ລະຫວ່າງວັນທີ 6 - 8 ກຸມ​ພາ 2019 ໄດ້ຈັດກອງປະຊຸມຄົບຄະນະບໍລິຫານງານພັກເມືອງຄຳເກີດ ຄັ້ງທີ 11 ສະໄໜທີ 8 ຂຶ້ນ ຢູ່ທີ່ຫ້ອງປະຊຸມໃຫ່ຍຫ້ອງວ່າການປົກຄອງເມືອງ​ຄຳເກີດ ໃຫ້ກຽດເປັນປະທານໂດຍ ສະຫາຍ ວັນວິໄລ ແດນພູຫລວງ ຄະນະປະຈຳພັກແຂວງ ເລຂາພັກເມືອງ ເຈົ້າເມືອງຄຳເກີດ, ມີບັນດາຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ສຳ​ນັກ​ງານ, ລັດວິສາຫະກິດ ຕະຫຼອດຮອດເລຂາພັກກຸ່ມບ້ານ, ເລຂາພັກບ້ານ ທົ່ວເມືອງຄຳເກີດເຂົ້າຮ່ວມ.

     

    ໃນກອງປະຊຸມ ໄດ້ຮັບຟັງລາຍງານຜົນການຈັດຕັ້ງປະຕິບັດມະຕິກອງປະຊຸມຄັ້ງຜ່ານມາ ໂດຍມີເນື້ອໃນສຳຄັນບາງຕອນ ຄື: ຄະນະນຳຂັ້ນເມືອງ ໄດ້ພ້ອມກັນເອົາໃຈໃສ່ເຮັດວຽກງານການສຶກສາອົບຮົມການເມືອງແນວຄິດ ໃຫ້ແກ່ພະນັກງານການນຳຫຼັກແຫຼ່ງ, ສະມາຊິກພັກ, ພະນັກງານລັດຖະກອນເພື່ອເຮັດໃຫ້ເຂົາເຈົ້າຈຳແນກໄດ້ມິດ ແລະ ສັດຕູ ຢ່າງຈະແຈ້ງ ເປັນຕົ້ນແມ່ນການເຄື່ອນໄຫວກຳລັງປ້ອງກັນຄວາມສະຫງົບ ໄດ້ລົງເຜີຍແຜ່ເອກະສານ ວ່າດ້ວຍສິດ ແລະ ໜ້າທີ່ຂອງກອງຫຼອນຂັ້ນບ້ານ, ເອົາໃຈໃສ່ແກ້ໄຂປະກົດກາຫຍໍ້ທໍ້ຂອງສັງຄົມ ເຊິ່ງມີຄະດີເກີດຂຶ້ນທັງໜົດ 101 ກໍລະນີ, ກັກຕົວຜູ້ກະທຳຜິດໄດ້ 154 ຄົນ ໃນນັ້ນ ມີຄະດີອາຍາທົ່ວໄປ 49 ເລື່ອງ, ຄະດີຢາເສບຕິດ 44 ເລື່ອງ, ຢຶດຢາບ້າໄດ້ 1.549 ເມັດ, ກັນ​ຊາ​ແຫ້ງ 1.130 ກິ​ໂລ, ຄະດີເສດຖະກິດ 8 ເລື່ອງ, ອຸປະຕິເຫດເກີດຂຶ້ນ 88 ກໍລະນີ. ຄຽງຄູ່ກັນນັ້ນ ຍັງໄດ້ສົມທົບກັບພາກສ່ວນທີ່ກ່ຽວຂ້ອງ ລົງຕິດຕາມກວດກາບັນດາໂຄງການລົງທຶນຂອງລັດ ແລະ ເອກະຊົນ. 1 ປີ ຜ່ານມາ ເສດ​ຖະ​ກິດ​ຂອງ​ເມືອງ​ບັນ​ລຸ​ປະ​ມານ 1.244.260.510.477 ກີບ ລື່ນ​ແຜນ 