ອຸດສາຫະກຳຜະລິດເກືອ ກໍເປັນກິດຈະການໜຶ່ງທາງທຸລະກິດ ທີ່ພັກ ແລະ ລັດໄດ້ສົ່ງເສີມ ເພາະນອກຈາກຈະເປັນການສ້າງລາຍຮັບໃຫ້ຜູ້ປະກອບການໄດ້ດີແລ້ວ ຍັງເປັນການສ້າງວຽກເຮັດງານທຳໃຫ້ແກ່ປະຊາຊົນຕື່ມອີກ.

     ທ່ານ ບົວສີ ຄຳແສນມີ ເຈົ້າຂອງກິດຈະການບໍ່ເກືອ "ກາໄຫ" ບ້ານສອງຄອນ ເມືອງປາກຊັນ ແຂວງບໍລິຄຳໄຊ ໄດ້ໃຫ້ສຳພາດແກ່ນັກຂ່າວ ວ່າ: ທ່ານ ໄດ້ສຳປະທານບໍ່ເກືອບ້ານສອງຄອນມາແຕ່ປີ 1995 ໃນພື້ນທີ່ບໍ່ 1 ເຮັກຕາ ໂດຍໄດ້ທຳການຜະລິດມາຕະຫລອດ, ເບື້ອງຕົ້ນ ໄດ້ຜະລິດເປັນເກືອຕົ້ມ ເພື່ອການບໍລິໂພກ, ຍ້ອນຕະຫລາດມີຄວາມຕ້ອງການຫລາຍຂຶ້ນ ຈຶ່ງໄດ້ຫັນມາຜະລິດເປັນເກືອຕາກ ເຊິ່ງມີຄວາມຈຳເປັນໃນການສະໜອງໃຫ້ແກ່ການກະສິກຳໃນການຜະລິດປຸຍ, ເປັນສ່ວນປະສົມໃນການຂ້າຫຍ້າ, ສະໜອງໃຫ້ພາກສ່ວນເອືອບໜັງເຄັມ, ປາກະເຕົາ ແລະ ໂຮງງານຜະລິດເຄືອແຫມ.

 

     ທ່ານ ບົວສີ ກ່າວອີກວ່າ ຄວາມອາດສາມາດຜະລິດ ແລະ ຈຳໜ່າຍ ເດືອນໜຶ່ງໆ ໄດ້ປະມານ 100 - 150 ໂຕນ ເຊິ່ງຂາຍໃນລາຄາ 600.000 - 700.000 ກີບ ຕໍ່ 1 ໂຕນ ສຳລັບເກືອຕາກ ແລະ 1.700.000 ກີບ ຕໍ່ 1 ໂຕນ ສຳລັບເກືອຕົ້ມ. 

       ແຜນການໃນອານາຄົດ ທ່ານຍັງໃຫ້ຮູ້ອີກວ່າ ຈະສ້າງສີ່ງອຳນວຍຄວາມສະດວກ ຕິດພັນກັບການທ່ອງທ່ຽວຕື່ມອີກ ເພື່ອໃຫ້ຜູ້ທີ່ສົນໃຈ ນອກຈາກໄດ້ມາທ່ຽວຊົມບໍ່ເກືອເພື່ອຖອດຖອນບົດຮຽນແລ້ວ ຍັງຈະໄດ້ມີການເດີນປ່າເພື່ອຊົມທິວທັດອັນສວາຍງາມຂອງສາຍພູ ອີກດ້ວຍ.

 

     ຕອນທ້າຍ ທ່ານ ບົວສີ ຄຳແສນມີ ໄດ້ຝາກຂ່າວດີມາຍັງພໍ່ແມ່ປະຊາຊົນ ອີກວ່າ ຖ້າທ່ານໃດສົນໃຈວຽກເຮັດງານທຳດ້ວຍຄ່າແຮງງານທີ່ດີ ຫລື ມີພາຫະນະຂອງຕົນເອງ ທີ່ຢາກມາປະກອບສ່ວນເຂົ້າໃນການຜະລິດ ແລະ ຈຳໜ່າຍຜະລິດຕະພັນຂອງເພີ່ນ ກໍ່ສະເໜີເຂົ້າມາໄດ້ ເພີ່ນຍິນດີຕ້ອນຮັບສະເໝີ ຫລື ຕິດຕໍ່ຫາເຈົ້າຂອງກິດຈະການໂດຍກົງ ຕາມເບີ 020 22337020.