ໃນລະຫວ່າງວັນທີ 30 - 31 ມັງກອນ 2019 ທ່ານ ໄຄທອງ ຄໍາສູນທອນ ຫົວໜ້າຂະແໜງຂົວທາງ ພະແນກໂຍທາທິການ ແລະ ຂົນສົ່ງແຂວງບໍລິຄໍາໄຊ ພ້ອມຄະນະ ໄດ້ລົງກວດກາເບີ່ງການສ້ອມແປງເສັ້ນທາງຫຼວງແຫ່ງຊາດ 13 ໃຕ້ ເຂດແຂວງບໍລິຄໍາໄຊ.

      ການລົງກວດກາການສ້ອມແປງເສັ້ນທາງຄັ້ງນີ້ ມີຄວາມຍາວ 183 ກິໂລແມັດ ດ້ວຍມຸນຄ່າສ້ອມແປງທັງໝົດ 23.237.253.789 ກີບ ໂດຍແບ່ງອອກເປັນ 1 ສັນຍາປະມູນ ແລະ 3 ສັນຍາເຈລະຈາໂດຍກົງ ຂອງ 3 ບໍລິສັດຮັບເໝົາສ້ອມແປງ ຄື: ບໍລິສັດ ເພັງໄຊກໍ່ສ້າງຈໍາກັດຜູ້ດຽວ, ບໍລິສັດລັດວິສາຫະກິດກໍ່ສ້າງຂົວທາງ ແລະ ຊົນລະປະທານແຂວງ, ບໍລິສັດຄູນທະວົງລາວ ກໍ່ສ້າງຄົບວົງຈອນຈໍາກັດ.

ສຳລັບການກໍ່ສ້າງເສັ້ນທາງ ແຕ່ເມືອງວຽງທອງ ຈາກບ້ານວັງຫີນ ຫາ ເມືອງໄຊຈໍາພອນ ເຊິ່ງແມ່ນໂຄງການກໍ່ສ້າງເສັ້ນທາງປູຫີນແຮ່ ມີຄວາມຍາວທັງໝົດ 70 ກ່ວາກິໂລແມັດ ຄວາມກວ້າງ 6 ແມັດ ກຸ່ມບໍລິສັດດວງຈະເລີນ ພັດທະນາກໍ່ສ້າງຈໍາກັດ ເປັນຜູ້ຮັບເໝົາກໍ່ສ້າງ ໃນມຸນຄ່າ 253 ຕື້ກວ່າກີບ, ສໍາລັບໜ້າວຽກຕ່າງໆ ທີ່ໄດ້ຈັດຕັ້ງຜ່ານມາ ໄດ້ມີການສໍາຫຼວດ  - ອອກແບບກໍ່ສ້າງ ວຽກບຸກເບີກໜ້າດິນ ຕັດຕົ້ນໄມ້ ຕັດດິນ ຕັດຫີນ ຊີເຈາະລະເບີດຫີນ ກໍ່ສ້າງທໍ່ກົມ ກໍ່ສ້າງທໍ່ລ່ຽມ ຖົມດິນຍົກລະດັບ, ປະຈຸບັນ ບັນດາໜ້າວຽກດັ່ງກ່າວ ແມ່ນຈັດຕັ້ງປະຕິບັດສໍາເລັດແລ້ວ 40% ຂອງມຸນຄ່າສັນຍາ. ສໍາລັບທິດທາງໃນປີ 2019 ນີ້ ທາງບໍລິສັດຮັບເໝົາກໍ່ສ້າງ ຈະປະຕິບັດໃຫ້ໄດ້ 80% ຂອງມຸນຄ່າໃນສັນຍາ ທັງນີ້ ກໍເພື່ອພັດທະນາພື້ນຖານໂຄງລ່າງຂອງແຂວງ ກໍ່ຄືເມືອງໄຊຈໍາພອນ ໃຫ້ມີຄວາມເຂັ້ມແຂງ ເພາະເສັ້ນທາງດັ່ງກ່າວ ເປັນເສັ້ນທາງສາຍຫຼັກເຂົ້າຫາເມືອງ  ເປັນເສັ້ນທາງຍຸດທະສາດ ແນວປ້ອງກັນຊາດ ປ້ອງກັນຄວາມສະຫງົບ ເບື້ອງຕາເວັນອອກ ແລະ ທາງເລກ 8B.