ພິທີສຶກສາອົບຮົມ ຊິງຊາວ (ເຖົ້າແກ່ແນວໂຮມ, ເຈົ້າກົກເຈົ້າເຫຼົ່າ), ບຸກຄົນເຄື່ອນໄຫວທາງສາດສະໜາ, ການຕັ້ງສະນໍາ ແລະ ຖາງປ່າເຮັດໄຮ່ຢ່າງຊະຊາຍ ໄດ້ຈັດຂຶ້ນ ໃນລະຫວ່າງ ວັນທີ 4 - 6 ກຸມພາ 2019 ຢູ່ທີ່ຫ້ອງປະຊຸມຂອງບ້ານຜາເມືອງ, ເມືອງ ບໍລິຄັນ, ແຂວງ ບໍລິຄໍາໄຊ, ໂດຍໃຫ້ກຽດເຂົ້າຮ່ວມຂອງ ທ່ານ ບຸນຄໍ້າ ໄຊເຍ່ຍລໍວື ຄະນະປະຈໍາພັກແຂວງ ປະທານກວດກາພັກ - ລັດແຂວງ, ທ່ານ ລໍາສະໄໝ ວໍລະສານ ຄະນະປະຈໍາພັກແຂວງ ປະທານແນວລາວສ້າງຊາດແຂວງ, ມີເລຂາພັກເມືອງ, ເຈົ້າເມືອງ ບໍລິຄັນ, ມີອໍານາດການປົກຄອງບ້ານ - ນາຍບ້ານ,​ ພະນັກງານທີ່ກ່ຽວຂ້ອງ ຕະຫຼອດຮອດແຂກທີ່ຖືກເຊີນ ເຂົ້າຮ່ວມ.

         

     ໃນພິທີ ທ່ານ ພັນໂທ ເຄນວອນ ລໍວັນໄຊ ຫົວໜ້າຫ້ອງສັນຕິບານ ປກສ ແຂວງ ຄະນະຮັບຜິດຊອບບັ້ນເຮັດທົດລອງວຽກງານກໍ່ສ້າງຮາກຖານເຂດຈຸດສຸມໃຈກາງ ບ້ານຜາເມືອງ, ເມືອງ ບໍລິຄັນ, ແຂວງ ບໍລິຄໍາໄຊ ໄດ້ຂຶ້ນຜ່ານບົດລາຍງານໂດຍຫຍໍ້ໃນການຈັດຕັ້ງປະຕິບັດການເຮັດທົດລອງວຽກງານກໍ່ສ້າງຮາກຖານເຂດຈຸດສຸມໃຈກາງບ້ານຜາເມືອງ ເຊິ່ງພາຍຫຼັງເປີດພິທີເຮັດທົດລອງຢ່າງເປັນທາງການໃນວັນທີ 18 ມັງກອນ 2019 ທີ່ຜ່ານມາ ຈົນຮອດ ວັນທີ 03 ກຸມພາ 2019  ຄະນະຮັບຜິດຊອບແຕ່ລະຂັ້ນໄດ້ເອົາໃຈໃສ່ຊີ້ນໍາ - ນໍາພາພະນັກງານວິຊາສະເພາະຢ່າງໃກ້ຊິດຕິດແທດ ເພື່ອເຄື່ອນໄຫວວຽກງານຕາມແຜນການ ແລະ ຂັ້ນຕອນແຕ່ລະບາດກ້າວທີ່ວາງໄວ້ ໂດຍການແບ່ງຄວາມຮັບຜິດຊອບໃຫ້ແຕ່ລະໜ່ວຍ ໃນການລົງເຄື່ອນໄຫວເຜີຍແຜ່ເຊື່ອມຊືມເອກະສານ ໃຫ້ກັບ ພໍ່, ແມ່ ປະຊາຊົນພາຍໃນບ້ານຮັບຮູ້ ແລະ ເຂົ້າໃຈລະບຽບກົດໝາຍຂອງບ້ານເມືອງ ກໍ່ຄືແນວທາງນະໂຍບາຍຂອງພັກ - ລັດ ເຊິ່ງປະກອບມີເອກະສານ ຍຸດທະສາດຫັນປ່ຽນໂດຍສັນຕິ, ເອກະສານ ມະຕິ 103/ກມສພ ສະບັບລົງວັນທີ່ 11 ພະຈິກ 2006 ວ່າດ້ວຍການເພີ່ມທະວີວຽກງານປ້ອງກັນຄວາມສະຫງົບໃນສະພາບການໃຫມ່, ລັດຖະທໍາມະນູນ ແລະ ກົດໝາຍ ແຫ່ງ ສປປ ລາວ, ດໍາລັດ ເລກທີ 315/ນຍ ວ່າດ້ວຍການຄຸ້ມຄອງການເຄື່ອນໄຫວສາດສະໜາ ຢູ່ ສປປ ລາວ, ກົດໝາຍວ່າດ້ວຍທີ່ດິນ ແລະ ເອກະສານທີ່ສໍາຄັນອີກຈໍານວນໜຶ່ງ ເຊິ່ງຜ່ານມາ ສາມາດເຮັດໄດ້ 95% ໃນນັ້ນ ເກັບກໍາສະຖິຕິພົນລະເມືອງໃນ 13 ໜ່ວຍຂອງຄຸ້ມໄດ້ ຈໍານວນ 200 ຄອບຄົວ, ຈໍານວນພົນ 1.667 ຄົນ, ຍິງ 815 ຄົນ, ໃນນັ້ນ ບໍ່ໄດ້ຂຶ້ນສໍາມະໂນຄົວ 25 ຄອບຄົວ ແລະ ເປັນບຸກຄົນ 18 ຄົນ,​ ບໍ່ມີໜ້າໃນຄອບຄົວ 117 ຄົນ, ຍິງ 61 ຄົນ, ໄດ້ຄັດຈ້ອນເປົ້າໝາຍຕ່າງໆທີ່ພົວພັນເຖິງປະກົດການຫຍໍ້ທໍ້ມາສຶກສາອົບຮົມ, ເຮັດບົດບັນທຶກ ແລະ ແກ້ໄຂທາງດ້ານກົດໝາຍປະກອບມີ ເປົ້າໝາຍເສບ ແລະ ຄ້າຂາຍຢາເສບຕິດ, ອາລະວາດຕີກັນ, ການຕັ້ງສະນໍາຖາງປ່າຢ່າງຊະຊາຍ, ຍົກຍ້າຍຖິ່ນຖານບໍ່ຖືກຕ້ອງ, ສຶກສາອົບຮົມ ຊິງຊາວ ເຈົ້າກົກເຈົ້າເຫຼົ່າ, ການເຄື່ອນໄຫວສາດສະໜາ ແລະ ເປົ້າໝາຍຂັດແຍ່ງທີ່ດິນ.

