ຫາດຄູນ ສະຖານທີ່ທ່ອງທ່ຽວທາງທຳມະຊາດ ທີ່ກຳລັງຈະໄດ້ຮັບການພັດທະນາໃຫ້ເປັນແຫລ່ງທ່່ອງທ່ຽວຂວັນໃຈຂອງຊາວເມືອງບໍລິຄັນ, ເພາະມັນເປັນບ່ອນທີ່ຖືກປະດິດສ້າງໂດຍທຳມະຊາດ ສ້າງສີ່ງເອື້ອອຳນວຍຫລາຍປະການໃຫ້ແກ່ການພັກຜ່ອນຢ່ອນອາລົມ ບໍ່ວ່າຈະເປັນທິວທັດທີ່ສວາຍງາມ ບັນຍາກາດຍາມແລງທີ່ເຢັນສະບາຍ ການບໍລິການດ້ວຍໃຈ ແລະ ເປັນກັນເອງຂອງຜູ້ປະກອບການ.

    ທ່ານ ສົມສັກ ໄຊຍະວົງ ຜູ້ປະກອບການແຫລ່ງທ່ອງທ່ຽວຫາດຄູນ ໄດ້ໃຫ້ສຳພາດແກ່ນັກຂ່າວ ວ່າ: ຫາດຄູນແຫ່ງນີ້ ໄດ້ເປີດໃຫ້ຜູ້ຄົນເຂົ້າມາທ່ຽວຊົມ ແລະ ພັກຜ່ອນ ມາແລ້ວເກືອບປີ ເຫັນມີການຕອບຮັບເປັນຢ່າງດີ ຈຶ່ງໄດ້ມີການພັດທະນາປັບປຸງໃຫ້ດີ ແລະ ສວາຍງາມຂຶ້ນຕື່ມ ໂດຍສະເພາະ ແມ່ນບ່ອນທີ່ນັ່ງຫລີ້ນຊົມວິວ, ສະຖານທີ່ອາບນ້ຳ, ລອຍກົງເບງ.

    ທ່ານ ສົມສັກ ຍັງໃຫ້ຮູ້ອີກວ່າ ໃນສະເພາະໜ້າ ຈະໄດ້ພັດທະນາຫລາຍກິດຈະກຳທີ່ຕິດພັນກັບການທ່ອງທ່ຽວຕື່ມອີກ ເຊັ່ນ: ສ້າງເສັ້ນທາງຍ່າງເທິງພູແດນເມືອງ ຈາກທາງ 4B ຮອດແຄມນ້ຳຊັນ, ຢູ່ສັນພູ ຈະສ້າງຫໍຊົມວິວ, ຫໍປະຊຸມ, ຮ້ານຂາຍເຄື່ອງທີ່ລະນຶກ, ສ້າງກະເຊົ່າລອຍຟ້າຂ້າມນ້ຳຊັນລະຫວ່າງພູແດນເມືອງ ກັບສາຍພູໄກ້ຄຽງ, ສ້າງຣີຊອດຕາດຕົ້ນແຕນ, ສ້າງກິດຈະກຳຂີ່ເຮືອລ່ອງນ້ຳຊັນຊົມວິວຈາກບ້ານແຄນຢ່ອງລົງມາຕາມສາຍນ້ຳຊັນຮອດຫາດຄູນ ແລະ ກິດຈະກຳອຶ່ນໆອີກທີ່ຕິດພັນ.

      ຖ້າທ່ານໃດ ມີຈຸດປະສົງຢາກມາທ່ຽວຊົມທຳມະຊາດທີ່ສວາຍສົດງົດງາມ, ອາບນ້ຳທີ່ໃສເຢັນ, ຂີ່ເຮືອ - ລ່ອງກົງເບງ ຫລື ກີນດື່ມອື່ນແບບເປັນກັນເອງ ກໍ່ເຊີນແວ່ຫລີ້ນ ແວ່ຊົມໄດ້. ຫາດຄູນ ຕັ້ງຢູ່ແຄມນ້ຳຊັນ ບ້ານໂພນມຸງຄູນ ເມືອງບໍລິຄັນ ແຂວງບໍລິຄຳໄຊ, ທ່ານສາມາດເດີນທາງດ້ວຍລົດເຂົ້າເຖີງສະຖານທີ່ທ່ອງທ່ຽວເລີຍ.