0,46% ສະ​ເລ່ຍ​ໃສ່​ຫົວ​ຄົນ​ໄດ້​ປະ​ມານ 16.803.658 ກີບຕໍ່​ຄົນ​ຕໍ່​ປີ ເທົ່າ​ກັບ 1.969 ໂດ​ລ່າ​ສະ​ຫະ​ລັດ/ຄົນ/ປີ, ຜະ​ລິດ​ເຂົ້າ​ໄດ້ 25.666,5 ໂຕ່ນ ສະ​ເລ່ຍ​ໃສ່​ຫົວ​ຄົນ 346,62 ກິ​ໂລ/ຄົນ/ປີ ເທົ່າ​ກັບ 88,19%, ນອກນັ້ນ ປະຊາຊົນຍັງໄດ້ປູກພືດລະດູຝົນ 6.735 ເຮັກຕ່າເທົ່າກັບ 62,28% ຂອງແຜນການປີ,  ສະໜອງຊີ້ນປາປ້ອນຕະຫຼາດຢ່າງເປັນປົກກະຕິ, ການຂະຫຍາຍຕົວຂອງສັດປະເພດຕ່າງໆ ສະເລ່ຍສັດເພີ່ມຂຶ້ນ 10,15% ລື່ນແຜນ 5,15% ເຊັ່ນ: ຄວາຍເພີ່ມຂື້ນ 11,02%, ງົວເພີ່ມຂຶ້ນ 10,19%, ແບ້ເພີ່ມຂຶ້ນ 11,24%, ໜູເພີ່ມຂຶ້ນ 8,06% ແລະ ສັດປີກເພີ່ມຂຶ້ນ 10,24%. ອອກທະບຽນວິສາຫະກິດໃໜ່ໄດ້ 61 ຫົວໜ່ວຍ ເທົ່າກັບ 66,30% ຂອງແຜນການປີ ທຶນຈົດທະບຽນ 3.404.200.000 ກີບ ດັດແກ້ 10 ຫົວໜ່ວຍ. ວຽກງານໂຍທາທິການ ແລະ ຂົນສົ່ງ ໄດ້ຕິດຕາມການກໍ່ສ້າງຂົ​ວ​ນ້ຳ​ກະ​ຕະ​ສຳ​ເລັດ 65% ສ້ອມ​ແປງ​ເສັ້ນ​ທາງ​ເຂົ້າ​ບ້ານ​ວັງ​ຜາ 1.780 ແມັດ ມູນ​ຄ່າ 60.400.000 ກີບ,  ວຽກງານຖະແຫລງຂ່າວ - ວັດທະນະທຳ ແລະ ທ່ອງທ່ຽວ ແມ່ນໄດ້ສຸມໃສ່ເກັບກຳຂ່າວໄດ້ 316 ຂ່າວ ເທົ່າກັບ 1,28% ຂອງແຜນການປີ ຄອບ​ຄົວ​ວັດ​ທະ​ນະ​ທຳ​ເພີ່ມ​ຂຶ້ນ 384 ຄອບ​ຄົວ ສາ​ມາດ​ສະ​ເໜີ​ຮັບ​ຮອງ​ບ້ານ​ວັດ​ທະ​ນະ​ທຳ​ຕື່ມ 2 ບ້ານ ​ເທົ່າ​ກັບ 100%.

     ກອງປະຊຸມ ຍັງໄດ້ເຜີຍແຜ່ ເອກ​ະສານ 3 ບົດ ​ຄື: ເສີມ​ຂະ​ຫຍາຍ​ມູນ​ເຊື້ອ ແລະ ຄວາມ​ສາ​ມັກ​ຄີ​ເປັນ​ເອ​ກະ​ພາບ​ພາຍ​ໃນ​ພັກ, ຍົກ​ສູງ​ຄວາມ​ສາ​ມາດ​ນຳ​ພາ ແລະ ຄວາມ​ເປັນ​ແບບ​ຢ່າງ​ນຳ​ໜ້າ​ຂອງ​ພັກ, ຕັ້ງ​ໜ້າ​ຝຶກ​ຝົນຫຼໍ່ຫຼອມ​ຄຸນ​ທາດ​ການ​ເມືອງ ແລະ ຄຸນ​ສົມ​ບັດ​ສິນ​ທຳ​ປະ​ຕິ​ວັດ ອີກດ້ວຍ.