ກອງປະຊຸມສະຫຼຸບຕີລາຄາຄືນ ຜົນການຈັດຕັ້ງປະຕິບັດວຽກງານຮອບດ້ານ ຂອງຄະນະກຳມະການຕ້ານການຄ້າມະນຸດແຂວງບໍລິຄຳໄຊ ປະຈຳປີ 2018 ໄດ້ຈັດຂຶ້ນໃນວັນທີ 11 ມັງກອນ 2019 ຢູ່ຫ້ອງປະຊຸມຫ້ອງວ່າການປົກຄອງແຂວງ ໃຫ້ກຽດເຂົ້າຮ່ວມຂອງທ່ານ ບຸນມາ ບຸຈະເລີນ ຮອງເຈົ້າແຂວງບໍລິຄຳໄຊ ປະທານຄະນະກຳມະການຕ້ານການຄ້າມະນຸດຂັ້ນແຂວງ, ທ່ານ ຄຳລາວັນ ຈັນທະລາວັນ ຮອງລັດຖະມົນຕີປະຈຳສຳນັກງານນາຍຍົກລັດຖະມົນຕີ ທັງເປັນຄະນະກຳມະການຕ້ານການຄ້າມະນຸດລະດັບຊາດ, ມີຄະນະກຳມະການ ແລະ ກອງເລຂາຕ້ານການຄ້າມະນຸດຂັ້ນແຂວງ ເຂົ້າຮ່ວມ.

     ການສະຫຼຸບຕີລາຜົນການຈັດຕັ້ງປະຕິບັດວຽກງານຕະຫຼອດໄລຍະຜ່ານມາ ເຫັນວ່າຄະນະກໍາມະການຕ້ານການຄ້າມະນຸດຂັ້ນແຂວງ ໄດ້ເອົາໃຈໃສ່ຫຼາຍວຽກງານທີ່ສຳຄັນຫຼາຍດ້ານ ເປັນຕົ້ນແມ່ນຖືເອົາວຽກງານປ້ອງກັນສະກັດກັ້ນ, ການແກ້ໄຂ ແລະ ການປົກປ້ອງຊ່ວຍເຫຼືອຜູ້ຖືກເຄາະຮ້າຍ ຈາກການຄ້າມະນຸດເປັນໜ້າທີ່ອັນສໍາຄັນຕົ້ນຕໍ ແລະ ໄດ້ສຸມໃສ່ວຽກງານໂຄສະນາສຶກສາອົບຮົມດ້ວຍຫຼາຍວິທີ ເຊັ່ນ: ນໍາເອົານິຕິກໍາທີ່ພົວພັນເຖິງການຄ້າມະນຸດລົງເຜີຍແຜ່ໃຫ້ບັນດາເມືອງ, ໂຄງການກໍ່ສ້າງເຂື່ອນໄຟຟ້າພາຍໃນແຂວງ, ບັນດາຈຸດສຸມພັດທະນາຂອງແຂວງ, ຂອງເມືອງ ແລະ ຢູ່ຈຸດຫຼໍ່ແຫຼມບ່ອນທີ່ມີຄວາມສ່ຽງ ຖືເອົາການລົງຮາກຖານການເມືອງຂອງແຂວງ-ຂອງເມືອງເພື່ອປຸກລະດົມຂະບວນການທຸກຊັ້ນຄົນເຂົ້າຮ່ວມຕ້ານການຄ້າມະນຸດ.

