ຕອນບ່າຍ ວັນທີ 04 ກຸມພາ 2019 ກອງບັນຊາການ ປກສ ແຂວງບໍລິຄໍາໄຊ ສົມທົບກັບ ຄ້າຍຄຸມຂັງ - ດັດສ້າງ ປກສ ແຂວງ ໄດ້ນໍາເອົາເຄື່ອງບໍລິໂພກຈໍານວນໜຶ່ງ ມາມອບໃຫ້ພະນັກງານລົງກໍ່ສ້າງຮາກຖານເຂດຈຸດສຸມໃຈກາງ ຢູ່ບ້ານຜາເມືອງ ເມືອງບໍລິຄັນ ແຂວງບໍລິຄໍາໄຊ.

     ເຄື່ອງທີ່ນໍາມາມອບໃນຄັ້ງນີ້ ປະກອບມີ ໝີ່ສໍາເລັດຮູບ ຈໍານວນ 10 ແກັດ, ປາກະປ໋ອງ ຈໍານວນ 13 ແພັກ ລວມມຸນຄ່າ 1.300.000 ກີບ ໃຫ້ກຽດຕາງໜ້າມອບໂດຍ ທ່ານ ພັນໂທ ທອງໄຫຼ ໄຊຍະລາດ ຄະນະພັກ, ຮອງຫົວໜ້າກອງບັນຊາການ ປກສ ແຂວງ,  ກ່າວຮັບໂດຍ ທ່ານ ພັນໂທ ຜາຂົງ ດອກມະນີຈັນ ຄະນະພັກ ຮອງຫົວໜ້າກອງບັນຊາການ ປກສ ແຂວງ ຄະນະຊີ້ນໍາການເຮັດທົດລອງວຽກງານກໍ່ສ້າງຮາກຖານເຂດຈຸດສຸມໃຈກາງ ບ້ານຜາເມືອງ ເມືອງບໍລິຄັນ ແຂວງ ບໍລິຄໍາໄຊ ພ້ອມດ້ວຍຄະນະທັງສອງຝ່າຍເຂົ້າຮ່ວມ.

     ທ່ານ ພັນໂທ ທອງໄຫຼ ໄຊຍະລາດ ໄດ້ກ່າວວ່າ: ການນໍາເອົາເຄື່ອງບໍລິໂພກມາມອບໃນຄັ້ງນີ້ ກໍ່ເພື່ອເປັນການປະກອບສ່ວນຊຸກຍູ້ເຂົ້າໃນວຽກງານວິຊາສະເພາະ ກໍ່ຄືການດໍາລົງຊີວິດປະຈໍາວັນຂອງພະນັກງານທີ່ລົງກໍ່ສ້າງຮາກຖານໃຫ້ມີຄວາມສະດວກສະບາຍ ແລະ ສາມາດຮັບປະກັນທາງດ້ານສະບຽງອາຫານພຽງພໍກັບຄວາມຮຽກຮ້ອງຕ້ອງການ ເພື່ອເຮັດໃຫ້ວຽກງານໄດ້ຮັບຜົນສໍາເລັດຕາມລະດັບຄາດໝາຍ. ໃນໂອກາດດຽວກັນ ທ່ານ ພັນໂທ ຜາຂົງ ດອກມະນີຈັນ ກໍ່ໄດ້ຕາງໜ້າໃຫ້ຄະນະຮັບຜິດຊອບ ສະແດງຄວາມຂອບໃຈມາຍັງທ່ານ ພັນໂທ ທອງໄຫຼ ໄຊຍະລາດ ພ້ອມດ້ວຍຄະນະ ທີ່ມີຄວາມເປັນຫ່ວງເປັນໄຍ ເຫັນໄດ້ເຖິງຄວາມສຳຄັນຕໍ່ກັບວຽກງານດັ່ງກ່າວ ແລະ ໄດ້ນໍາເຄື່ອງບໍລິໂພກມາມອບໃຫ້ຄັ້ງນີ້ ເຊິ່ງພວກເຮົາຈະນຳໃຊ້ເຂົ້າໃນຊີວິດປະຈໍາວັນໃຫ້ໄດ້ຮັບຜົນປະໂຫຍດສູງສຸດ.