກຳມະການພັກແຂວງ, ສະມາຊິກສະພາແຫ່ງຊາດ, ສະພາປະຊາຊົນແຂວງ, ທະຫານ - ຕຳຫຼວດ, ພະນັກງານ - ລັດຖະກອນ, ອົງການຈັດຕັ້ງມະຫາຊົນ, ບໍລະສັດ ລັດວິສາຫະກິດ, ຕະຫຼອດຮອດພໍ່ແມ່ປະຊາຊົນບັນດາເຜົ່າຊາວແຂວງບໍລິຄຳໄຊ ເຂົ້າຮ່ວມ.

          ໃນພິທີ ທ່ານເຈົ້າແຂວງໄດ້ຂຶ້ນກ່າວບົດປາໄສ ວ່າ: ໃນທ້າຍສະຕະວັດທີ 19 ຈັກກະພັດລ່າເມືອງຂຶ້ນຝຣັ່ງ ໄດ້ເຂົ້າມາຮຸກຮານລາວ ແລະ ປຸ້ນສະດົມປະເທດເຮົາ ເລີ່ມແຕ່ເວລານັ້ນມາ ປະຊາຊົນລາວ ຢູ່ທຸກຫົນແຫ່ງຂອງປະເທດໄດ້ລຸກຂຶ້ນຕໍ່ສູ້ຢ່າງເນື່ອງນິດລຽນຕິດ ຕໍ່ໜ້າສະພາບການດັ່ງກ່າວ ພັກຄອມມູນິດອິນດູຈີນ ໄດ້ວາງຍຸດທະສາດຫັນທິດການຕໍ່ສູ້, ເດືອນ ຕຸລາ 1946 ໄດ້ມີກອງປະຊຸມຄະນະຕໍ່ຕ້ານເຂດຕາເວັນອອກທີ່ເມືອງວີງ ສສ ຫວຽດນາມ ແລະ ໄດ້ຕົກລົງແຕ່ງຕັ້ງ ຄະນະກຳມະການຕາເວັນອອກຂອງປະເທດລາວ ພ້ອມເປັນເອກະສັນກັນເລືອກຕັ້ງຄະນະຊີ້ນຳລວມ 5 ສະຫາຍ ໂດຍມີສະຫາຍ ໜູຮັກ ພູມສະຫວັນ ເປັນຫົວໜ້າ, ນັບແຕ່ນັ້ນມາແສງສະຫວ່າງຂອງການປະຕິວັດ ໄດ້ແຜ່ລັດສະໝີ ເຂົ້າມາເຂດຕາເວັນອອກເມືອງຄຳເກີດ ໂດຍສະເພາະເຂດເມືອງຈຳ ເຊິ່ງເປັນຈຸດກຳເນີດຂອງການປະຕິວັດຂອງແຂວງບໍລິຄຳໄຊ ພະນັກງານຫຼັກແຫຼ່ງນຳພາເຄື່ອນໄຫວເວລານັ້ນປະກອບດ້ວຍ ທ່ານ ສີສົມພອນ ລໍວັນໄຊ, ທ່ານ ຄຳອ່ອນ ໄຊສົມບັດ, ທ່ານ ຄຳເພັດ ໄຊວິຊາ, ທ່ານ ເຄນບຸນ ໄຊຍະທິຈັກ ແລະ ຜູ້ອຶ່ນໆຈຳນວນໜຶ່ງ, ມາຮອດປີ 1954 ໄດ້ສົມທົບກັບອາສາສະໝັກຫວຽດນາມປົດປ່ອຍນາແປ, ຫຼັກ 20, ຄຳເກີດ, ຫີນບູນ ແລະ ບ່ອນອຶ່ນໆ, ຕົ້ນປີ 1963 ສັດຕູໄດ້ທຳການບຽດຢຶດເອົາເຂດແນວຫຼັງຂອງພວກເຮົາ ບໍລິເວນພູສູງຜາເມືອງນ້ອຍ ແລ້ວຢຶດຕັ້ງຢູ່ສາມສອກ, ປີ 1964 ຈັກກະພັດອາເມລິກາໄດ້ຂະຫຍາຍສົງຄາມຂຶ້ນສູ່ລະດັບສູງ ພວກເຮົາຖືກທຳລາຍທັງຊີວິດ, ຊັບສິນ ແລະ ສັດສາວາສິ່ງ ຢ່າງຮ້າຍແຮງ, ເດືອນຕຸລາ 1968 ສູນກາງພັກໄດ້ຍົກຖານະສະຫະເມືອງເກົ້າສິບຂຶ້ນເປັນແຂວງ ສ້າງຕັ້ງແຂວງບໍລິຄຳໄຊ ຄັ້ງທຳອິດ ຊຶ່ງມີຄວາມໝາຍ: ບໍລິ ໝາຍເຖິງເມືອງບໍລິຄັນ, ຄຳ  ໝາຍເຖິງເມືອງຄຳເກີດ ແລະ ໄຊ  ໝາຍເຖິງໄຊຊະນະ ນັບແຕ່ມື້ນັ້ນເປັນຕົ້ນມາ ຊື່ສຽງຮຽງນາມຂອງແຂວງ ກໍ່ໄດ້ປະກອບສ່ວນໃນພາລະກິດຂະບວນການປະຕິວັດ ແລະ ປະຫວັດສາດຂອງລາວ, ຄະນະພັກແຂວງບໍລິຄຳໄຊຄັ້ງນີ້ປະກອບມີ 