ພິທີປະຖະກະຖາຫວນຄືນມູນເຊື້ອ 63 ປີ ແຫ່ງການເຕີບໃຫຍ່ຂະຫຍາຍຕົວ ຂອງອົງການຈັດຕັ້ງກຳມະບານລາວ (​​1 ​ກຸມພາ 1956 - 01​ ກຸມພາ 2019) ໄດ້ຈັດຂຶ້ນໃນວັນທີ 6 ກຸມພາ 2019 ຢູ່ສະໂມສອນປົກຄອງແຂວງ ໃຫ້ກຽດປາຖະກະຖາໂດຍທ່ານ ລຳສະໄໝ ວໍລະສານ ຄະນະປະຈຳພັກແຂວງ ປະທານແນວລາວສ້າງຊາດແຂວງບໍລິຄຳໄຊ, ມີການນຳຂອງແຂວງ, ພະນັກງານລັດຖະກອນ, ສະມາຊິກກຳມະບານ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ ຕະຫຼອດຮອດນັກຮຽນນັກສຶກສາ ເຂົ້າຮ່ວມ.

    ໃນພິທີຄັ້ງນີ້ ທ່ານ ລຳສະໄໝ ວໍລະສານ ໄດ້ຫວນຄືນມູນເຊື້ອການກຳເນີດ ແລະ  ການລຸກຮື້ຂຶ້ນຕໍ່ສູ້ຢ່າງອົງອາດກ້າຫານບໍ່ຍອມຈຳນົນ ຂອງຊາວຜູ້ອອກແຮງານ ແລະ ປະຊາຊົນລາວບັນດາເຜົ່າ ວ່າ: ໃນທ້າຍສັດຕະຫວັດທີ 19, ພວກລ່າເມືອງຂື້ນຝຣັ່ງໄດ້ເຂົ້າມາຢຶດຄອງ 3 ປະເທດອິນດູຈີນ ແລະ ໄດ້ປຸ້ນສະດົມ, ເຂັ້ນຂ້າ ແລະ ກົດຂີ່ຂຸດຮີດຊາວຜູ້ອອກແຮງງານຢ່າງໂຫດຮ້າຍປ່າເຖື່ອນທີ່ສຸດ ຈົນມາຮອດວັນ​ທີ 3 ກຸມພາ 1930 ປະທານ ໂຮ່ຈິມິນ ໄດ້ສ້າງຕັ້ງພັກກອມມູນິດອິນດູຈີນຂື້ນ ເພື່ອນໍາພາຂະບວນການຕໍ່ສູ້ຂອງປະຊາຊົນຢູ່ອິນດູຈີນ ແລະ ໃນປີ 1934 ອົງຄະນະພັກແຄ້ວນລາວກໍ່ໄດ້ຮັບການສ້າງຕັ້ງຂື້ນ ຊຶ່ງ​ເປັນ​ບາດກ້າວ​ທຳ​ອິດ​ທີ່​ມີ​ການ​ປັບປຸງ, ຂະຫຍາຍ​ການຈັດ​ຕັ້ງ​ພັກ, ອົງການ​ຈັດ​ຕັ້ງ​ມະຫາຊົນ ຂະ​ບວນການ​ຕໍ່ສູ້​ກຳ​ເນີ​ດຂຶ້ນ​​ໃນ​ທົ່ວ​ປະ​ເທດ ​ແລະ ມາຮອດ​ວັນ​ທີ 22 ມີນາ 1955 ທີ່​ບ້ານນາ​ແມວ ​ເມືອງວຽງ​ໄຊ ​ແຂວງຫົວພັນ ພັກ​ປະຊາຊົນ​ລາວກໍ່ໄດ້ຮັບການສ້າງຕັ້ງຂື້ນ ​ໂດຍ​ແມ່ນ​ປະທານ​ ​ໄກສອນ ພົມວິຫານ ​ເປັນ​ເລຂາ​ຄະນະ​ຊີ້​ນຳ​ສູນ​ກາງ, ​ເປັນ​ເລຂາ​ຄະນະ​ພັກ​ສູນ​ກາງ ​ທັງ​ເປັນ​ຜູ້​ບັນຊາ​ການ​ສູງ​ສຸດ​ກຳລັງ​ປະກອບ​ອາວຸດ​ປະຊາຊົນ​ລາວ. ເພື່ອໂຄສະນາຂົນຂວາຍ, ເຕົ້າໂຮມກຳມະກອນ ໃຫ້ມີຄວາມຕື່ນຕົວທາງດ້ານຊົນຊັ້ນຢ່າງຈະແຈ້ງ, ເສີມຂະຫຍາຍປະຊາທິປະໄຕ, ສົ່ງເສີມການມີວຽກເຮັດງານທຳ ແລະ ເປັນຕົວແທນໃຫ້ແກ່ການປົກປ້ອງສິດຜົນປະໂຫຍດອັນຊອບທຳໃຫ້ແກ່ກຳມະກອນ ແລະ ຊາວຜູ້ອອກແຮງງານລາວບັນດາເຜົ່າ ວັນທີ 1 ກຸມພາ 1956 ກົມການເມືອງສູນກາງພັກ ກໍ່ໄດ້ມີມະຕິຕົກລົງສ້າງຕັ້ງອົງການຈັດຕັ້ງກຳມະບານລາວຂື້ນຢ່າງເປັນທາງການຢູ່ເຂດທີ່ໜັ້ນແຂວງຫົວພັນ ໂດຍແມ່ນ ສະຫາຍ ສີສົມພອນ ລໍວັນໄຊ ເປັນຜູ້ຮັບຜິດຊອບ. ພາຍຫຼັງທີ່ອົງການຈັດຕັ້ງກຳມະບານໄດ້ຮັບການສ້າງຕັ້ງຂື້ນ ກໍ່ໄດ້ກາຍເປັນກຳລັງປະກອບສ່ວນຢ່າງສົມກຽດ ເຂົ້າໃນການຕໍ່ສູ້ກູ້ຊາດແຕ່ລະໄລຍະ ຈົນສາມາດຍາດໄດ້ໄຊຊະນະ ແລະ ປົດປ່ອຍປະເທດຊາດໄດ້ ໃນວັນທີ 2 ທັນວາ 1975, ຫຼັງຈາກນັ້ນອົງການຈັດຕັ້ງກຳມະບານກໍ່ຍັງໄດ້ປະຕິບັດໜ້າທີ່ການຜະລິດ, ສ້າງຄວາມເຂັ້ມແຂງກຸ້ມຕົນເອງທາງດ້ານເສດຖະກິດ, ປະຕິບັດໜ້າທີ່ການສູ້ຮົບ, ທັງປັບປຸງ, ກໍ່ສ້າງ ແລະ ຂະຫຍາຍການຈັດຕັ້ງຂອງຕົນ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍ່ຄືການປົກປ້ອງສິດ ແລະ ຜົນປະໂຫຍດອັນຊອບທຳໃຫ້ແກ່ສະມາຊິກກຳມະບານ ແລະ ຊາວຜູ້ອອກແຮງານລາວບັນດາເຜົ່າ.