          ຈາກນັ້ນ ທ່ານ ບຸນຄໍ້າ ໄຊເຢຍລໍວື ພ້ອມດ້ວຍຄະນະປະທານ ກໍ່ໄດ້ໃຫ້ກຽດໂອ້ລົມ ແລະ ສຶກສາອົບຮົມ ເຊິ່ງທ່ານ ໄດ້ກ່າວເນັ້ນໜັກໃຫ້ປະຊາຊົນພາຍໃນບ້ານກໍ່ຄື ຊິງຊາວ (ເຈົ້າກົກເຈົ້າເຫຼົ່າ), ຜູ້ເຄື່ອນໄຫວກິດຈະກໍາທາງດ້ານສາດສະໜາ, ການຕັ້ງສະນໍາ - ຖາງປ່າເຮັດໄຮ່ຢ່າງຊະຊາຍ ແລະ ຍົກຍ້າຍຖິ່ນຖານທີ່ບໍ່ຖືກຕ້ອງ ຈົ່ງເອົາໃຈໃສ່ເຄົາລົບຕໍ່ລະບຽບກົດໝາຍບ້ານເມືອງ, ເປັນເຈົ້າການສຶກສາອົບຮົມລູກຫຼານຂອງຕົນ ແລະ ປະຊາຊົນຢູ່ໃກ້ຄຽງໃຫ້ປະກອບອາຊີບທໍາມາກິນຢ່າງຖືກຕ້ອງ ພ້ອມນັ້ນ ກໍ່ຕ້ອງປຸກລະດົມໃຫ້ເຂົາເຈົ້າເຂົາຮ່ວມວຽກງານປ້ອງກັນຊາດ - ປ້ອງກັນຄວາມສະຫງົບຮ່ວມກັບການຈັດຕັ້ງໂດຍການເປັນຫູເປັນຕາໃຫ້ກັບເຈົ້າໜ້າທີ່ ເມື່ອມີສະພາບການທີ່ອາດຈະກໍ່ໃຫ້ເກີດຄວາມບໍ່ສະຫງົບ, ຮຽກຮ້ອງໃຫ້ປະຊາຊົນພາຍໃນບ້ານເຕົ້າໂຮມຄວາມສາມັກຄີເປັນປຶກແຜ່ນ, ຮັກສາມູນເຊື້ອອັນດີງາມ ແລະ ຮີດຄອງປະເພນີທີ່ເປັນເອກະລັກຂອງຊາດ ໄວ້ໃຫ້ໝັ້ນຄົງ ພ້ອມກັນພັດທະນາຕົນເອງ ແລະ ຄອບຄົວໃຫ້ຮັ່ງມີເຂັ້ມແຂງນັບມື້ນັບດີຂຶ້ນເປັນກ້າວໆ.