14 ທ່ານ ໄດ້ນຳພາຂະບວນຕໍ່ສູ້ຢ່າງເດັດດ່ຽວໜຽວແໜ້ນ, ວັນທີ 23 ສິງຫາ 1975 ພວກເຮົາໄດ້ຢຶດອຳນາດທົ່ວປະເທດຢ່າງສຳເລັດຜົນ ແລະ ມາໃນວັນທີ 2 ທັນວາ 1975 ໄດ້ເປີດກອງປະຊຸມໃຫຍ່ຜູ້ແທນທົ່ວປະເທດ ໄດ້ປະກາດເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນ, ພາຍຫຼັງປະເທດຊາດໄດ້ຮັບການປົດປ່ອຍ ມາຮອດເດືອນ ເມສາ 1976 ແຂວງບໍລິຄຳໄຊ ໄດ້ຖືກຍຸບ ເມືອງຄຳເກີດ ແລະ ຫີນບູນ ໃຫ້ຂຶ້ນກັບແຂວງຄຳມ່ວນ, ສ່ວນເມືອງປາກເຈົ້າ ຫຼື ປາກກະດິງ, ເມືອງປາກຊັນ, ບໍລິຄັນ ແລະ ທ່າໂພນສັນ ຖືກໂຮມເຂົ້າກັນເປັນເມືອງໜຶ່ງ ເອີ້ນວ່າເມືອງປາກຊັນ ຂຶ້ນກັບແຂວງວຽງຈັນ, ແຕ່ດ້ວຍຄວາມເປັນຫ່ວງເປັນໃຍຂອງສູນກາງພັກ ເພື່ອເຮັດໃຫ້ການຊີ້ນຳ - ນຳພາ ມີຄວາມສະດວກ ຕອບສະໜອງຮອງຮັບ 2 ໜ້າທີ່ຍຸດທະສາດ: ປົກປັກຮັກສາ ແລະ ສ້າງສາພັດທະນາປະເທດຊາດ ກົມການເມືອງສູນກາງພັກໄດ້ມີມະຕິ ເລກທີ 03/ກມສພ, ລົງວັນທີ 6 ມີນາ 1984 ວ່າດ້ວຍການສ້າງຕັ້ງແຂວງບໍລິຄຳໄຊ ຄືນໃໝ່ ເຊິ່ງລົງນາມໂດຍທ່ານ ໄກສອນ ພົມວິຫານ ເລຂາທິການໃຫຍ່ພັກປະຊາຊົນປະຕິວັດລາວ ພ້ອມທັງແຕ່ງຕັ້ງຄະນະຮັບຜິດຊອບ ຊີ້ນຳແຂວງບໍລິຄຳໄຊ ໂດຍສະຫາຍ ບູນທອນ ລໍໄຊປັນຍາ ແລະ ມີຄະນະຈຳນວນໜຶ່ງ, ເລີ່ມແຕ່ນັ້ນເປັນຕົ້ນມາ ຄະນະນຳຂອງແຂວງກໍ່ໄດ້ອອກແຮງເຄື່ອນໄຫວຊີ້ນຳ - ນຳພາໃນທຸກຂົງເຂດວຽກງານ ການພັດທະນາຊີວິດການເປັນຢູ່ຂອງປະຊາຊົນດີຂຶ້ນເປັນກ້າວໆ, ກອງປະຊຸມໃຫຍ່ຄັ້ງທີ 1 ຂອງອົງຄະນະພັກແຂວງບໍລິຄຳໄຊ ໄດ້ໄຂຂຶ້ນຢ່າງເປັນທາງການໃນລະຫວ່າງວັນທີ 13 – 16 ຕຸລາ 1986 ມາເຖິງປັດຈຸບັນພວກເຮົາໄດ້ເປີດຂຶ້ນເປັນຄັ້ງທີ 6 ແລ້ວ. ໂດຍສະເພາະສະໄໝທີ 6 ເປັນໄລຍະມ້ວນທ້າຍຂອງກອງປະຊຸມໃຫຍ່ ທີ່ກຳລັງບຸກບືນສູ້ຊົນບັນລຸຄາດໝາຍທີ່ສຳຄັນ ໃນການປັບປຸງຍົກລະດັບຊີວິດການເປັນຢູ່ ແກ້ໄຂຄວາມທຸກຍາກໃຫ້ປະຊາຊົນບັນດາເຜົ່າ ດີຂຶ້ນຕາມລຳດັບ ເພື່ອນຳເອົາແຂວງບໍລິຄຳໄຊໃຫ້ມີການພັດທະນາ ກ້າວຂຶ້ນຢ່າງບໍ່ຢຸດຢັ້ງ. ຈາກຜົນສຳເລັດດັ່ງກ່າວ ເຮັດໃຫ້ບຸກຄົນ ກົມກອງລວມໝູ່ໄດ້ຮັບການຍ້ອງຍໍຈາກສູນກາງ ຫຼາຍລະດັບ ແຂວງໄດ້ຮັບຫຼຽນພິລະອາດຫານຊັ້ນ 1 ສາມໜ່ວຍ, ຊັ້ນ 2 ສອງໜ່ວຍ, ຊັ້ນ 3 ໜຶ່ງໜ່ວຍ ແລະ ຫຼຽນໄຊແຮງງານ ຊັ້ນ 2 ສາມໜ່ວຍ ຢ່າງສົມກຽດ.