     

     ໃນພິທີປະຖະກະຖາຄັ້ງນີ້ ສະຫະພັນກຳມະບານແຂວງ ຮ່ວມກັບສູນເລືອດແຂວງບໍລິຄຳໄຊ ຍັງໄດ້ຈັດກິດຈະກຳ ບໍລິຈາກເລືອດຊ່ວຍເຫຼືອສັງຄົມ ເຊິ່ງມີສະມາຊິກກຳມະບານສະມັກໃຈຮ່ວມບໍລິຈາກເລືອດ ທັງໝົດ 55 ສະຫາຍ, ຍິງ 28 ສະຫາຍ ພ້ອມດຽວກັນນີ້ສະຫະພັນກຳມະບານແຂວງ ກໍ່ໄດ້ມີພິທີມອບໃບຍ້ອງຍໍໃຫ້ແກ້ຜູ້ມີຜົນງານ ໃນການຊ່ວຍເຫຼືອເຂົ້າໃນວຽກງານກຳມະບານ ແລະ ຜູ້ສະໝັກໃຈບໍລິຈາກເລືອດ. ພິເສດໃນພິທີບໍລິຈາກເລືອດ ທາງຮ້ານອາຫານກຸຫຼາບປາກຊັນ ໄດ້ນຳອາຫານຈຳນວນ 200 ກ່ອງ ມາສະໜັບສະໜຸນ ເພື່ອເປັນການໃຫ້ກຳລັງໃຈພະນັກງານ ແລະ ຜູ້ທີ່ສະໝັກໃຈບໍລິຈາກເລືອດ.