ພິທີສອບເສັງນັກຮຽນເກັ່ງຂັ້ນເມືອງ ຊັ້ນ ມ.1 ຫາ ມ.4 ແລະ ມ.7 ປະຈຳປີ 2019 ທົ່ວເມືອງປາກຊັນ ໄດ້ຈັດຂຶ້ນໃນຕອນເຊົ້າຂອງວັນທີ 08 ກຸມພາ 2019 ຢູ່ທີ່ສະໂມສອນຂອງໂຮງຮຽນມັດທະຍົມຕອນຕົ້ນໂພສີ ໂດຍໃຫ້ເຂົ້າຮ່ວມເປັນປະທານຂອງທ່ານ ສົມພອນ ຄຳປານີສົງ ຮອງເຈົ້າເມືອງຊັນ, ທ່ານ ບຸນໂຮມ ແກ້ວມະນີສັກ ຫົວໜ້າຫ້ອງການສຶກສາທິການ ແລະ ກິລາເມືອງປາກຊັນ, ມີບັນດາຄະນະກຳມະການເຝົ້າຫ້ອງສອບເສັງ, ອາຈານ ແລະ ນັກສອບເສັງແຕ່ລະໂຮງຮຽນ ເຂົ້າຮ່ວມ.

         

     ການສອບເສັງນັກຮຽນເກັ່ງໃນຄັ້ງນີ້ມີຕົວແທນຈາກມັດທະຍົມຕົ້ນ 11 ໂຮງຮຽນ ຄື: ມ.ຕົ້ນ ປາກຊັນ, ສົງ, ໂພສີ, ນາເຂົ້າລົ້ມ, ສິນໄຊ, ໂພນໄຊ, ປາກຊັນໃໝ່, ຮຸ່ງອາລຸນ, ແຕ່ງທອງ, ແລະ ຕົວແທນຊັ້ນ ມ.7  ຈາກ ມ.ສ ໜອງບົວ, ສີທ່ານາໄຊ, ມ.ສ ປາກງຽບ ແລະ ມ.ປາຍ ປາກຊັນ, ມີນັກສອບເສັງ 176 ຄົນ ຍິງ 111 ຄົນ, ໃນນັ້ນ ຊັ້ນ ມ.1 ມີນັກສອບເສັງ 36 ຄົນ ຍິງ 25, ຊັ້ນ ມ.2 ມີນັກສອບເສັງ 36 ຄົນ ຍິງ 26, ຊັ້ນ ມ.3 ມີນັກສອບເສັງ 36 ຄົນ ຍິງ 26, ຊັ້ນ ມ.4 ມີນັກສອບເສັງ 48 ຄົນ ຍິງ 25, ແລະ ຊັ້ນ ມ7. ມີນັກສອບເສັງ 20 ຄົນ ຍິງ 9.

     ໃນພິທີດັ່ງກ່າວ ຍັງໄດ້ຜ່ານກົດລະບຽບຂອງການສອບເສັງ ເພື່ອໃຫ້ນັກສອບ ປະຕິບັດຕາມຢ່າງເຂັ້ມງວດ ຮັບປະກັນໄດ້ທັງດ້ານປະລິມານ ແລະ ຄຸນນະພາບ, ພ້ອມດຽວກັນນີ້ ໃນພິທີຍັງໄດ້ຮັບຟັງການໂອ້ລົມຂອງທ່ານຮອງເຈົ້າເມືອງ ເຊິ່ງທ່ານ ​ກໍ່​ໄດ້ຍ້ອງຍໍຊົມເຊີຍ ຕໍ່ຄວາມຮັບຜິດຊອບອັນສູງສົ່ງນີ້ ຈຶ່ງເຮັດໃຫ້ງານການສອບເສັງເກີດຂຶ້ນໄດ້, ສະ​ນັ້ນ ຈຶ່ງ​ຮຽກຮ້ອງ​ມາ​ຍັງ​ບັນດາ​ຄູ​ອາຈານ ​​ໃຫ້​ມີ​ຄວາມ​ຊື່ສັດ​ບໍລິສຸດ​ຕໍ່​ການ​ສອບ​ເສັງ ​ແລະ ​ນັກ​ຮຽນ​ຈົ່ງ​ຕັ້ງ​ໃຈ​ສຶກສາ​ຮ່ຳຮຽນ​ເອົາ​ຄວາມ​ຮູ້ ຄວາມ​ສາມາດ ນຳ​ຄູ​ອາຈານ ​ເພື່ອ​ຈະ​ມາ​ພັດທະນາ​ຕົນ​ເອງ ​ແລະ ປະ​ເທດ​ຊາດ​ໃຫ້​ມີ​ຄວາມ​ກ້າວໜ້າ​ຂຶ້ນໄປ​ເລື້ອຍໆ.