          ໃນວັນສະເຫຼີມສະຫຼອງວັນສ້າງຕັ້ງແຂວງບໍລິຄຳໄຊ ຄົບຮອບ 35 ປີ ລັດຖະບານໄດ້ມອບຫຼຽນໄຊແຮງງານຊັ້ນ 1 ໃຫ້ແຂວງບໍລິຄຳໄຊ ທີ່ມີຜົນງານດີເດັ່ນໃນການເຄື່ອນໄຫວຈັດຕັ້ງປະຕິບັດ ວຽກງານປົກປັກຮັກສາ ແລະ ພັດທະນາເສດຖະກິດ-ສັງຄົມຕະຫຼອດໄລຍະ 10 ປີ ( 2009 – 2019 ) ແລະ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງແຂວງບໍລິຄຳໄຊ ຄົບຮອບ 35 ປີ ຜົນງານດັ່ງກ່າວ ເປັນການປະກອບສ່ວນອັນສຳຄັນ ໃນການພັດທະນາປະເທດຊາດ.

          ໃນເວລາ 20:00 ໂມງ ຫາ 23:00 ໂມງ ມີລາຍການສະແດງຫຼາກຫຼາຍປະເພດ ເປັນຕົ້ນແມ່ນການຂັບກ່ອມບົດເພງ ເຊີນທ່ຽວບໍລິຄຳໄຊ, ເຂົ້າໜຽວສຽງແຄນ, ການຟ້ອນລວມໝູ່ຍິງ - ຊາຍ ຮ່ວມສະຫຼອງ 2 ວັນປະຫວັດສາດ, ນັກຮົບສ້າງແສງ, ແລະ ລາຍການອື່ນໆ ລວມການສະແດງທັງໝົດ 30 ລາຍການ ທີ່ມາຈາກຫຼາຍພາກສ່ວນ ເຊັ່ນ: ສູນວັນທະນະທໍາເດັກແຂວງ, ບ້ານສາມສ້າງສີວິໄລ, ປະຖົມ ແລະ ມັດທະຍົມ ແຫ່ງຕ່າງໆພາຍໃນເທດສະບານເມືອງປາກຊັນ, ສະແດງກາຍະສິນ, ລະຄອນຕຸກກະຕາ ເຊິ່ງແຕ່ລະລາຍການສະແດງແມ່ນມີຄວາມໝາຍ ແລະ ສອງແສ່ງໃຫ້ເຫັນມູນເຊື້ອຮັກຊາດຮັກບ້ານເກີດເມືອງນອນ ແລະ ຄວາມສາມັກຄີຂອງປະຊາຊົນລາວບັນດາເຜົ່າ ພ້ອມດຽວກັນຍັງສະແດງໃຫ້ເຫັນເຖິງວັດທະນະທໍາຮີດຄອງປະເພນີອັນດີງາມ ແລະ ການພັດທະນາສ້າງສາແຂວງບໍລິຄໍາໄຊ ກໍ່ຄືປະເທດຊາດ ໃນໄລຍະຜ່ານມາ ທີ່ໄດ້ສ້າງຄວາມປະທັບໃຈ ແລະ ຄວາມເບີກບານມ່ວນຊື່ນ ໃຫ້ກັບຜູ້ເຂົ້າຮ່ວມຮັບຊົມໃນງານດັ່ງກ່າວ.