       1 ປີຜ່ານມາ ມີຄະດີທີ່ເກີດຂື້ນທັງໝົດ 16 ເລື່ອງ, ຜູ້ຖືກຫາ 25 ຄົນ, ຍິງ 7 ຄົນ, ມີຜູ້ຖືກເຄາະຮ້າຍຈຳນວນ 38 ຄົນ, ຍິງ 37 ຄົນ, ອາຍຸຕໍ່າກວ່າ 18 ປີ 25 ຄົນ, ໃນນັ້ນ ມີຜູ້ຖືກເຄາະຮ້າຍຈາກການຄ້າມະນຸດ 15 ຄົນ, ອາຍຸຕໍ່າກວ່າ 18 ປີ 6 ຄົນ, ຜູ້ຖືກເຄາະຮ້າຍຈາກການສົງໃສຄ້າມະນຸດມີ 3 ຄົນ, ຜູ້ຖືກເຄາະຮ້າຍຈາກການຂົ່ມຂືນ 4 ຄົນ, ຜູ້ຖືກເຄາະຮ້າຍຈາການທຳຊຳເລົາເດັກມີ 6 ຄົນ, ຜູ້ຖືກເຄາະຮ້າຍຈາກການສົມຮູ້ຮ່ວມຄິດຮ່ວມເພດກັບເດັກອາຍຸຕໍ່າກວ່າ 18 ປີ ມີ 1​ ຄົນ, ຜູ້ຖືກເຄາະຮ້າຍຈາກການລັກພາໂຕມີ 1 ​ຄົນ ອາຍຸຕໍ່າກວ່າ 18 ປີ, ມີຜູ້ຖືກເຄາະຮ້າຍຫາຍສາບສູນມີ 2 ຄົນ, ສົ່ງໃຫ້ໄອຍາການປະຊາຊົນແຂວງດຳເນີນຄະດີ 6 ເລື່ອງ, ສົ່ງໃຫ້ພະແນກຄຸ້ມຄອງຄົນຕ່າງປະເທດດໍາເນີນ 2​ ເລື່ອງ, ບໍ່ສາມາດເປີດການສືບສວນ  - ສອບສວນຈຳນວນ 1 ເລື່ອງ, ໂຈະການດໍາເນີນຄະດີ 1 ​ເລື່ອງ, ກຳລັງດຳເນີນຄະດີ 1 ​ເລື່ອງ.

       ນອກນັ້ນ ຍັງໄດ້ລົງເຄື່ອນໄຫວແກ້ໄຂບັນດາຮ້ານກິນດື່ມ, ຄາລາໂອເກະ, ຮ້ານບັນເທີງ ທີ່ມີການເຄື່ອນໄຫວຄ້າ - ຂາຍໂສເພນີ ສໍາເລັດແລ້ວພາຍໃນ 3 ເມືອງ ມີ 83 ຮ້ານ, ມີສາວບໍລິການ 200 ຄົນ ໂດຍເອົາການສຶກສາອົບຮົມເປັນຫຼັກ ໃຫ້ເຂົາເຈົ້າຮູ້ໄດ້ເຖິງການກະທໍາທີ່ຜິດຕໍ່ລະບຽບກົດໝາຍ ແລະ ຮີດຄອງວັດທະນະທຳອັນດີງາມຂອງຊາດ ແລະ ຍັງຈະສືບຕໍ່ລົງແກ້ໄຂເມືອງອື່ນໆທົ່ວແຂວງທີ່ຍັງບໍ່ທັນສໍາເລັດ.

ຫຼັງຈາກນັ້ນຜູ້ແທນກອງປະຊຸມ ຍັງໄດ້ປະກອບຄຳຄິດເຫັນຮ່ວມກັນ ເປັນຕົ້ນແມ່ນວຽກງານຊ່ວຍເຫຼືອບັນເທົາທຸກ ແລະ ການສ້າງອາຊີບ ໃຫ້ຜູ້ຖືກເຄາະຮ້າຍ, ການກຳນົດກຸ່ມເປົ້າໝາຍໃນການໃຫ້ຄວາມຮູ້ ແລະ ສຶກສາອົບຮົມ, ການພົວພັນກັບບັນດາປະເທດອ້ອມຂ້າງ ໃນການປ້ອງກັນ ແລະ ສະກັດກັ້ນການຄ້າມະນຸດ ແລະ ວຽກງານອື່ນໆ ທັ້ງນີ້ ກໍ່ເພື່ອເປັນການແລກປ່ຽນບົດຮຽນ ຍົກໃຫ້ເຫັນຂໍ້ສະດວກ ແລະ ຂໍ້ຄົງຄ້າງ ແນໃສ່ນຳໄປປັບປຸງແກ້ໄຂໃຫ້ວຽກງານດັ່ງກ່າວດີຂື້ນ ສາມາດນຳໄປຈັດຕັ້ງປະຕິບັດເຂົ້າໃນຕົວຈິງຢ່າງມີປະສິດທິພາບສູງ ເຮັດໃຫ້ການຄ້າມະນຸດຫຼຸດໜ້ອຍຖອຍລົງໃນຕໍ່ໜ້າ.