ເນື່ອງໃນໂອກາດວັນສ້າງຕັ້ງແຂວງບໍລິຄໍາໄຊ ຄົບຮອບ 35 ປີ ໃນຕອນເຊົ້າຂອງວັນ 6 ມີນາ 2019 ຢູ່ສວນອະນຸສາວະລີ ທ່ານ ສີສົມພອນ ລໍວັນໄຊ ໄດ້ມີພິທີໃສ່ບາດ ແລະ ຖວາຍກອງບຸນອັດຖະມະຫາກະຖິນສາມັກຄີຂຶ້ນ ມີຄະນະບໍລິຫານງານພັກແຂວງນໍາໂດຍ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ເຈົ້າພາບເຈົ້າສັດທາໃຫຍ່, ພະນັກງານຜູ້ຊົງຄຸນວຸດທິ, ພະນັກງານອະວຸໂສບຳນານ, ຊາວ​ພຸດ​ທະສາ​ສະ​ນິ​ກະ​ຊົນ ທີ່ເຫຼື້ອມໃສທາງພຸດທະສາສະໜາທັງພາຍໃນແຂວງ ແລະ ຕ່າງແຂວງ ເຂົ້າຮ່ວມຢ່າງຫຼວງຫຼາຍ.

     

    ພິທີທາງສາສະໜາໄດ້ເລີ່ມດ້ວຍການໄຫ້​ວພຣະຮັບ​ສິນ​, ຖວາຍກອງບຸນ ແລະ ຕົ້ນກະລາພຶກ, ໃສ່ບາດ, ຟັງ​ເທດສະໜາ, ຢາດນໍ້າ ແລະ ຄາລະວະ​ຮັບ​ພອນ. ການໃສ່ບາດ ແລະ ຖວາຍກອງບຸນອັດຖະມະຫາກະຖິນສາມັກຄີຄັ້ງນີ້ ແມ່ນເພື່ອເປັນການລະນຶກເຖິງບຸນຄຸນ ແລະ ງຸນງາມຄວາມດີ ພ້ອມທັງເປັນການອຸທິດສ່ວນບຸນກຸສົນໃຫ້ແກ່ອະດີດການນໍາຂັ້ນສູງ ແລະ ອະດີດການນໍາຂອງແຂວງບໍລິຄໍາໄຊ ທີ່ໄດ້ເສຍຊີວິດໄປແລ້ວ ຕາມຄວາມເຊື່ອທາງສາສະໜາ. ກອງບຸນອັດຖະມະຫາກະຖິນສາມັກຄີ ລວມທັງໝົດມີ 9 ກອງ ໃນນັ້ນ ກອງທີ 1 ອຸທິດສ່ວນບຸນກຸສົນໃຫ້ ທ່ານ ສີສົມພອນ ລໍວັນໄຊ  ອະດີດກົມການເມືອງສູນກາງພັກ, ກອງທີ 2 ອຸທິດໃຫ້ ທ່ານ ບຸນທອນ ລໍໄຊປັນຍາ, ກອງບຸນທີ 3  ອຸທິດໃຫ້ທ່ານ ພົນໂທ ນະຄອນ ສີສະນົນ, ກອງທີ 4 ອຸທິດໃຫ້ທ່ານ ທອງບັນ ແສງອາພອນ, ກອງທີ 5 ອຸທິດສ່ວນບຸນກຸສົນເຖິງເຈົ້າຖິ່ນເຈົ້າກຳນາຍເວນ ແລະ ອີກ 4 ກອງນັ້ນ ແມ່ນລູກຫຼານຕະກູນລໍວັນໄຊ ໄດ້ຕັ້ງກອງບຸນອຸທິດສ່ວນບຸນກຸສົນໃຫ້ທ່ານ ສີສົມພອນ ລໍວັນໄຊ.

   

      ການຕັ້ງກອງບຸນ ແມ່ນເປັນຄວາມເຊື່ອຂອງຄົນລາວຊາວພຸດ ທີ່ໄດ້ປະຕິບັດກັນມາແຕ່ດຶກດໍາບັນ ເພື່ອອຸທິດສ່ວນບຸນກຸສົນໃຫ້ແກ່ຜູ້ທີ່ລ່ວງລັບໄປແລ້ວໃຫ້ໄປສູ່ສຸຂະຕິ ເຮັດໃຫ້ຕົນເອງມີຄວາມສຸກຄວາມເບີກບານໃຈ, ເປັນການເຕົ້າໂຮມຄວາມສາມັກຄີປອງດອງຂອງປະຊາຊົນບັນດາເຜົ່າ ພ້ອມດຽວກັນ ຍັງເປັນການອະນຸລັກຮັກສາວັດທະນະທໍາ ແລະ ຮີດຄອງປະເພນີອັນດີງາມຂອງຊາດ ໃຫ້ຍືນຍົງຄົງຕົວຢູ່ຄູ່ກັບຄົນລາວຕະຫຼອດໄປ.